ಜಮ್ಮು, ಜುಲೈ 11 : ಶ್ರೀ ಅಮರನಾಥ ಯಾತ್ರೆಯ ಹತ್ತನೇ ತಂಡದ 9,000ಕ್ಕೂ ಹೆಚ್ಚು ಯಾತ್ರಿಕರು ಶುಕ್ರವಾರ ಜಮ್ಮುವಿನ ಭಗವತಿ ನಗರ ಮೂಲ ಶಿಬಿರದಿಂದ ದಕ್ಷಿಣ ಕಾಶ್ಮೀರ ಹಿಮಾಲಯದಲ್ಲಿರುವ ಬಾಲ್ಟಾಲ್ ಮತ್ತು ಪಹಲ್ಗಾಮ್‌ನ ಎರಡು ಮೂಲ ಶಿಬಿರಗಳತ್ತ ಪ್ರಯಾಣ ಬೆಳೆಸಿದರು.

ಅಧಿಕಾರಿಗಳ ಪ್ರಕಾರ, ಒಟ್ಟು 9,182 ಯಾತ್ರಿಕರು ಬೆಳಗಿನ ಜಾವ 333 ವಾಹನಗಳ ಕಾನ್ವಾಯ್‌ನಲ್ಲಿ ಪ್ರಯಾಣ ಆರಂಭಿಸಿದರು. ಇದರಲ್ಲಿ ಲಘು ಹಾಗೂ ಭಾರೀ ವಾಹನಗಳು ಸೇರಿದ್ದವು. ಬಾಲ್ಟಾಲ್ ಮಾರ್ಗದತ್ತ 3,305 ಯಾತ್ರಿಕರು ಹಾಗೂ ಪಹಲ್ಗಾಮ್ ಮಾರ್ಗದತ್ತ 5,877 ಯಾತ್ರಿಕರು ತೆರಳಿದರು.

ಯಾತ್ರಿಕರ ಸಂಚಾರವು ನಾಗರಿಕ ಆಡಳಿತ, ಜಮ್ಮು ಮತ್ತು ಕಾಶ್ಮೀರ ಪೊಲೀಸ್, ಭದ್ರತಾ ಪಡೆಗಳು ಹಾಗೂ ಶ್ರೀ ಅಮರನಾಥ ದೇಗುಲ ಮಂಡಳಿಯ ಸಮನ್ವಯದಲ್ಲಿ ಬಹು ಹಂತದ ಭದ್ರತಾ ವ್ಯವಸ್ಥೆಯಡಿ ನಡೆಯಿತು.

ಯಾತ್ರೆ ಆರಂಭವಾದ ಕಳೆದ ಎಂಟು ದಿನಗಳಲ್ಲಿ ದೇಶದ ವಿವಿಧ ಭಾಗಗಳಿಂದ ಆಗಮಿಸಿದ ಎರಡು ಲಕ್ಷಕ್ಕೂ ಹೆಚ್ಚು ಯಾತ್ರಿಕರು ಪವಿತ್ರ ಗುಹಾ ದೇಗುಲಕ್ಕೆ ಭೇಟಿ ನೀಡಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಇದೇ ವೇಳೆ, ಜಮ್ಮು ಮತ್ತು ಕಾಶ್ಮೀರ ಆಡಳಿತವು ಯಾತ್ರಿಕರು ಖಚಿತ ನೋಂದಣಿ ಪೂರ್ಣಗೊಳಿಸಿದ ನಂತರ ಹಾಗೂ ನಿಗದಿತ ದಿನಾಂಕದಂದೇ ಯಾತ್ರೆ ಕೈಗೊಳ್ಳುವಂತೆ ಮನವಿ ಮಾಡಿದೆ. ನೋಂದಣಿ ಮಾಡಿಸದ ಯಾವುದೇ ಯಾತ್ರಿಕರಿಗೆ ಮೂಲ ಶಿಬಿರಗಳತ್ತ ತೆರಳಲು ಅನುಮತಿ ನೀಡಲಾಗುವುದಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಜಮ್ಮು ಮತ್ತು ಕಾಶ್ಮೀರದ ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ಅವರು ಜುಲೈ 2ರಂದು ಜಮ್ಮುವಿನಿಂದ ಶ್ರೀ ಅಮರನಾಥ ಯಾತ್ರೆಯ ಮೊದಲ ತಂಡಕ್ಕೆ ಚಾಲನೆ ನೀಡಿದ್ದರು.