ನವದೆಹಲಿ/ಮಾಸ್ಕೋ, ಆಗಸ್ಟ್ 27 : ಹಿಮಚಿರತೆ ಸಂರಕ್ಷಣೆ ಕುರಿತು ಭಾರತ ಮತ್ತು ರಷ್ಯಾ ದೇಶಗಳು ಮಾಸ್ಕೋದಲ್ಲಿರುವ ರಷ್ಯನ್ ಅಕಾಡೆಮಿ ಆಫ್ ಸೈನ್ಸಸ್‌ನ ಪರಿಸರ ವಿಜ್ಞಾನ ಮತ್ತು ವಿಕಾಸ ಸಂಸ್ಥೆಯಲ್ಲಿ ಚರ್ಚೆ ನಡೆಸಿವೆ ಎಂದು ಕೇಂದ್ರ ಪರಿಸರ ಸಚಿವಾಲಯದ ಅಧಿಕಾರಿಗಳು ತಿಳಿಸಿದ್ದಾರೆ.

ಬುಧವಾರ ನಡೆದ ಈ ಸುತ್ತುಮೇಜಿನ ಸಭೆಯನ್ನು ಅಂತಾರಾಷ್ಟ್ರೀಯ ಬಿಗ್ ಕ್ಯಾಟ್ ಅಲಯನ್ಸ್ (IBCA) ಅಡಿಯಲ್ಲಿ ಉಭಯ ದೇಶಗಳ ಸಹಭಾಗಿತ್ವದಲ್ಲಿ ಆಯೋಜಿಸಲಾಗಿತ್ತು.

ಸಭೆಯಲ್ಲಿ ಭಾರತೀಯ ನಿಯೋಗವು ಹಿಮಚಿರತೆ ಸಂರಕ್ಷಣೆಗೆ ಸಂಬಂಧಿಸಿದಂತೆ ಭಾರತದಲ್ಲಿ ಅಳವಡಿಸಿಕೊಂಡಿರುವ ನೂತನ ವಿಧಾನಗಳನ್ನು ರಷ್ಯಾದ ಪ್ರತಿನಿಧಿಗಳೊಂದಿಗೆ ಹಂಚಿಕೊಂಡಿತು. ಹಿಮಚಿರತೆಗಳ ಸಂಖ್ಯೆಯನ್ನು ಅಂದಾಜಿಸಲು ರೇಡಿಯೋ ಟೆಲಿಮೆಟ್ರಿ ಮತ್ತು ಆನುವಂಶಿಕ ವಿಶ್ಲೇಷಣೆ ಸೇರಿದಂತೆ ಆಧುನಿಕ ವೈಜ್ಞಾನಿಕ ತಂತ್ರಜ್ಞಾನಗಳನ್ನು ಬಳಸುತ್ತಿರುವ ಕುರಿತು ವಿವರಿಸಲಾಯಿತು.

ಹಿಮಾಲಯದ ಈ ಅಪರೂಪದ ಪ್ರಾಣಿಯನ್ನು ಅದರ ನಾಚಿಕೆ ಸ್ವಭಾವ ಮತ್ತು ದೂರದ, ದುರ್ಗಮ ಪ್ರದೇಶಗಳಲ್ಲಿ ವಾಸಿಸುವ ಕಾರಣದಿಂದಾಗಿ ‘ಪರ್ವತಗಳ ಭೂತ’ (Ghost of the Mountains) ಎಂದು ಕರೆಯಲಾಗುತ್ತದೆ. ಹಿಮಚಿರತೆಗಳ ಚಲನವಲನವನ್ನು ಪತ್ತೆಹಚ್ಚುವುದು ಮತ್ತು ಅವುಗಳ ಸಂಖ್ಯೆಯ ಕುರಿತು ಮಾಹಿತಿ ಸಂಗ್ರಹಿಸುವುದು ಸವಾಲಿನ ಕೆಲಸವಾಗಿದೆ ಎಂದು ವನ್ಯಜೀವಿ ತಜ್ಞರು ತಿಳಿಸಿದ್ದಾರೆ.

