ವಿಜಯಪುರ 17: ವಿಜಯಪುರ ಜಿಲ್ಲೆಗೆ ಸರ್ಕಾರಿ ವೈದ್ಯಕೀಯ ಕಾಲೇಜು ಬೇಕು ಎಂದು ದಶಕದ ಹಿಂದೆಯೇ ಮೊಟ್ಟಮೊದಲು ಧ್ವನಿ ಎತ್ತಿರುವುದೇ ಜವಳಿ ಸಚಿವರಾದ ಶ್ರೀ ಶಿವಾನಂದ ಪಾಟೀಲ ಎಂದು ನಗರಸಭೆ ಮಾಜಿ ಸದಸ್ಯರಾದ ರವಿಕಾಂತ ಬಗಲಿ ಅವರು ಶಾಸಕ ಯತ್ನಾಳ ಹೇಳಿಕೆಗೆ ತಿರುಗೇಟು ನೀಡಿದ್ದಾರೆ.  

ಈ ಕುರಿತು ಪತ್ರಿಕಾ ಪ್ರಕಟಣೆ ನೀಡಿರುವ ರವಿಕಾಂತ ಬಗಲಿ ಅವರು ಖಾಸಗಿ ಆಸ್ಪತ್ರೆ ತೆರೆದು ಹಣ ದೋಚುವುದನ್ನು ಕಲಿತಿರುವ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಇದೀಗ, ಸರ್ಕಾರಿ ಸೌಲಭ್ಯ ಸಹಿತ ಖಾಸಗಿ ಸಹಭಾಗಿತ್ವದ (ಪಿಪಿಪಿ) ಹೆಸರಿನಲ್ಲಿ ವೈದ್ಯಕೀಯ ಕಾಲೇಜು ದೋಚುವ ಹುನ್ನಾರ ನಡೆಸಿದ್ದಾರೆ. ಈ ಕಾರಣಕ್ಕಾಗಿಯೇ ಖಾಸಗಿ ಸಹಭಾಗಿತ್ವದ ವೈದ್ಯಕೀಯ ಕಾಲೇಜ ಆರಂಭಕ್ಕೆ ಆಸಕ್ತಿ ತೋರುತ್ತಿದ್ದಾರೆ ಎಂದು ಯತ್ನಾಳ ವಿರುದ್ಧ ರವಿಕಾಂತ ಟೀಕಾ ಪ್ರಹಾರ ನಡೆಸಿದ್ದಾರೆ. 

ಶ್ರೀ ಶಿವಾನಂದ ಪಾಟೀಲ ಅವರು ಆರೋಗ್ಯ ಸಚಿವರಾಗಿದ್ದ ಸಂದರ್ಭದಲ್ಲಿ ವಿಜಯಪುರ ಜಿಲ್ಲೆಯಲ್ಲಿ ಸರ್ಕಾರಿ ವೈದ್ಯಕೀಯ ಕಾಲೇಜು ಸ್ಥಾಪನೆಗೆ ಪೂರಕವಾದ ಮೂಲಭೂತ ಸೌಲಭ್ಯ ಕಲ್ಪಿಸಿದ್ದಾರೆ. ಸರ್ಕಾರಿ ಆಸ್ಪತ್ರೆಯ ಆಸ್ತಿ ಒತ್ತುವರಿ ತಡೆಯುವುದಕ್ಕಾಗಿ ಕಂಪೌಂಡ ನಿರ್ಮಿಸಿ, 153 ಎಕರೆ ಜಮೀನು ಜಮೀನು ಸಂರಕ್ಷಿಸುವ ಕೆಲಸ ಮಾಡಿದ್ದಾರೆ. ತಾಯಿ-ಮಕ್ಕಳ ಆಸ್ಪತ್ರೆ ಸ್ಥಾಪಿಸಿದ್ದಾರೆ. ಅಪಘಾತದ ಸಂದರ್ಭದಲ್ಲಿ ಜೀವ ರಕಣೆಗಾಗಿ ತುರ್ತು ಚಿಕಿತ್ಸೆ ನೀಡಲು ಟ್ರಾಮಾ ಸೆಂಟರ್ ಕಟ್ಟಡ ನಿರ್ಮಿಸಿದ್ದಾರೆ. ಕ್ಯಾನ್ಸರ್ ಆಸ್ಪತ್ರೆ ಮಂಜೂರು ಮಾಡಿಸಿದ್ದಾರೆ. ಆರೋಗ್ಯ ಇಲಾಖೆಯ ಉತ್ತರ ಕರ್ನಾಟಕ ಭಾಗದಲ್ಲಿ ಸುಲಭ ಆಡಳಿತದ ನಿರ್ವಹಣೆಗಾಗಿ ವಿಜಯಪುರ ಜಿಲ್ಲಾ ಕೇಂದ್ರದಲ್ಲಿ ಅಪರ ನಿರ್ದೇಶಕರ ಹುದ್ದೆ ಸೃಷ್ಟಿಸಿ, ಅನುಷ್ಠಾನಕ್ಕೆ ತಂದಿದ್ದಾರೆ. ಇದೀಗ ಜನಾಶಯದಂತೆ ಏಮ್ಸ್‌ ಸ್ಥಾಪನೆಗೆ ಧ್ವನಿ ಎತ್ತಿದ್ದಾರೆ ಎಂದು ರವಿಕಾಂತ ವಿವರಿಸಿದ್ದಾರೆ. 

