ಹಿರೇಬೂದನೂರ 06: ಇದೇ ಫೆಬ್ರವರಿ 7 ಹಾಗೂ 8 ರಂದು ಸವದತ್ತಿ ತಾಲೂಕಿನ ಹಿರೇಬೂದನೂರ ಗ್ರಾಮದ ಸರಕಾರಿ ಪ್ರೌಢಶಾಲೆಗೆ ಕನ್ನಡ ಮನಸುಗಳು ಕರ್ನಾಟಕ ತಂಡ ಸರಕಾರಿ ಶಾಲೆ ಉಳಿಸಿ ಅಭಿಯಾನದಡಿ ಬಣ್ಣದ ಮೆರಗು ನೀಡಲು ಆಗಮಿಸಲಿದೆ.  

2017ರಲ್ಲಿ ಪವನ ಧರೆಗುಂಡಿ ನೇತೃತ್ವದಲ್ಲಿ ಸ್ಥಾಪನೆಯಾದ ಈ ತಂಡ ಇಲ್ಲಿಯವರೆಗೆ ರಾಜ್ಯದ ವಿವಿಧ ಜಿಲ್ಲೆಗಳ 65 ಸರಕಾರಿ ಶಾಲೆಗಳಿಗೆ ಬಣ್ಣದ ಮೆರಗು ನೀಡಿದೆ. ಬೆಳಗಾವಿ ಜಿಲ್ಲೆಯಲ್ಲಿ ಖಾನಾಪೂರ ತಾಲೂಕಿನ ತೋಲಗಿ, ಬೆಳಗಾವಿ ತಾಲೂಕಿನ ಕುಕಡೊಳ್ಳಿ ಹಾಗೂ ಸವದತ್ತಿ ತಾಲೂಕಿನ ಹಾರೂಗೊಪ್ಪ ಹಾಗೂ ಹಿರೇಬೂದನೂರ ಸರಕಾರಿ ಪ್ರಾಥಮಿಕ ಶಾಲೆಗಳಿಗೆ ಹಿಂದಿನ ಅಭಿಯಾನಗಳಲ್ಲಿ ಬಣ್ಣದ ಮೆರಗು ನೀಡಿದೆ.  

ದಾನಿಗಳ ಸಹಕಾರದಿಂದ ದೇಣಿಗೆಯನ್ನು ಸಂಗ್ರಹಿಸಿ ಆದ್ಯತಾವಾರು ಅವಶ್ಯಕತೆಯನ್ನು ಆಧರಿಸಿ ಈ ತಂಡವು ಈ ಅಭಿಯಾನವನ್ನು ಮಾಡುತ್ತಿದೆ. ಸರಕಾರಿ ಶಾಲೆಗಳನ್ನು ಚಂದಗಾಣಿಸುವ ಈ ತಂಡದ ಪ್ರಯತ್ನ ಶ್ಲಾಘನೀಯ ಎಂದು ಹಿರೇಬೂದನೂರ ಸರಕಾರಿ ಪ್ರೌಢ ಶಾಲೆಯ ಮುಖ್ಯ ಶಿಕ್ಷಕ ಎಸ್ ಆರ್ ರೇವಣ್ಣವರ ತಿಳಿಸಿದ್ದಾರೆ.