ಯವತ್ಮಾಳ (ಮಹಾರಾಷ್ಟ್ರ), ಜುಲೈ 31: ಮಹಾರಾಷ್ಟ್ರದ ಯವತ್ಮಾಳ ಜಿಲ್ಲೆಯಲ್ಲಿ ಗುರುವಾರ ತಡರಾತ್ರಿ ಪ್ರವಾಹದ ನೀರಿನ ಹರಿವಿನಲ್ಲಿ ಕಾರು ಕೊಚ್ಚಿಹೋಗಿ 42 ವರ್ಷದ ಮಹಿಳೆ ಹಾಗೂ ಆಕೆಯ ಇಬ್ಬರು ಪುತ್ರಿಯರು ಮೃತಪಟ್ಟಿದ್ದು, ಕಾರು ಚಲಾಯಿಸುತ್ತಿದ್ದ ಮಹಿಳೆಯ ಪತಿ ಅದೃಷ್ಟವಶಾತ್ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮೃತರನ್ನು ಲೋನಿ (ಆರ್ನಿ ತಹಶೀಲ) ನಿವಾಸಿಗಳಾದ ಮಾಧವಿ ಖಂಡಾರೆ (42), ಸಚಿ ಖಂಡಾರೆ (17) ಮತ್ತು ಪ್ರಾಚಿ ಖಂಡಾರೆ (11) ಎಂದು ಗುರುತಿಸಲಾಗಿದೆ. ಮಾಧವಿಯ ಪತಿ ಅವಿನಾಶ್ ಖಂಡಾರೆ ಮಾತ್ರ ಮರವನ್ನು ಹಿಡಿದುಕೊಂಡು ಜೀವ ಉಳಿಸಿಕೊಂಡಿದ್ದಾರೆ.

ಅಧಿಕಾರಿಗಳ ಮಾಹಿತಿ ಪ್ರಕಾರ, ಖಂಡಾರೆ ಕುಟುಂಬ ಗುರುವಾರ ರಾಳೇಗಾಂವ್‌ನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಲು ತೆರಳಿತ್ತು. ಬಳಿಕ ಬೋರಿ ಅರಬ್‌ನಲ್ಲಿ ತಮ್ಮ ಸಂಬಂಧಿಕರನ್ನು ಇಳಿಸಿದ ನಂತರ ಮಧ್ಯರಾತ್ರಿ ಸುಮಾರಿಗೆ ಎರ್ಟಿಗಾ ಕಾರಿನಲ್ಲಿ ದಾರ್ವಾ ಮಾರ್ಗವಾಗಿ ಲೋನಿಗೆ ಹೊರಟಿತ್ತು.

ದಾರ್ವಾ ತಹಶೀಲದ ದಹಿಲಿ ಗ್ರಾಮದ ಸಮೀಪ ಕುಪ್ತಿ ನದಿಯ ಮೇಲಿನ ಸೇತುವೆಯನ್ನು ದಾಟುವ ವೇಳೆ ಸೇತುವೆಯ ಮೇಲೆ ಭಾರೀ ಪ್ರಮಾಣದ ಪ್ರವಾಹದ ನೀರು ಹರಿಯುತ್ತಿತ್ತು. ಈ ವೇಳೆ ಕಾರು ನೀರಿನಲ್ಲಿ ಸಿಲುಕಿಕೊಂಡಿತು. ಪರಿಸ್ಥಿತಿ ಗಂಭೀರವಾಗಿರುವುದನ್ನು ಅರಿತ ಅವಿನಾಶ್ ಮತ್ತು ಮಾಧವಿ ಮೊಬೈಲ್ ಫೋನ್ ಮೂಲಕ ಸಂಬಂಧಿಕರು ಹಾಗೂ ಸ್ನೇಹಿತರಿಗೆ ಕರೆ ಮಾಡಿ ತಕ್ಷಣ ನೆರವು ಕೋರಿದರು. ಆದರೆ ಕೆಲವೇ ಕ್ಷಣಗಳಲ್ಲಿ ಪ್ರವಾಹದ ಪ್ರಬಲ ಹರಿವು ಕಾರು ಸಮೇತ ಕುಟುಂಬವನ್ನು ಕೊಚ್ಚಿಕೊಂಡು ಹೋಯಿತು.

