ರಾಯಬಾಗ, 15 : ಕನ್ನಡ ಭಾಷೆಯನ್ನು ಉಳಿಸಿ ಬೆಳೆಸಬೇಕಾಗಿರುವುದು ನಮ್ಮೆಲ್ಲರ ಆದ್ಯ ಕರ್ತವ್ಯವಾಗಿದೆ ಎಂದು ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಗೌರವ ಕಾರ್ಯದರ್ಶಿ ಟಿ. ಎಸ್‌. ವಂಟಗೂಡಿ ಹೇಳಿದರು.  

ಇತ್ತೀಚಿಗೆ ತಾಲೂಕಿನ ಹಿಡಕಲ ಗ್ರಾಮದಲ್ಲಿ ತಾಲೂಕಾ ಕನ್ನಡ ಸಾಹಿತ್ಯ ಪರಿಷತ್ತ ಹಾಗೂ ಕವಿರತ್ನ ಕಾಳಿದಾಸ ಕನ್ನಡ ಮಾಧ್ಯಮ ಪ್ರಾಥಮಿಕ ಶಾಲೆ ಮತ್ತು ಬೀರೇಶ್ವರ ಪ್ರೌಢಶಾಲೆ ಹಿಡಕಲ ಇವರ ಸಂಯುಕ್ತ ಆಶ್ರಯದಲ್ಲಿ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದ ಪ್ರಯುಕ್ತವಾಗಿ ಪೂರ್ವಭಾವಿಯಾಗಿ ಹಮ್ಮಿಕೊಂಡಿದ್ದ ಕನ್ನಡದ ಕಂಪು ಶೀರ್ಷಿಕೆ ಅಡಿಯಲ್ಲಿ ಕನ್ನಡ ಜಾಗೃತಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಹಾರೂಗೇರಿಯ ಜೈನ ದಿಗಂಬರ ಮಹಾವೀರ ಕಲ್ಯಾಣ ಮಂಟಪದಲ್ಲಿ ಜ.10 ಮತ್ತು11 ರಂದು ವಿಮರ್ಶಕ ಡಾ. ವಿ. ಎಸ್‌. ಮಾಳಿಯವರ ಸರ್ವಾಧ್ಯಕ್ಷತೆಯಲ್ಲಿ 17ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನ ಜರುಗಲಿದೆ ಎಂದು ತಿಳಿಸಿದರು.

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಬೀರದೇವ ಬಿಳಗಿ ವಹಿಸಿಕೊಂಡಿದ್ದರು. ಪ್ರೌಢಶಾಲೆ ಮುಖ್ಯೋಪಾಧ್ಯಾಯ ಎಸ್‌. ಡಿ. ಹೊಸಟ್ಟಿ, ಮುಖ್ಯ ಶಿಕ್ಷಕ ಬಿ. ಎಸ್‌. ತಡಸಲೂರು, ಚುಟುಕು ಸಾಹಿತಿ ಡಿ. ಎಂ. ಕೋಳಿ, ಎಂ. ಐ. ಪಾಟೀಲ, ಸಿ. ಎಸ್‌. ಮಾಂಗ್, ಎಂ. ಎಸ್‌. ಕರಿಗಾರ, ಎ. ಆರ್‌. ಕುರುಬೆಟ  ದೈಹಿಕ ಶಿಕ್ಷಕ ಸದಾಶಿವ ಭಾಗಿ, ಎಸ್‌. ಎ. ಬಾಗಿ, ಎ. ಎಸ್‌. ಜಮಖಂಡಿ, ಆರ್‌. ಡಿ. ಲಾಂಡಗೆ, ಸಿ. ಎಸ್‌. ಗಾಣಿಗೇರ ಸೇರಿ ಅನೇಕರು ಇದ್ದರು.