ಗ್ರಾಮೋದ್ಧಾರವೇ ಎನ್‌.ಎಸ್‌.ಎಸ್‌. ಸ್ವಯಂ ಸೇವಕರ ಗುರಿಯಾಗಲಿ: ಪ್ರೊ. ನಾಗರಾಜ ಕಾಳೆ  

ಬೆಳಗಾವಿ 24: ಭಾರತವು ಗ್ರಾಮ ಸಂಸ್ಕೃತಿಗಳನ್ನು ಹೊಂದಿದ ದೇಶ. ಗ್ರಾಮ ಪರಿಸರದಲ್ಲಿ ಮುಗ್ಧತೆ ಮತ್ತು ಪ್ರಾಮಾಣಿಕತೆಗಳು ಇಂದಿಗೂ ಸಹಜವಾಗಿರುವುದರಿಂದ ಅಲ್ಲಿ ನಾಗರೀಕತೆಯ ಅನೇಕ ಸೌಲಭ್ಯಗಳ ಕೊರತೆ ಇದೆ. ಶಿಕ್ಷಣ, ಆರೋಗ್ಯ, ಉದ್ಯೋಗ, ಪರಿಸರ ಇತ್ಯಾದಿಗಳ ಅಭಿವೃದ್ಧಿ ಕಾರ್ಯಗಳು ನಿತ್ಯ ನಡೆಯಬೇಕಾಗಿದೆ. ಎನ್‌. ಎಸ್‌. ಎಸ್‌.  ವಿದ್ಯಾರ್ಥಿ ಗಳು ಗ್ರಾಮ ಮತ್ತು ಸಮಾಜ ಅಭಿವೃದ್ಧಿಗಾಗಿ ದುಡಿಯಬೇಕಾಗಿದೆ.  ಈ ಹಿನ್ನೆಲೆಯಲ್ಲಿ ಗ್ರಾಮೋದ್ಧಾರವೇ ಎನ್‌.ಎಸ್‌.ಎಸ್‌. ಸ್ವಯಂ ಸೇವಕರ ಗುರಿಯಾಗಬೇಕು ಎಂದು  ಖ್ಯಾತ ಚಿಂತಕ ನಾಗರಾಜ ಕಾಳೆ ಅವರು ನುಡಿದರು.   

ಬೆಳಗಾವಿ ನಗರದ ಪ್ರತಿಷ್ಠಿತ ಎಸ್‌.ಕೆ.ಇ. ಸಂಸ್ಥೆಯ ಆರಿ​‍್ಪ.ಡಿ. ಮಹಾವಿದ್ಯಾಲಯದಲ್ಲಿ  ಇಂದು ದಿನಾಂಕ 24.09.2025 ರಂದು ನಡೆದ ಎನ್‌.ಎಸ್‌.ಎಸ್‌. ಸಂಸ್ಥಾಪನಾ ದಿನಾಚರಣೆ ಹಾಗೂ 2025-26 ನೇ ಸಾಲಿನ ಎನ್‌.ಎಸ್‌.ಎಸ್‌. ಚಟುವಟಿಕೆಗಳ ಉದ್ಘಾಟನಾ ಸಮಾರಂಭದಲ್ಲಿ  ಮುಖ್ಯ ಅತಿಥಿಗಳಾಗಿ ಅವರು ಮಾತನಾಡಿದರು. 

      ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಮಹಾವಿದ್ಯಾಲಯದ ಪ್ರಾಚಾರ್ಯ ಡಾ.ಅಭಯ ಪಾಟೀಲ ಅವರು ವಹಿಸಿ ನಾಡಿನ ಅಭಿವೃದ್ಧಿ ಚಟುವಟಿಕೆಗಳಲ್ಲಿ ಎನ್‌.ಎಸ್‌.ಎಸ್‌. ಸ್ವಯಂ ಸೇವಕರು ಕ್ರಿಯಾಶೀಲತೆಯಿಂದ ಪಾಲ್ಗೊಳ್ಳಬೇಕು ಎಂದು ಕರೆ ನೀಡಿದರು. ಎನ್‌.ಎಸ್‌.ಎಸ್‌. ಕಾರ್ಯಕ್ರಮಾಧಿಕಾರಿ ಪ್ರೊ.ಇಂದಿರಾ ಹೋಳಕರ ಪ್ರಾಸ್ತಾವಿಕ ಮಾತುಗಳನ್ನಾಡಿದರು. ಸ್ನೇಹಾ ಪತ್ತಾರ ಅತಿಥಿಗಳನ್ನು ಪರಿಚಯಿಸಿದರು.   

ಐಶ್ವರ್ಯ ಕೋಲಕಾರ ಸ್ವಾಗತಿಸಿದರು. ನಂದಿನಿ ದಂಡಿಗ್ಯಾಗೋಳ ವಂದಿಸಿದರು. ಸ್ವಾತಿ ಪಾಟೀಲ ನಿರೂಪಿಸಿದರು. ಅಪಾರ ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕ ಸಿಬ್ಬಂದಿ ವರ್ಗದವರು ಉಪಸ್ಥಿತರಿದ್ದರು.