ಲೋಕದರ್ಶನ ವರದಿ  

ಇಂಡಿ 29 : ಮಹಾರಾಷ್ಟ್ರದ ಉಜನಿ ಹಾಗೂ ವೀರ್ ಜಲಾಶಯದಿಂದ ಇಂದು ಬೆಳಿಗ್ಗೆ ಎಂಟು ಗಂಟೆಗೆ 59000 ಸಾವಿರ ಕ್ಯೂಸೆಕ್ ನೀರು ಬಿಡುಗಡೆ ಮಾಡಲಾಗಿದೆ. ಈಗ ತಾನೇ ಕರ್ನಾಟಕದ ಭೀಮಾ ನದಿಯ ದಡದಲ್ಲಿ ಇರುವ ಗೋವಿಂದಪೂರ  ಬಳಿ ಈಗ ಸುಮಾರು 31000 ಸಾವಿರ  ಕ್ಯೂಸೆಕ್ ನೀರು ಹರಿದು ಬರುತ್ತಿದೆ.  ಎರಡು ದಿನಗಳ ಹಿಂದೆ  ಭೀಮಾ ನದಿಗೆ ಒಟ್ಟು ಎರಡು ಹಂತಗಳಲ್ಲಿ 62600 ಕ್ಯೂಸೆಕ್ ನೀರು ಬಿಡಲಾಗಿದೆ.  ಮಳೆಗಾಲ ಆರಂಭವಾದ ಬಹುತೇಕ ಎರಡು ತಿಂಗಳ ಬಳಿಕ ಇದೇ ಮೊದಲ ಬಾರಿಗೆ ಜಲಾಶಯದಿಂದ ಭೀಮಾನದಿಗೆ ನೀರು ಹರಿಬಿಡಲಾಗಿದೆ.  ಮಹಾರಾಷ್ಟ್ರದ ಉಜನಿ ಹಾಗೂ ವೀರ್ ಜಲಾಶಯ ಮುಖಾಂತರ  ಸೋಮವಾರ ಮಧ್ಯಾಹ್ನ 3 ಗಂಟೆಗೆ 62 ಸಾವಿರ ಕ್ಯೂಸೆಕ್ ನೀರು ನದಿಗೆ ಬಿಡಲಾಗಿದೆ. 

ಈಗಾಗಲೇ ಬಿಟ್ಟಿರುವ  ನೀರು ಇಂಡಿ ತಾಲ್ಲೂಕಿನ ದೂಳಖೇಡ, ಹಿಂಗಣಿ, ಅಗರಖೇಡ, ಮಣ್ಣೂರ, ರೋಡಗಿ, ಮಿರಗಿ ಗ್ರಾಮಗಳನ್ನು ದಾಟಿದೆ ಎಂದು ಇಂಡಿ ತಹಶೀಲದಾರ ನಾಗೇಂದ್ರ ಕೋಳಶೆಟ್ಟಿ ತಿಳಿಸಿದ್ದಾರೆ.  ಮಹಾರಾಷ್ಟ್ರದಲ್ಲಿ ನದಿ ಅಚ್ಚುಕಟ್ಟು ಪ್ರದೇಶದಲ್ಲಿ ಉತ್ತಮ ಮಳೆ ಸುರಿಯುತ್ತಿದ್ದು, ಭೀಮಾನದಿಗೆ ಬಿಡುವ ನೀರಿನ ಪ್ರಮಾಣ ಇನ್ನೂ ಹೆಚ್ಚಾಗುವ ಸಾಧ್ಯತೆಯಿದೆ. ಕಾರಣ ಯಾರು ನದಿಯ ದಂಡೆಗೆ ಹೋಗಬಾರದು, ರೈತರ ವಿದ್ಯುತ್ ಪಂಪ್ ಸೆಟ್ ಗಳ ಬಗ್ಗೆ ಕಾಳಜಿ ವಹಿಸಬೇಕು ಹಾಗೂ ಜನರು ನದಿಗೆ ಇಳಿಯಬಾರದು ಎಂದು  ಇಂಡಿ ತಶೀಲದಾರ ನಾಗೇಂದ್ರ ಕೋಳಶೆಟ್ಟಿ ಅವರು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.