ಜಮಖಂಡಿ 04: ತಾಲೂಕಿನ ಕಲಹಳ್ಳಿ ಗ್ರಾಮದ ಸತ್ಯಕಾಮರ ಸುಮ್ಮನೆ ಪ್ರತಿಷ್ಠಾನದಲ್ಲಿ ಅ, 5ರಂದು ನಡೆಯಬೇಕಿದ್ದ 108ನೇ, 2025-26 ನೇ ಸಾಲಿನ ಕನ್ನಡ ಸಾಹಿತ್ಯ ಪರಿಷತ್ ಸರ್ವ ಸದಸ್ಯರ ವಾರ್ಷಿಕ ಸಭೆ ರದ್ದುಗೊಂಡಿದ್ದು. ಗ್ರಾಮದಲ್ಲಿ ನಿಷೇಧಾಜ್ಞೆ ಜಾರಿಗೊಳಿಸಿದ ತಹಸೀಲ್ದಾರ ಅನೀಲ ಬಡಿಗೇರ ಆದೇಶ ಹೊರಡಿಸಿದ್ದ ಹಿನ್ನಲೆ ಸಭೆ ರದ್ದುಗೊಂಡಿದೆ ಎಂದು ಮಾಧ್ಯಮಕ್ಕೆ ತಿಳಿಸಿದ್ದಾರೆ. 

ಕಲಹಳ್ಳಿ ಗ್ರಾಮದಲ್ಲಿ ಸೆ.18 ರಂದು ಪ್ರೇಮ ಪ್ರಕರಣಕ್ಕೆ ಎರಡು ಕೋಮುಗಳ ಮಧ್ಯೆ ಗುಂಪು ಘರ್ಷಣೆ ನಡೆದಿತ್ತು. ಈ ಗಲಾಟೆಯಲ್ಲಿ ಪಿಎಸ್‌ಐ ಹಾಗೂ ಪೊಲೀಸ್ ಸಿಬ್ಬಂದಿಗಳ ಮೇಲೆ ಹಲ್ಲೆ ನಡೆದಿತ್ತು. ಗ್ರಾಮದಲ್ಲಿ ಕನ್ನಡ ಸಾಹಿತ್ಯ ಪರಿಷತ್ತಿನ ಸಭೆ ನಡೆಯುವ ಕಾರಣ ಸಾವಿರಾರು ಜನರು ಬರುವ ನೀರೀಕ್ಷೆಯಿಂದ ಪೋಲಿಸ್ ಭದ್ರತೆಯನ್ನು ಕೇಳಲಾಗಿತ್ತು. ಕಲ್ಲಹಳ್ಳಿಯಲ್ಲಿ ವೆಂಕಟೇಶ್ವರ ದೇವರ ಜಾತ್ರಾಮಹೋತ್ಸವ ಹಾಗೂ ಹಿರೇಪಡಸಲಗಿ ಗ್ರಾಮದಲ್ಲಿ ಆರ್‌.ಎಸ್‌.ಎಸ್‌. ಪಥ ಸಂಚಲನ, ತೊದಲಬಾಗಿ ಗ್ರಾಮದಲ್ಲಿ ಆರ್‌.ಎಸ್‌.ಎಸ್‌. ಮಂಡಳಿ ಉತ್ಸವ, ಚಿಕ್ಕಲಕಿ ಗ್ರಾಮದಲ್ಲಿ ಆರ್‌.ಎಸ್‌.ಎಸ್‌. ಪಥ ಸಂಚಲನ, ಟಕ್ಕೋಡ ಗ್ರಾಮದಲ್ಲಿ ಪಿಕೆಪಿಎಸ್, ಆಡಳಿತ ಮಂಡಳಿಯ ಚುಣಾವಣೆ, ಆಲಬಾಲ ಗ್ರಾಮದಲ್ಲಿ ಆರ್‌.ಎಸ್‌.ಎಸ್‌. ಪಥ ಸಂಚಲನ ಕಾರ್ಯಕ್ರಮಗಳ ಹಿನ್ನಲೆಯಲ್ಲಿ ಪೋಲಿಸ್ ಭದ್ರತೆ ಇಲ್ಲದ ಕಾರಣ ಹಾಗೂ ಕಲ್ಲಹಳ್ಳಿಯಲ್ಲಿ ಎರಡು ಗುಂಪುಗಳ ನಡುವೆ ನಡೆದ ಗಲಾಟೆ ಪ್ರಕರಣಕ್ಕೆ ಸಂಬಂಧಿಸಿದ ಕಾರಣ ಗ್ರಾಮದಲ್ಲಿ ಪರಿಸ್ಥಿತಿ ಸೂಕ್ಷ್ಮವಾಗಿರುವದರಿಂದ ಈ ವರದಿ ಆಧರಿಸಿ ತಹಸೀಲ್ದಾರ ಅನೀಲ ಬಡಿಗೇರ ಅ.4, 5 ರಂದು ಕಲಹಳ್ಳಿ ಗ್ರಾಮದಲ್ಲಿ ನಿಷೇಧಾಜ್ಞೆ ಜಾರಿಗೊಳಿಸಿದ್ದಾರೆ ಎಂದು ಮಾಹಿತಿಯನ್ನು ಲೋಕದರ್ಶನ ಮಾಧ್ಯಮಕ್ಕೆ ತಿಳಿಸಿದ್ದಾರೆ.