ಹುಬ್ಬಳ್ಳಿ   01: ಕಳೆದ ಸೋಮವಾರ 55 ವರ್ಷದ ಮಹಿಳೆಯ ಎಡಗಾಲಿನ ಮೊಣಕಾಲು ಕೀಲು ಬದಲಿ ರೊಬೋಟಿಕ್ ಶಸ್ತ್ರಚಿಕಿತ್ಸೆಯನ್ನು ಯಶಸ್ವಿಯಾಗಿ ಮಾಡಲಾಗಿದೆ. ಸರ್ಕಾರಿ ವೈದ್ಯಕೀಯ ಕಾಲೇಜುಗಳ ಇತಿಹಾಸದಲ್ಲೇ ಮೊದಲ ಬಾರಿಗೆ ಶಸ್ತ್ರಚಿಕಿತ್ಸೆಯನ್ನು ಯಶಸ್ವಿಗೊಳಿಸಲಾಗಿದೆ ಎಂದು  ಕರ್ನಾಟಕ ವೈದ್ಯಕೀಯ ವಿಜ್ಞಾನ ಮತ್ತು ಸಂಶೋಧನಾ ಸಂಸ್ಥೆ (ಕೆಎಂಸಿಆರ್‌ಐ) ನಿರ್ದೇಶಕರಾದ ಡಾ.ಕೆ.ಎಫ್‌.ಕಮ್ಮಾರ ಹೇಳಿದರು.  

ಇಂದು ಕರ್ನಾಟಕ ವೈದ್ಯಕೀಯ ವಿಜ್ಞಾನ ಮತ್ತು ಸಂಶೋಧನಾ ಸಂಸ್ಥೆ (ಕೆಎಂಸಿಆರ್‌ಐ)ಯ ಗೋಲ್ಡನ್ ಜುಬ್ಲಿ ಹಾಲ್ ನಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ರೂ. 2.79 ಕೋಟಿ ಮೊತ್ತದ ರೋಬೋಟಿಕ್ ಮಷಿನ್ ಖರೀದಿಸಲಾಗಿದೆ. ಸೋಮವಾರ ದಿನದಂದು ಯಶಸ್ವಿ ಚಿಕಿತ್ಸೆ ನೀಡಲಾಗಿದೆ. ಎರಡರಿಂದ ಎರಡೂವರೆ ಗಂಟೆಯಲ್ಲಿ ಶಸ್ತ್ರಚಿಕಿತ್ಸೆ ಪೂರ್ಣಗೊಂಡಿದೆ. ಬಿಪಿಎಲ್ ಹಾಗೂ ಎಬಿಆರ್‌ಕೆ ಕಾರ್ಡ್‌ ಇರುವುದರಿಂದ ಉಚಿತವಾಗಿ ಚಿಕಿತ್ಸೆ ನೀಡಲಾಗಿರುತ್ತದೆ. ಖಾಸಗಿಯಾಗಿ ಶಸ್ತ್ರಚಿಕಿತ್ಸೆ ಮಾಡಲು ರೂ. 3 ರಿಂದ 3.30 ಲಕ್ಷ ವೆಚ್ಚ ತಗುಲಿದೆ. ಗುಣಮಟ್ಟದ ಸರ್ಜರಿ ಮಾಡಲು ರೊಬೋಟಿಕ್ ಶಸ್ತ್ರಚಿಕಿತ್ಸೆ ಅನುಕೂಲವಾಯಿತು. ಮೊದಲ ಬಾರಿಗೆ ರೊಬೋಟಿಕ್ ಸರ್ಜರಿ ಮಾಡಿರುವುದು ಸಂತಸ ತಂದಿದೆ ಎಂದು ಅವರು ತಿಳಿಸಿದರು.  

ವೈದ್ಯಕೀಯ ಅಧೀಕ್ಷಕ ಡಾ.ಈಶ್ವರ ಹಸಬಿ, ಡಾ.ಎಸ್‌.ಎಫ್‌.ಕಮ್ಮಾರ, ಡಾ.ವಿನಯ ಪವಾರ, ಡಾ.ರಾಜಶೇಖರ ದ್ಯಾಬೇರಿ, ಡಾ.ವೆಂಕಟೇಶ ಮೂಲಿಮನಿ, ಡಾ.ಎ.ಎ.ಹೊಸಂಗಡಿ, ಡಾ.ಲಕ್ಷ್ಮಿಕಾಂತ ಲೋಕೋರೆ ಪತ್ರಿಕಾಗೋಷ್ಠಿಯಲ್ಲಿದ್ದರು.