ಸರ್ಕಾರ ತಾಲೂಕಿಗೊಂದು ರಂಗಮಂದಿರ ನಿರ್ಮಿಸಲಿ: ಡಾ. ಅರವಿಂದ ಕುಲಕರ್ಣಿ 

ಬೆಳಗಾವಿ 28: ಸರ್ಕಾರದವರು ತಾಲೂಕಿಗೊಂದು ರಂಗಮಂದಿರ ನಿರ್ಮಿಸಿ ಕೊಡುವ ಮೂಲಕ ವೃತ್ತಿರಂಗಭೂಮಿ, ಕಲಾವಿದರ ಕೈ ಹಿಡಿಯಬೇಕು ಎಂದು ರಂಗಸಂಪದದ ಅಧ್ಯಕ್ಷ ಡಾ. ಅರವಿಂದ ಕುಲಕರ್ಣಿಯವರು ಹೇಳಿದರು. 

ನಗರದ ಚೆನ್ನಮ್ಮ ವೃತ್ತದ ಬಳಿಯಿರುವ ಕನ್ನಡ ಸಾಹಿತ್ಯ ಭವನದಲ್ಲಿ ದಿ. 28 ಶುಕ್ರವಾರದಂದು ವೀರೇಶ್ವರ  ನಾಟ್ಯಸಂಘ ಬಾಗಲಕೋಟ ತಂಡದ ವ್ಯವಸ್ಥಾಪಕ ವಿರೇಶ ಚಳಗೇರಿ ಮತ್ತು ಮೀನಾಕ್ಷಿ ದಾವಣಗೇರಿಯವರು ಆಯೋಜಿಸಿದ್ದ ಪತ್ರಿಕಾ ಗೋಷ್ಠಿಯಲ್ಲಿ ಅವರು ಮಾತನಾಡುತ್ತಿದ್ದರು. 

ಒಂದು ಕಾಲದಲ್ಲಿ ಏಣಗಿ ಬಾಳಪ್ಪ, ಚಿಂದೋಡಿ ಲೀಲಾ, ಹುಚ್ಚೇಶ್ವರ ತಂಡ ಹೀಗೆ ಕರ್ನಾಟಕದಲ್ಲಿ ವೃತ್ತಿಪರ ನಾಟಕ ತಂಡಗಳು ವಿಜೃಂಭಿಸುತ್ತಿದ್ದವು. 30-35 ರಷ್ಟು ಹೆಸರಾಂತ ನಾಟಕ ತಂಡಗಳಿದ್ದವರು. ಒಂದೊಂದು ತಂಡ 40 ರಿಂದ 50 ರಷ್ಟು ಕುಟುಂಬಗಳನ್ನು ಸಾಕಿ ಸಲಹುತ್ತಿದ್ದವು. ಹವ್ಯಾಸಿ ನಾಟಕಗಳು ಬಂದು ವೃತ್ತಿ ನಾಟಕಗಳ ಸಂಖ್ಯೆ ಕಡಿಮೆಯಾಗುತ್ತ ಬಂದಿತು. ದೂರದರ್ಶನ, ಯುಟ್ಯೂಬ್‌ಗಳ ಹಾವಳಿಗಳಿಂದ ಇಂದು ವೃತ್ತಿರಂಗಭೂಮಿ ನಶಿಸಿ ಹೋಗುತ್ತಿವೆ. ವೃತ್ತಿ ರಂಗಭೂಮಿ ಕಲಾವಿದರ ಜೀವನ ದುಸ್ತರವಾಗಿದೆ ಎಂದು ಡಾ. ಕುಲಕರ್ಣಿಯವರು ಹೇಳಿದರು. 