ಅವಿನಾಶ್ ಹೇಗೋ ಕಾರಿನಿಂದ ಹೊರಬಂದು ಸಮೀಪದ ಮರವೊಂದನ್ನು ಹಿಡಿದು ಏರಿ ಸಹಾಯಕ್ಕಾಗಿ ಕೂಗಿದರು. ಅವರ ಕೂಗು ಕೇಳಿದ ಸ್ಥಳೀಯರು ಹಾಗೂ ರಕ್ಷಣಾ ಸಿಬ್ಬಂದಿ ಸ್ಥಳಕ್ಕೆ ಧಾವಿಸಿ ಶುಕ್ರವಾರ ಬೆಳಗ್ಗೆ ಸುಮಾರು 4 ಗಂಟೆಗೆ ಅವರನ್ನು ಸುರಕ್ಷಿತವಾಗಿ ರಕ್ಷಿಸಿದರು. ಬಳಿಕ ಅವರನ್ನು ಚಿಕಿತ್ಸೆಗಾಗಿ ದಾರ್ವಾ ಗ್ರಾಮೀಣ ಆಸ್ಪತ್ರೆಗೆ ದಾಖಲಿಸಲಾಯಿತು.

ಪ್ರವಾಹದ ನೀರಿಗೆ ಕೊಚ್ಚಿಹೋಗಿದ್ದ ಎರ್ಟಿಗಾ ಕಾರು ಶುಕ್ರವಾರ ಮಧ್ಯಾಹ್ನ ಸುಮಾರು 12 ಗಂಟೆಗೆ ಘಟನೆ ನಡೆದ ಸ್ಥಳದಿಂದ 200 ರಿಂದ 300 ಮೀಟರ್ ದೂರದಲ್ಲಿ ಪತ್ತೆಯಾಯಿತು. ಕಾರಿನೊಳಗೆ ಮಾಧವಿ ಹಾಗೂ ಅವರ ಇಬ್ಬರು ಪುತ್ರಿಯರ ಮೃತದೇಹಗಳು ಪತ್ತೆಯಾಗಿದ್ದು, ರಕ್ಷಣಾ ಸಿಬ್ಬಂದಿ ಮತ್ತು ಗ್ರಾಮಸ್ಥರ ನೆರವಿನಿಂದ ಅವುಗಳನ್ನು ಹೊರತೆಗೆದು ಮರಣೋತ್ತರ ಪರೀಕ್ಷೆಗಾಗಿ ಕಳುಹಿಸಲಾಯಿತು.

ಪ್ರಾಥಮಿಕ ಮಾಹಿತಿಯ ಪ್ರಕಾರ, ಮನೆಗೆ ಹಿಂದಿರುಗುವ ವೇಳೆ ಸೇತುವೆಯ ಮೇಲಿದ್ದ ನೀರಿನ ಆಳ ಮತ್ತು ಹರಿವಿನ ತೀವ್ರತೆಯನ್ನು ಕುಟುಂಬ ಸರಿಯಾಗಿ ಅಂದಾಜಿಸಲು ವಿಫಲವಾಗಿತ್ತು.

ಮೂಲಗಳ ಪ್ರಕಾರ, ಘಟನೆ ನಡೆದ ಸೇತುವೆಗೆ ರಕ್ಷಣಾ ತಡೆಗೋಡೆ (ರೇಲಿಂಗ್) ಇರಲಿಲ್ಲ. ಪ್ರವಾಹದಿಂದ ರಸ್ತೆ ಮುಚ್ಚಲಾಗಿದ್ದರೂ ಸಮರ್ಪಕ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಳ್ಳಲಾಗಿರಲಿಲ್ಲ. ಅಲ್ಲದೆ ರಸ್ತೆ ಕಾಮಗಾರಿ ನಡೆಯುತ್ತಿದ್ದರೂ ಸಂಬಂಧಿತ ಗುತ್ತಿಗೆದಾರರು ಎಚ್ಚರಿಕೆ ಫಲಕಗಳು ಹಾಗೂ ದಿಕ್ಕು ಸೂಚನಾ ಫಲಕಗಳನ್ನು ಅಳವಡಿಸಿರಲಿಲ್ಲ ಎಂಬ ಆರೋಪವೂ ಕೇಳಿಬಂದಿದೆ.

ಭಾರೀ ಮಳೆಯಿಂದ ವಿದರ್ಭ ಪ್ರದೇಶದ ಹಲವು ಭಾಗಗಳಲ್ಲಿ ನದಿಗಳು ಮತ್ತು ಹಳ್ಳಗಳು ಉಕ್ಕಿ ಹರಿಯುತ್ತಿದ್ದು, ರಸ್ತೆ ಸಂಪರ್ಕಕ್ಕೆ ಅಡ್ಡಿಯುಂಟಾಗಿ ಜನಜೀವನ ಅಸ್ತವ್ಯಸ್ತವಾಗಿದೆ. ಮಳೆಗಾಲದಲ್ಲಿ ನೀರು ಹರಿಯುತ್ತಿರುವ ರಸ್ತೆಗಳು ಮತ್ತು ಸೇತುವೆಗಳ ಮೂಲಕ ಸಂಚರಿಸದಂತೆ ಅಧಿಕಾರಿಗಳು ಸಾರ್ವಜನಿಕರಿಗೆ ಮನವಿ ಮಾಡಿದ್ದಾರೆ.