ಮಂಗಳೂರು, ಜ 31, ಮಂಗಳೂರು ನಗರದ  ದೀರ್ಘಕಾಲದ  ಬಾಕಿ ಉಳಿದುಕೊಂಡಿದ್ದ  ಪಂಪ್ ವೆಲ್  ಮೇಲ್ಸೇತುವೆ ಯನ್ನು  ಜಿಲ್ಲಾಉಸ್ತುವಾರಿ ಸಚಿವ ಕೊಟಾ ಶ್ರೀನಿವಾಸ ಪೂಜಾರಿ ಹಾಗೂ ಸಂಸದ  ನಳಿನ್ ಕುಮಾರ್  ಶುಕ್ರವಾರ  ಉದ್ಘಾಟಿಸಿದರು. ಶಾಸಕರುಗಳಾದ   ವೇದವ್ಯಾಸ ಕಾಮತ್,  ಭರತ್ ಶೆಟ್ಟಿ  ಈ ಸಂದರ್ಭದಲ್ಲಿ  ಉಪಸ್ಥಿತರಿದ್ದರು.ಬಹುತೇಕ 10 ವರ್ಷಗಳ   ವಿಳಂಬ,  ಒಂದರ ನಂತರ  ಒಂದರಂತೆ   ಹಲವು  ಅಂತಿಮ ಗಡುವುಗಳು ಮುಗಿದ ನಂತರ   ರಾಷ್ಟ್ರೀಯ  ಹೆದ್ದಾರಿ 66ರ  ತಲಪಾಡಿ- ಕುಂದಾಪುರ  ನಡುವಣ  ನಾಲ್ಕು ಪಥ  ಮಾರ್ಗದ ಭಾಗವಾಗಿ  ಪಂಪ್ ವೆಲ್  ಮೇಲ್ಸೇತುವೆ  ಕೊನೆಗೆ ಶುಕ್ರವಾರ  ಸಾರ್ವಜನಿಕರ ಸೇವೆಗೆ ಲೋಕಾರ್ಪಣೆಗೊಂಡಿತು.  ನಂತೂರು-  ಎನ್ ಐ ಟಿ ಕೆ   ಸರತ್ಕಲ್   ಮಾರ್ಗ  ಹೊರತುಪಡಿಸಿ, ರಾಷ್ಟ್ರೀಯ ಹೆದ್ದಾರಿ 66 ತಲಪಾಡಿ- ಕುಂದಾಪುರ ನಡುವಣ  ನಾಲ್ಕುಪಥ ಮಾರ್ಗದ ಕಾಮಗಾರಿ  2010 ಸೆಪ್ಟಂಬರ್ ನಲ್ಲಿ  ಆರಂಭಗೊಂಡಿತ್ತು,   ಪಂಪ್ ವೆಲ್ (ಮಹಾ ವೀರ ಸರ್ಕಲ್)  ಮೇಲ್ಸೇತುವೆ  ಈ ಯೋಜನೆಯ ಭಾಗವಾಗಿತ್ತು.