ಈ ಸವಾಲನ್ನು ಎದುರಿಸಲು ಭಾರತೀಯ ವನ್ಯಜೀವಿ ಸಂಸ್ಥೆ (WII) ತಜ್ಞರು ಹಿಮಚಿರತೆಗಳ ಇರುವಿಕೆಯನ್ನು ಸೂಚಿಸುವ ಹೆಜ್ಜೆ ಗುರುತುಗಳು, ಮಲ ಮತ್ತು ಗೀರು ಗುರುತುಗಳಂತಹ ಸಾಕ್ಷ್ಯಗಳನ್ನು ಆಧರಿಸಿ ವ್ಯಾಪಕ ಸಮೀಕ್ಷೆ ನಡೆಸಿದರು.

ಸುಮಾರು 8,500 ಚದರ ಕಿ.ಮೀ. ವ್ಯಾಪ್ತಿಯ ಹಿಮಚಿರತೆಗಳ ವಾಸಸ್ಥಳದಲ್ಲಿ 950ಕ್ಕೂ ಹೆಚ್ಚು ಕ್ಯಾಮೆರಾ ಟ್ರ್ಯಾಪ್‌ಗಳನ್ನು ಅಳವಡಿಸಿ ಸಮೀಕ್ಷೆ ನಡೆಸಲಾಗಿದ್ದು, ಇದರಿಂದ ದೇಶದ ವಿವಿಧ ಪ್ರದೇಶಗಳಲ್ಲಿ ಹಿಮಚಿರತೆಗಳ ಸಂಖ್ಯೆಯ ವಿಶ್ವಾಸಾರ್ಹ ಅಂದಾಜು ಪಡೆಯಲು ಸಾಧ್ಯವಾಯಿತು.

2024ರ ಜನವರಿಯಲ್ಲಿ ಪ್ರಕಟವಾದ ಅಧ್ಯಯನದ ಪ್ರಕಾರ, ಭಾರತದಲ್ಲಿ ಒಟ್ಟು 718 ಹಿಮಚಿರತೆಗಳಿವೆ ಎಂದು ಅಂದಾಜಿಸಲಾಗಿದೆ. ದೇಶದ ಒಟ್ಟು ಹಿಮಚಿರತೆಗಳ ಪೈಕಿ ಶೇ.66ಕ್ಕೂ ಹೆಚ್ಚು ಲಡಾಖ್‌ನಲ್ಲಿವೆ.

ಇತರ ಪ್ರಮುಖ ಪ್ರದೇಶಗಳ ಪೈಕಿ ಉತ್ತರಾಖಂಡದಲ್ಲಿ 124, ಹಿಮಾಚಲ ಪ್ರದೇಶದಲ್ಲಿ 51, ಅರುಣಾಚಲ ಪ್ರದೇಶದಲ್ಲಿ 36, ಸಿಕ್ಕಿಂನಲ್ಲಿ 21 ಮತ್ತು ಜಮ್ಮು ಮತ್ತು ಕಾಶ್ಮೀರದಲ್ಲಿ 9 ಹಿಮಚಿರತೆಗಳು ದಾಖಲಾಗಿವೆ.

ಹಿಮಚಿರತೆಗಳು ಹಾಗೂ ಅವುಗಳ ಸೂಕ್ಷ್ಮ ಹಿಮಾಲಯದ ವಾಸಸ್ಥಳಗಳ ಸಂರಕ್ಷಣೆಗೆ ವೈಜ್ಞಾನಿಕ ಸಹಕಾರ ಮತ್ತು ಜ್ಞಾನ ವಿನಿಮಯವನ್ನು ಮತ್ತಷ್ಟು ಬಲಪಡಿಸುವ ನಿಟ್ಟಿನಲ್ಲಿ ಭಾರತ-ರಷ್ಯಾ ಚರ್ಚೆಗಳು ಮಹತ್ವದ ಹೆಜ್ಜೆಯಾಗಿವೆ.