ಲೋಕದರ್ಶನ ವರದಿ 

ಬೆಳಗಾವಿ 18: ಅಂಗವೈಕಲ್ಯ ಎನ್ನುವುದು ಸಾಮರ್ಥ್ಯದ ಕೊರತೆಯಲ್ಲ ಬದಲಿಗೆ ಸಮಾನ ಅವಕಾಶಗಳ ಕೊರತೆ, ಆದ್ದರಿಂದ ವಿಶೇಷ ಚೇತನರಿಗೆ ಸಮಾನ ಅವಕಾಶಗಳನ್ನು ಕಲ್ಪಿಸಿ, ನಮ್ಮ ಚಿಂತನೆ, ಬದಲಾವಣೆ ಮತ್ತು ಮಾನವೀಯತೆಯನ್ನು ಜಾಗೃತಗೊಳಿಸಬೇಕು ಎಂದು ದಿವ್ಯಾಂಗ ಅಧಿಕಾರಿ ಸಂಘದ ರಾಜ್ಯಾಧ್ಯಕ್ಷ ಮತ್ತು ಪ್ರಾಧ್ಯಾಪಕ ರಾಜು ಶಲವಾದಿ ಮಾತನಾಡಿ ಹೇಳಿದರು.  

ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯದ ದಿವ್ಯಾಂಗ ಸಬಲೀಕರಣ ಕೋಶ, ಅಂತರಾಷ್ಟ್ರೀಯ ದಿವ್ಯಾಂಗ ದಿನದ ಪ್ರಯುಕ್ತ, ಕುವೆಂಪು ಸಭಾಂಗಣದಲ್ಲಿ ಬುಧವಾರದಂದು ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ  ಅವರು ಮಾತನಾಡಿದರು.  

ಕಾರ್ಯಕ್ರಮದ ಮುಖ್ಯ ಅತಿಥಿಯಾಗಿ ಭಾಗವಹಿಸಿ ಮಾತನಾಡಿದ ಅವರು ವಿಶ್ವವಿದ್ಯಾಲಯದ ವಿಧ್ಯಾರ್ಥಿಗಳು ವಿಶೇಷ ಚೇತನರನ್ನು ಬೆಂಬಲಿಸಿ ಮಾನವೀಯ ಮೌಲ್ಯಗಳನ್ನು ಅಳವಡಿಸಿಕೊಳ್ಳಬೇಕು ಎಂದು ಹೇಳಿದರು.  

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ ಮಾನ್ಯ ಕುಲಪತಿಗಳಾದ ಪ್ರೊ. ಸಿ. ಎಂ. ತ್ಯಾಗರಾಜ ಮಾತನಾಡಿ ವಿಧ್ಯಾರ್ಥಿಗಳು ತಮ್ಮಲ್ಲಿರುವ ಶಕ್ತಿಯನ್ನು ಗುರುತಿಸಿ ಸಾಧನೆಯ ಪಯಣದತ್ತ ಸಾಗಬೇಕು. ವಿಶ್ವವಿದ್ಯಾಲಯ ಸದಾ ವಿಶೇಷ ಚೇತನರೊಂದಿಗೆ ಇರುತ್ತದೆ ಎಂದು ಆಶ್ವಾಸನೆ ನೀಡಿದರು.  

ಕಾರ್ಯಕ್ರಮದಲ್ಲಿ ಕ್ರೀಡಾ ಕ್ಷೇತ್ರದಲ್ಲಿ ಸಾಧನೆಗೈದ ವಿಶ್ವವಿದ್ಯಾಲಯದ ವಿಶೇಷ ಚೇತನರಿಗೆ ಸನ್ಮಾನಿಸಲಾಯಿತು ಮತ್ತು ಸ್ನಾತಕೋತ್ತರ ಅಂಗವೈಕಲ್ಯ ವಿಧ್ಯಾರ್ಥಿಗಳಿಗೆ ಲ್ಯಾಪ್ ಟಾಪ್ ಮತ್ತು ವೀಲ್ ಚೇರ್ ವಿತರಿಸಲಾಯಿತು. ಕಾರ್ಯಕ್ರಮದಲ್ಲಿ ಕುಲಸಚಿವರಾದ ಸಂತೋಷ ಕಾಮಗೌಡ,  ಹಣಕಾಸು ಅಧಿಕಾರಿ ಎಂ. ಏ. ಸಪ್ನ, ದಿವ್ಯಾಂಗ ಸಬಲೀಕರಣ ಕೋಶದ ಸಂಯೋಜಕಿ ಹಾಗೂ ಸದಸ್ಯೆ ಡಾ.ಮಧುಶ್ರೀ ಕಲ್ಲಿಮನಿ ಸೇರಿದಂತೆ ಪ್ರಾಧ್ಯಾಪಕರು, ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿ ವರ್ಗ ಮತ್ತು ವಿಧ್ಯಾರ್ಥಿಗಳು ಉಪಸ್ಥಿತರಿದ್ದರು.