ಲೋಕದರ್ಶನ ವರದಿ 

ವಿಜಯಪುರ, ಜ. 01: ಮಣಿಕಂಠ ಫೌಂಡೇಶನ್ ವಿಜಯಪುರದ ಸದಸ್ಯರಾದ ಶ್ರೀ ಮಡಿವಾಳಯ್ಯ ಹಿರೇಮಠ ಅವರ 38ನೇ ವರ್ಷದ ಜನ್ಮದಿನದ ಅಂಗವಾಗಿ, ಅವರ ಅನುಪಸ್ಥಿತಿಯಲ್ಲಿಯೂ ಸ್ನೇಹಿತರು ಹಾಗೂ ಹಿತೈಷಿಗಳು ಅರ್ಥಪೂರ್ಣವಾಗಿ ಜನ್ಮದಿನ ಆಚರಣೆ ನಡೆಸಿದರು.  

ಶಿವಶಕ್ತಿ ನಗರದ ಅವರ ನಿವಾಸದ ಆವರಣದಲ್ಲಿ ಸ್ವಯಂ ಪ್ರೇರಿತ ರಕ್ತದಾನ ಶಿಬಿರವನ್ನು ಶ್ರೀ ಸಿದ್ದೇಶ್ವರ ರಕ್ತ ಕೇಂದ್ರ, ವಿಜಯಪುರ ಇವರ ಸಹಯೋಗದೊಂದಿಗೆ ಆಯೋಜಿಸಲಾಗಿತ್ತು. ಈ ಸಂದರ್ಭದಲ್ಲಿ ಅನೇಕ ಜನರು ಸ್ವಯಂ ಪ್ರೇರಿತರಾಗಿ ರಕ್ತದಾನ ಮಾಡಿ ಮಾನವೀಯ ಸೇವೆಗೆ ಕೈಜೋಡಿಸಿದರು.  

ಇದೇ ವೇಳೆ ನಗರದ ವಿವಿಧ ನಿರ್ಗತಿಕರಿಗೆ ಹಣ್ಣು ಹಂಪಲು ಹಾಗೂ ಊಟವನ್ನು ವಿತರಿಸಲಾಯಿತು. ಜನ್ಮದಿನವನ್ನು ಸಮಾಜಮುಖಿ ಕಾರ್ಯಗಳ ಮೂಲಕ ಆಚರಿಸುವ ಮೂಲಕ ಮಡಿವಾಳಯ್ಯ ಹಿರೇಮಠ ಅವರ ಅಭಿಮಾನಿಗಳು ಮಾದರಿಯಾದರು.  

ಕಾರ್ಯಕ್ರಮದಲ್ಲಿ ಸಂಘದ ಕಾರ್ಯದರ್ಶಿ ಶ್ರೀಮತಿ ಲಕ್ಷ್ಮೀ ಮಡಿವಾಳಯ್ಯ ಹಿರೇಮಠ, ಸದಸ್ಯರಾದ ಅಮೋಘ ಕರಾಂಡೆ, ಕಲ್ಲಪ್ಪ ಕುಂಬಾರ, ರಮೇಶ್ ಪಡಸಲಗಿ, ಯಾಸೀನ್, ಧಾರಾಸಿಂಗ್ ಪವಾರ್, ಪವನ್ ಹಿರೇಮಠ ಸೇರಿದಂತೆ ಸ್ನೇಹಿತರ ಬಳಗ ಹಾಗೂ ಗಣ್ಯರು ಉಪಸ್ಥಿತರಿದ್ದರು.