ಇಂಫಾಲ್, ಆಗಸ್ಟ್ 14 : ಮಣಿಪುರದ ಇಂಫಾಲ್–ತಮೇಯಿ ರಸ್ತೆಯಲ್ಲಿರುವ ಲಾಂಗ್ಕಾ ನಾಗಾ ಗ್ರಾಮದ ಸಮೀಪ ಭತ್ತದ ಗದ್ದೆಯಲ್ಲಿ ಕೆಲಸ ಮಾಡುತ್ತಿದ್ದ ರೈತರ ಮೇಲೆ ಶಸ್ತ್ರಸಜ್ಜಿತ ದುಷ್ಕರ್ಮಿಗಳು ಗುಂಡಿನ ದಾಳಿ ನಡೆಸಿದ ಪರಿಣಾಮ ಓರ್ವ ನಾಗಾ ನಾಗರಿಕ ಮೃತಪಟ್ಟಿದ್ದು, ಮೂವರು ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಶುಕ್ರವಾರ ಗ್ರಾಮಸ್ಥರು ತಮ್ಮ ಕೃಷಿ ಜಮೀನುಗಳಿಗೆ ತೆರಳಿ ಕೆಲಸ ಮಾಡುತ್ತಿದ್ದ ವೇಳೆ ಈ ಘಟನೆ ನಡೆದಿದೆ ಎಂದು ವರದಿಯಾಗಿದೆ. ದಾಳಿಕೋರರು ಭಾರೀ ಪ್ರಮಾಣದಲ್ಲಿ ಶಸ್ತ್ರಸಜ್ಜಿತರಾಗಿದ್ದು, ಅವರ ಸಂಖ್ಯೆ 40ಕ್ಕೂ ಅಧಿಕವಾಗಿತ್ತು ಎಂದು ರೈತರು ತಿಳಿಸಿದ್ದಾರೆ.

ಮೃತರನ್ನು ಡಬ್ಲ್ಯೂ. ಚಾವಾಂಗ್ ಎಂದು ಗುರುತಿಸಲಾಗಿದೆ. ಗಾಯಗೊಂಡಿರುವ ಕವಿಡಿನಾಂಗ್ ಅಬೋನ್ಮೈ, ಮಾಲಿಯಾಂಗ್ಜಿನಾಂಗ್ ಅಬೋನ್ಮೈ ಮತ್ತು ನಾಮ್ಥಿಯುಲುಂಗ್‌ಬೌ ಪ್ರಿನ್ಮೈ ಅವರನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಈ ದಾಳಿಯಿಂದ ಲಾಂಗ್ಕಾ ನಾಗಾ ಮತ್ತು ಇಂಫಾಲ್–ತಮೇಯಿ ಮಾರ್ಗದ ಸುತ್ತಮುತ್ತಲಿನ ಗ್ರಾಮಗಳ ನಿವಾಸಿಗಳಲ್ಲಿ ಆತಂಕ ಹೆಚ್ಚಾಗಿದೆ.

ಘಟನೆ ಕುರಿತು ಮಣಿಪುರ ಪೊಲೀಸರು ಇನ್ನೂ ಅಧಿಕೃತ ಹೇಳಿಕೆ ನೀಡಿಲ್ಲ.