ಮಾಧ್ಯಮಗಳಲ್ಲಿ ಅನವಶ್ಯಕ ಹೇಳಿಕೆ ನೀಡಿ ಜೋಕರ್ ರೀತಿ ವರ್ತಿಸುವ ಯತ್ನಾಳ, ಜಿಲ್ಲೆಯ ಹಿತದೃಷ್ಟಿಯಿಂದ ಜನರು ಹೋರಾಟ ಮಾಡುತ್ತಿದ್ದು, ಕುಂಬಳಕಾಯಿ ಕಳ್ಳ ಎಂದರೆ ಹೆಗಲು ಮುಟ್ಟಿ ನೋಡಿಕೊಳ್ಳುತ್ತಿರುವುದೇಕೆ ಎಂದು ಪ್ರಶ್ನಿಸಿದ್ದಾರೆ. 

ಸಚಿವ ಶಿವಾನಂದ ಪಾಟೀಲ ಅವರು ಯತ್ನಾಳ ಅವರಂತೆ ಪತ್ರಿಕಾ ಹುಲಿಯಲ್ಲ. ಬದಲಾಗಿ ಪ್ರಚಾರ ಬಯಸದೇ ಜಿಲ್ಲೆಯ ಅಭಿವೃದ್ಧಿಗೆ ಸದ್ದಿಲ್ಲದೇ ತಮ್ಮ ಬದ್ಧತೆ ತೋರಿರುವ ಇಚ್ಛಾಶಕ್ತಿ ನಾಯಕರು. ಸಚಿವ ಶಿವಾನಂದ ಪಾಟೀಲ ಅವರು ಮಾಡಿರುವ ಅಭಿವೃದ್ಧಿ ಕಾರ್ಯಕ್ರಮಗಳು ಜನತೆಯ ಕಣ್ಣ ಮುಂದಿರುವ ಹೊಸ ಸಾಕ್ಷಿ ಎಂದು ರವಿಕಾಂತ ಬಗಲಿ ಅವರು ಟೀಕಿಸಿದ್ದಾರೆ. 

ಸಚಿವ ಶಿವಾನಂದ ಪಾಟೀಲ ಅವರಿಗೆ ತಾಕತ್ತಿದೆ ಎಂಬ ಕಾರಣಕ್ಕೆ ಆರೋಗ್ಯ ಸಚಿವರಾಗಿ ಜಿಲ್ಲೆಗೆ ನೀರೀಕ್ಷೆ ಮೀರಿ ಯೋಜನೆಗಳನ್ನು ತಂದು ಅಭಿವೃದ್ಧಿ ಮಾಡಿದ್ದಾರೆ. ಮಾಧ್ಯಮಗಳಲ್ಲಿ ಹೇಳಿಕೆ ಕೊಡುವ ಯತ್ನಾಳ ಅವರೇ ನಗರದಲ್ಲಿ ನೀವು ಮಾಡಿರುವ ರಸ್ತೆಗಳು ವರ್ಷದಲ್ಲೇ ಕಿತ್ತು ಹೋಗಿದ್ದು, ಎಲ್ಲೆಂದರಲ್ಲಿ ಗುಂಡಿಗಳು ಬಿದ್ದಿವೆ. ಒಳಚರಂಡಿಗಳು ಕಟ್ಟಿಕೊಂಡು ರಸ್ತೆಗೆ ಹರಿಯುತ್ತಿವೆ. ಇದು ನಿಮ್ಮ ಅಭಿವೃದ್ಧಿ ರೂಪದ ಭ್ರಷ್ಟಾಚಾರಕ್ಕೆ ಸಾಕ್ಷಿ. ಯತ್ನಾಳ ಅವರೇ ಇನ್ನಾದರು ಮಾತು ಕಡಿಮೆ ಮಾಡಿ, ರಾಜಕಾರಣ ಬಿಡಿ, ನಗರದ ಅಭಿವೃದ್ಧಿಗೆ ಗಮನ ಕೊಡಿ ಎಂದು ರವಿಕಾಂತ ಬಗಲಿ ಅವರು ಸಲಹೆ ನೀಡಿದ್ದಾರೆ.