ಚಿಕ್ಕೋಡಿ 01: ವಿದ್ಯಾಭ್ಯಾಸದೊಂದಿಗೆ ಕ್ರೀಡೆಯೂ ಸಮಾನ ಪ್ರಾಮುಖ್ಯತೆಯನ್ನು ಹೊಂದಿದ್ದು, ವಿದ್ಯಾರ್ಥಿಗಳ ಶಾರೀರಿಕ, ಮಾನಸಿಕ ಹಾಗೂ ಬೌದ್ಧಿಕ ಬೆಳವಣಿಗೆಗೆ ಕ್ರೀಡೆ ಅವಶ್ಯಕ ಎಂದು ಚಿಕ್ಕೋಡಿ-ಸದಲಗಾ ಕ್ಷೇತ್ರದ ಶಾಸಕ ಗಣೇಶ ಪ್ರ. ಹುಕ್ಕೇರಿ ಹೇಳಿದರು. 

ಉಪನಿರ್ದೇಶಕರ ಕಚೇರಿ ಶಾಲಾ ಶಿಕ್ಷಣ ಇಲಾಖೆ (ಪದವಿ ಪೂರ್ವ) ಚಿಕ್ಕೋಡಿ ಮತ್ತು ಚಿಂಚಣಿ ಸಿದ್ದಪ್ರಭು ಪದವಿ ಪೂರ್ವ ಕಾಲೇಜು ಇವರ ಸಂಯುಕ್ತ ಆಶ್ರಯದಲ್ಲಿ ಬಿ.ಕೆ. ಕಾಲೇಜಿನ ಮೈದಾನದಲ್ಲಿ ಜರುಗಿದ ತಾಲೂಕಾ ಮಟ್ಟದ ಕ್ರೀಡಾಕೂಟವನ್ನು ಉದ್ಘಾಟಿಸಿ ಅವರು ಮಾತನಾಡಿದರು. 

ಕ್ರೀಡೆ ಶಿಸ್ತು ಕಲಿಸುತ್ತದೆ. ಗೆಲುವು-ಸೋಲು ಸಹಜ. ಆದರೆ ಕ್ರೀಡೆ ಶಿಸ್ತು, ಸಹನೆ, ಸೋಲನ್ನು ತಾಳುವ ಮನೋಭಾವ ಹಾಗೂ ತಂಡ ಮನೋಭಾವವನ್ನು ಬೆಳೆಸುತ್ತದೆ. ಇಂತಹ ಕ್ರೀಡಾಕೂಟಗಳು ಗ್ರಾಮೀಣ ಹಾಗೂ ಹಳ್ಳಿಯ ಪ್ರತಿಭೆಗಳಿಗೆ ರಾಜ್ಯ ಮಟ್ಟದ ಸ್ಪರ್ಧೆಗಳಲ್ಲಿ ಹೆಸರು ಮಾಡಿಸಲು ಬುನಾದಿ ಆಗುತ್ತವೆ ಎಂದು ಶಾಸಕರು ಅಭಿಪ್ರಾಯಪಟ್ಟರು. 

ಮುಖ್ಯ ಅತಿಥಿಯಾಗಿ ಮಾತನಾಡಿದ ಪಿಎಸ್‌ಐ ಬಸಗೌಡ ನೇರ್ಲಿ ಅವರು ಕ್ರೀಡೆಯಲ್ಲಿ ತೊಡಗುವ ವಿದ್ಯಾರ್ಥಿಗಳು ಶಿಸ್ತು, ಹೊಣೆಗಾರಿಕೆ ಮತ್ತು ಆರೋಗ್ಯದ ಕಡೆ ಹೆಚ್ಚು ಕಾಳಜಿ ವಹಿಸುತ್ತಾರೆ. ಇಂದಿನ ಯುವಜನತೆಗೆ ಕ್ರೀಡೆ ಮಾತ್ರವಲ್ಲ, ಉತ್ತಮ ನಾಗರಿಕತೆಯ ದಾರಿ ತೋರಿಸುತ್ತದೆ ಎಂದರು. 

ಕಾರ್ಯಕ್ರಮದಲ್ಲಿ ಪದವಿ ಪೂರ್ವ ಶಿಕ್ಷಣ ಇಲಾಖೆಯ ಉಪನಿರ್ದೇಶಕ ಪಾಂಡುರಂಗ ಭಂಡಾರೆ, ಡಿಡಿಪಿಐ ಆರ್‌.ಎಸ್‌. ಸೀತಾರಾಮು, ಬಿಇಒ ಪ್ರಭಾವತಿ ಪಾಟೀಲ, ಯುವ ನ್ಯಾಯವಾದಿ ಸಾಗರ ಪಾಮದಿನ್ನಿ, ಬಿ.ಕೆ. ಕಾಲೇಜಿನ ಪ್ರಾಂಶುಪಾಲ ಬಿ.ಜಿ. ಕುಲಕರ್ಣಿ, ಪ್ರಕಾಶ ಕೋಳಿ, ಎ.ಎಂ. ಕಮತ, ಉಪನ್ಯಾಸಕರಾದ ಎಂ.ಜಿ. ನಾಯಿಕ, ದೈಹಿಕ ಉಪನ್ಯಾಸಕ ಆನಂದ ಪಟಾಯತ, ತಾಲೂಕಾ ಕ್ರೀಡಾ ಸಂಯೋಜಕ ವಿ.ಬಿ. ಮಾಚಕನೂರ, ವಿ.ಬಿ. ಹಿರೇಮಠ, ರೂಪಾ ಗುಡೋಡಗಿ ಮುಂತಾದವರು ಉಪಸ್ಥಿತರಿದ್ದರು. 

ಆರ್‌.ಟಿ. ಕವಟಕೊಪ್ಪ ಸ್ವಾಗತಿಸಿದರು. ವ್ಹಿ.ಸಿ. ಕೋರಿ ನಿರೂಪಿಸಿದರು. ಎಸ್‌.ಬಿ. ಪಾಟೀಲ ವಂದಿಸಿದರು.