ರಾಣೇಬೆನ್ನೂರು 24: ರೋಟರಿ ಅಂತರಾಷ್ಟ್ರೀಯ ಸೇವಾ ಸಂಸ್ಥೆಯು, ತನ್ನ ಸಾಮಾಜಿಕ ಬದ್ಧತೆಯೊಂದಿಗೆ, ರೋಟರಿ ಸಂಸ್ಥೆಯ ವಿವಿಧ ಉದ್ದೇಶಗಳನ್ನು ಜಾರಿಗೆ ತರುವುದರ  ಮೂಲಕ ಸಮಾಜದಲ್ಲಿ ಉತ್ತಮ ಜನಪರ  ಕಾರ್ಯಗಳನ್ನು ಮಾಡುವುದರ ಮೂಲಕ ಸಂಸ್ಥೆ ಜನ ಮನ್ನಣೆ ಗಳಿಸುತ್ತಿರುವುದು ಎಲ್ಲರಿಗೂ ಸಂತೋಷದ ಸಂಗತಿಯಾಗಿದೆ ಎಂದು ರೋಟರಿ ಅಧ್ಯಕ್ಷ ಕ್ಯಾಪ್ಟನ್ ಬಿ.ಜೆ. ಹಿರೇಮಠ ಹೇಳಿದರು.  

ಅವರು ಮಂಗಳವಾರ ರೋಟರಿ ಸಭಾಭವನದಲ್ಲಿ ನಡೆದ ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿದರು.  ಈ ಬಾರಿ ಜನಸಾಮಾನ್ಯರ ಅನುಕೂಲತೆಗಾಗಿ, ಸರ್ವ ಸದಸ್ಯರ ನಿರ್ಧಾರದಂತೆ ಉಚಿತ ನೇತ್ರ ತಪಾಸಣೆ, ಕಣ್ಣಿನ ಪೊರೆ ಶಸ್ತ್ರಚಿಕಿತ್ಸಾ ಶಿಬಿರವನ್ನು ಆಯೋಜಿಸಲಾಗಿದೆ. ಶಿಬಿರವು ಮಾರ್ಚ್‌ 27, 2026 ರಂದು ಶುಕ್ರವಾರ ಮುಂಜಾನೆ 10 ಗಂಟೆಗೆ ಆರಂಭವಾಗಿ ಮಧ್ಯಾಹ್ನ 2 ಗಂಟೆಗೆ  ಸಮಾರೋಪವಾಗಲಿದೆ ಎಂದರು.  

 ಕಾರ್ಯದರ್ಶಿ ಡಾ. ನಾರಾಯಣ ಪವಾರ ಅವರು ಮಾತನಾಡಿ, ಮಾನ್ವಿ ಕಂಪನಿ ಹತ್ತಿರ ಅಮೃತಂ ಆಸ್ಪತ್ರೆಯಲ್ಲಿ ಶಿಬಿರ ನಡೆಯಲಿದ್ದು  ಅಂದು ಸಾವಿರಕ್ಕೂ ಹೆಚ್ಚು ನಗರ ಮತ್ತು ಗ್ರಾಮೀಣ ಪ್ರದೇಶದ ಬಡ ಜನರು, ಜನಸಾಮಾನ್ಯರು  ಪಾಲ್ಗೊಳ್ಳಲಿದ್ದಾರೆ. ತಪಾಸಣೆಯ ನಂತರ  ಅಗತ್ಯವಿದ್ದವರಿಗೆ ಶಸ್ತ್ರಚಿಕಿತ್ಸೆ ಗೆ ಆಯ್ಕೆ ಮಾಡಿ ನಂತರ ನಿಗದಿತ ದಿನಾಂಕದಂದು ದಾವಣಗೆರೆಯಲ್ಲಿ ಶಸ್ತ್ರ ಚಿಕಿತ್ಸೆ ನಡೆಸಿ ಕರೆ ತರಲಾಗುವುದು.   ರೋಟರಿ ಸಂಸ್ಥೆ-ಇನ್ನರ್ ವ್ಹಿಲ್ ಸಂಸ್ಥೆ ಎಂ.ಕೆ. ಪವಾರ ಮೆಮೋರಿಯಲ್ ಸೊಸೈಟಿ - ಅಮೃತಂ ಆಸ್ಪತ್ರೆ ಹಾಗೂ ದಾವಣಗೆರೆಯ ಎಸ್‌. ಎಸ್‌. ಕೆರ್ ಟ್ರಸ್ಟ್‌ ಸಹಯೋಗದಲ್ಲಿ ನಡೆಯಲಿದೆ.   

 ತಾಲೂಕಿನ ವಿವಿಧ ಭಾಗಗಳಲ್ಲಿನ ಜನರ ಅನುಕೂಲಕ್ಕಾಗಿ ಪ್ರತಿ ತಿಂಗಳು ಶಿಬಿರಗಳ ಮೂಲಕ ಜನ ಸೇವೆಗೆ ಮುಂದಾಗಿದ್ದೇವೆ. ಸಾರ್ವಜನಿಕರು ಈ ಬ್ರಹತ್ ಶಿಬಿರದ ಪ್ರಯೋಜನ ಪಡೆಯುವುದರ ಮೂಲಕ ಸಂಸೆಯ ಸೇವಾ ಕಾರ್ಯಗಳಿಗೆ ಪ್ರೋತ್ಸಾಹಿಸಬೇಕು ಎಂದು ಅವರು ಮನವಿ ಮಾಡಿದರು. ಮಾಧ್ಯಮಗೋಷ್ಠಿಯಲ್ಲಿ ಕಾರ್ಯಕ್ರಮ ಅಧ್ಯಕ್ಷ ಫಕ್ಕೀರ​‍್ಪ ಹೊನ್ನಾಳಿ, ಮಾಜಿ ಅಧ್ಯಕ್ಷ ಉಮಾಪತಿ ಹೊನ್ನಾಳಿ, ಜಿ.ಜಿ.ಹೊಟ್ಟಿಗೌಡರ ಮತ್ತಿತರರು ಉಪಸ್ಥಿತರಿದ್ದರು.