ಮುಂಬೈ, ಜುಲೈ 9 :ನಾಂದೇಡ್–ಮುಂಬೈ ನಂದಿಗ್ರಾಮ್ ಎಕ್ಸ್‌ಪ್ರೆಸ್‌ನ ಫಸ್ಟ್ ಎಸಿ ಬೋಗಿಯಲ್ಲಿ ನವವಿವಾಹಿತ ದಂಪತಿಗಾಗಿ ಯಾವುದೇ ಅಧಿಕೃತ ಅನುಮತಿಯಿಲ್ಲದೆ ಹೂವಿನ ಅಲಂಕಾರ ಮಾಡಿಸಿದ ಪ್ರಕರಣಕ್ಕೆ ಸಂಬಂಧಿಸಿ ಭಾರತೀಯ ರೈಲ್ವೆ ಮುಖ್ಯ ಟಿಕೆಟ್ ಪರಿಶೀಲಕ (ಸಿಟಿಐ) ಅವರನ್ನು ಅಮಾನತುಗೊಳಿಸಿದ್ದು, ಇಲಾಖಾ ತನಿಖೆಗೆ ಆದೇಶಿಸಿದೆ ಎಂದು ರೈಲ್ವೆ ಮೂಲಗಳು ಗುರುವಾರ ತಿಳಿಸಿವೆ.

ಫಸ್ಟ್ ಎಸಿ ಬೋಗಿಯ ಖಾಸಗಿ ವಿಭಾಗವನ್ನು ಹೂವುಗಳು, ಬಲೂನುಗಳು, ಗುಲಾಬಿ ಹೂವಿನ ದಳಗಳು ಹಾಗೂ ಅಲಂಕಾರಿಕ ದೀಪಗಳಿಂದ ಸಿಂಗರಿಸಿರುವ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ಬಳಿಕ ಈ ಘಟನೆ ಬೆಳಕಿಗೆ ಬಂದಿದೆ. ಈ ಘಟನೆ ಪ್ರೀಮಿಯಂ ಬೋಗಿಗಳಲ್ಲಿನ ಭದ್ರತೆ ಹಾಗೂ ಪ್ರವೇಶ ನಿಯಂತ್ರಣದ ಬಗ್ಗೆ ಪ್ರಶ್ನೆಗಳನ್ನು ಎಬ್ಬಿಸಿದೆ.

ರೈಲ್ವೆ ಅಧಿಕಾರಿಗಳ ಪ್ರಕಾರ, ಈ ಘಟನೆ ಜುಲೈ 6ರಂದು ರೈಲು ಸಂಖ್ಯೆ 11002 ನಂದಿಗ್ರಾಮ್ ಎಕ್ಸ್‌ಪ್ರೆಸ್‌ನಲ್ಲಿ ನಡೆದಿದೆ. ಛತ್ರಪತಿ ಸಂಭಾಜಿನಗರದಿಂದ ಮುಂಬೈಗೆ ಪ್ರಯಾಣಿಸುತ್ತಿದ್ದ ನವವಿವಾಹಿತ ದಂಪತಿ ಫಸ್ಟ್ ಎಸಿ ‘ಜಿ’ ಬೋಗಿಯ 19 ಮತ್ತು 20ನೇ ಬರ್ತ್‌ಗಳನ್ನು ಕಾಯ್ದಿರಿಸಿದ್ದರು.

ಪ್ರಾಥಮಿಕ ತನಿಖೆಯಲ್ಲಿ, ದಂಪತಿ ಜಾಲ್ನಾ ಮೂಲದ ‘ರಾಹತ್ ಡೆಕೊರೇಟರ್’ ಸಂಸ್ಥೆಯನ್ನು ಆನ್‌ಲೈನ್ ಮೂಲಕ ಸಂಪರ್ಕಿಸಿ ತಮ್ಮ ಮದುವೆಯ ಮೊದಲ ರಾತ್ರಿಗಾಗಿ ಬೋಗಿಯನ್ನು ಅಲಂಕರಿಸಲು ವ್ಯವಸ್ಥೆ ಮಾಡಿದ್ದರು ಎಂಬುದು ತಿಳಿದುಬಂದಿದೆ. ಸಂಸ್ಥೆಯೊಂದಿಗಿನ ವ್ಯಕ್ತಿಯೊಬ್ಬರು ಜಾಲ್ನಾ ನಿಲ್ದಾಣದಲ್ಲಿ ರೈಲಿಗೆ ಏರಿ, ರೈಲು ಸಂಚರಿಸುತ್ತಿರುವಾಗಲೇ ಅಲಂಕಾರವನ್ನು ಪೂರ್ಣಗೊಳಿಸಿದ್ದಾನೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಬೋಗಿಯನ್ನು ಅಲಂಕರಿಸಲು ಅಥವಾ ಖಾಸಗಿ ವ್ಯಕ್ತಿಗೆ ಫಸ್ಟ್ ಎಸಿ ಬೋಗಿಗೆ ಪ್ರವೇಶ ನೀಡಲು ರೈಲ್ವೆಯಿಂದ ಯಾವುದೇ ಅನುಮತಿ ಪಡೆಯಲಾಗಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಈ ಘಟನೆ ಮೀಸಲು ಬೋಗಿಗಳ ಭದ್ರತೆ ಹಾಗೂ ಪ್ರವೇಶಕ್ಕೆ ಸಂಬಂಧಿಸಿದ ನಿಯಮಾವಳಿಗಳ ಉಲ್ಲಂಘನೆಯಾಗಿ ಪರಿಗಣಿಸಲಾಗಿದೆ.

ಘಟನೆಯ ವೇಳೆ ಕರ್ತವ್ಯದಲ್ಲಿದ್ದ ಮುಖ್ಯ ಟಿಕೆಟ್ ಪರಿಶೀಲಕರನ್ನು ಇಲಾಖಾ ತನಿಖೆ ಪೂರ್ಣಗೊಳ್ಳುವವರೆಗೆ ಅಮಾನತುಗೊಳಿಸಲಾಗಿದೆ.

ಈ ಪ್ರಕರಣದಲ್ಲಿ ಹೊಣೆಗಾರಿಕೆ ನಿಗದಿಪಡಿಸುವುದು, ಪ್ರಮಾಣಿತ ಕಾರ್ಯವಿಧಾನಗಳು (SOP) ಉಲ್ಲಂಘನೆಯಾಗಿದೆಯೇ ಎಂಬುದನ್ನು ಪರಿಶೀಲಿಸುವುದು ಹಾಗೂ ತನಿಖೆಯ ವರದಿ ಆಧರಿಸಿ ಮುಂದಿನ ಶಿಸ್ತು ಕ್ರಮವನ್ನು ಶಿಫಾರಸು ಮಾಡುವ ಉದ್ದೇಶದಿಂದ ಇಲಾಖಾ ತನಿಖೆ ನಡೆಯಲಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.