ಖಾಲಿ ಹುದ್ದೆಗಳ ನೇಮಕ ಶೀಘ್ರವಾಗಿಸಲು ಪ್ರತಿಭಟನೆ  

ರಬಕವಿ-ಬನಹಟ್ಟಿ 04: ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳು ಖಾಲಿ ಇರುವ ಹುದ್ದೆಗಳನ್ನು ನೇಮಕ ಮಾಡಿಕೊಳ್ಳದೇ ಇರುವುದರಿಂದ ಪ್ರತಿ ವರ್ಷ ನಿರುದ್ಯೋಗಿಗಳ ಸೃಷ್ಠಿಯಾಗುತ್ತಿದೆ. ದೇಶ ಹಾಗೂ ರಾಜ್ಯದ ಜನತೆಯ ಸೇವಾ ಕಾರ್ಯಗಳು ಅಬಾಧಿತವಾಗಿ ಜನಸಾಮಾನ್ಯರಿಗೆ ದೊರೆಯಲು ಪ್ರತಿ ವರ್ಷ ನೇಮಕಾತಿಗಳು ನಿಯಮಿತವಾಗಿ ನಡೆದಲ್ಲಿ ನಾಗರಿಕರಿಗೂ ಅನುಕೂಲವಾಗುವ ಜೊತೆಗೆ ಕೆಂಭೂತವಾಗಿರುವ ನಿರುದ್ಯೋಗ ಸಮಸ್ಯೆಗೂ ಮುಕ್ತಿಯಾಗುತ್ತದೆಂದು ಬನಹಟ್ಟಿಯ ಜಿ.ಎಸ್‌.ಕೋಚಿಂಗ್ ಸೆಂಟರ್ ಮುಖ್ಯಸ್ಥ ಸಂಗಮೇಶ ಉಪ್ಪಾರ ಆಗ್ರಹಿಸಿದರು. 

ಬನಹಟ್ಟಿ ನಗರದ ಪ್ರಮುಖ ಬೀದಿಗಳಲ್ಲಿ ಘೋಷಣೆ ಕೂಗುತ್ತ ಮೆರವಣಿಗೆ ಮೂಲಕ ಸಾಗಿದ ನೂರಾರು ವಿದ್ಯಾರ್ಥಿಗಳು ತಹಶೀಲ್ದಾರ ಕಚೇರಿ ಎದುರು ಮಾತನಾಡಿ ಆಗ್ನಿವೀರ ನೇಮಕಾತಿಯಲ್ಲಿ ಮೊದಲಿದ್ದ ವಯೋಮಿತಿ ಸಡಿಲಿಕೆಗೊಳಿಸುವುದಾಗಿ ಹೇಳಿದ್ದ ಮಾತು ಇನ್ನೂ ಜಾರಿಯಾಗದ ಕಾರಣ ಸೈನಿಕರಾಗಿ ದೇಶಸೇವೆ ಮಾಡುವ ಕನಸು ಕಾಣುತ್ತಿರುವ ಯುವಕರು ಅವಕಾಶವಿಲ್ಲದೇ ನಿರಾಶರಾಗಿ, ಮಾನಸಿಕವಾಗಿ ಕುಗ್ಗುತ್ತಿದ್ದಾರೆ. ವಯೋಮಿತಿ ಸಡಿಲಿಕೆ ಜೊತೆಗೆ ನಿಯಮಿತ ನೇಮಕಾತಿ ನಡೆದಲ್ಲಿ ನಿರುದ್ಯೋಗ ಸಮಸ್ಯೆಗೆ ಮುಕ್ತಿ ಹೇಳಲು ಸಾಧ್ಯವೆಂದರು. ತಹಶೀಲ್ದಾರ ಗೀರೀಶ ಸ್ವಾದಿ ಪ್ರತಿಭಟನಾಕಾರರಿಂದ ಮನವಿ ಸ್ವೀಕರಿಸಿದರು. 

ಪಿಎಸ್ಸೈ ಶಾಂತಾ ಹಳ್ಳಿ, ವಿಠಲ ಉಪ್ಪಾರ, ಬಸವರಾಜ ಭೂತಾಳಿ, ಮಹಾದೇವ ಬಂಗಿ ಮೊದಲಾದವರಿದ್ದರು.