         ವೃತ್ತಿ ರಂಗಭೂಮಿಯ ಸಾಕಷ್ಟು ನಾಟಕಗಳು ಸಮಾಜದ ಮೇಲೆ ಪ್ರಭಾವ ಬೀರಿವೆ. ನೂರಾರು ಕುಟುಂಬಗಳನ್ನು ಸಾವಿರಾರು ಜನರನ್ನು ತಿದ್ದಿತೀಡಿ ಸರಿದಾರಿಗೆ ತಂದಿವೆ. ತಿಳುವಳಿಕೆಯನ್ನು ಹೇಳುವ ನಾಟಕಗಳಿವೆ. ಪ್ರೇಕ್ಷಕರನ್ನು ಆಕರ್ಷಿಸುವ ನಿಟ್ಟಿನಲ್ಲಿ ದ್ವಂದಾರ್ಥದ ಸಂಭಾಷಣೆಗಳು ಇರುತ್ತವೆ. ಅವು ಅನಿವಾರ್ಯವೂ ಕೂಡ. ಇಲ್ಲಿಯ ಕಲಾವಿದರು ಯಾವುದೇ ಹವ್ಯಾಸಿ ಕಲಾವಿದರಗಿಂತಲೂ ಯಾವುದೇ ರೀತಿಯಲ್ಲಿ ಕಡಿಮೆಯಿಲ್ಲ.  ಒಂದು ನಾಟಕ ತಂಡವೆಂದರೆ ಹಲವಾರು ಜನರಿಗೆ ಉದ್ಯೋಗ ನೀಡುವ ಹತ್ತಾರು ಕುಟುಂಬಗಳಿಗೆ ಅನ್ನ ನೀಡುವ ಸಂಸ್ಥೆಯಿದ್ದಂತೆ ಇವುಗಳನ್ನು ಉಳಿಸಿ ಬೆಳೆಸುವುದು ಸಮಾಜದ ಕರ್ತವ್ಯ ಎಂದು ಹೇಳಿದರು. 

ಆದ್ದರಿಂದ ಎಲ್ಲ ರಂಗಾಸಕ್ತರ ಪರವಾಗಿ ನಾನು ಕೇಳಿಕೊಳ್ಳುವುದೇನಂದರೆ  ಮಾರ್ಚ 2 ರವಿವಾರದಂದು ಬೆಳಗಾವಿಯ ಎಸ್‌.ಪಿ. ಆಫೀಸ್ ಪಕ್ಕದಲ್ಲಿರುವ ಕುಮಾರ ಗಂಧರ್ವ ರಂಗಮಂದಿರದಲ್ಲಿ ಮಧ್ಯಾಹ್ನ 3 ಮತ್ತು ಸಾ. 6 ಕ್ಕೆ ಪ್ರದರ್ಶನಗೊಳ್ಳಲಿರುವ ‘ಕಿವುಡ ಮಾಡಿದ ಕಿತಾಪತಿ’ ಹಾಸ್ಯಭರಿತ ನಾಟಕವನ್ನು ನೋಡಿ ವೃತ್ತಿ ರಂಗಭೂಮಿಯನ್ನು ಪ್ರೋತ್ಸಾಹಿಸಿ ಎಂದು ಡಾ. ಕುಲಕರ್ಣಿಯವರು ಮನವಿ ಮಾಡಿದರು. 

ವ್ಯವಸ್ಥಾಪಕ ವೀರೇಶ ಚಳಗೇರಿ ಮತ್ತು ಮೀನಾಕ್ಷಿ ದಾವಣಗೇರಿ ಅವರು ಮಾತನಾಡಿ ವೀರೇಶ್ವರ ನಾಟ್ಯ ಸಂಘ ನಾಟಕ ತಂಡವನ್ನು ಪ್ರಾರಂಭಿಸಿ 13 ವರ್ಷಗಳಾದವು. ಕಲಾವಿದರು, ಸಂಗೀತ ಸಂಯೋಜಕರು, ಮೇಕಪಮನ್, ಕೆಲಸಗಾರರು ಹೀಗೆ ಒಟ್ಟು 22 ಜನ ತಂಡದಲ್ಲಿದ್ದಾರೆ. ಈ ಪ್ರದರ್ಶನವನ್ನು ಮಕ್ಕಳ ಶಿಕ್ಷಣದ ಸಹಾಯಾರ್ಥವಾಗಿ ಇಟ್ಟುಕೊಂಡಿದ್ದು ಎಲ್ಲರೂ ಹಣ ಕೊಟ್ಟು ನಾಟಕವನ್ನು ನೋಡಿ ಪ್ರೋತ್ಸಾಹಿಸಬೇಕೆಂದು ಕೇಳಿಕೊಂಡರು. 

-0-0-0-ಫೋಟೋ; ಡಾ. ಎಚ್‌. ಐ. ತಿಮ್ಮಾಪುರ, ಶ್ರೀಮತಿ ಮೀನಾಕ್ಷಿ ದಾವಣಗೇರಿ,ವೀರೇಶ ಚಳಗೇರಿ, ಡಾ. ಅರವಿಂದ ಕುಲಕರ್ಣಿ ಮತ್ತು ಬಿ. ಎ. ಪಾಟೀಲ--