ಲೋಕದರ್ಶನ ವರದಿ 

ಗೋಕಾಕ 02:    ನಗರದ ಪ್ರತಿಷ್ಠಿತ ಗೋಕಾಕ ಶಿಕ್ಷಣ ಸಂಸ್ಥೆಯ ಜೆ.ಎಸ್‌.ಎಸ್‌. ಪದವಿ ಮಹಾವಿದ್ಯಾಲಯದಲ್ಲಿ ಆಯೋಜಿಸಿದ್ದ 2025-26 ನೇ ಸಾಲಿನ ಶೈಕ್ಷಣಿಕ- ಕ್ರೀಡಾ ವಿಭಾಗಗಳಲ್ಲಿ ಸಾಧನೆ ಮಾಡಿದ ವಿದ್ಯಾರ್ಥಿಗಳನ್ನು ಸನ್ಮಾನಿಸುವ “ಪರಿಶ್ರಮ-ಪುರಸ್ಕಾರ” ಕಾರ್ಯಕ್ರಮದಲ್ಲಿ ಸಂಸ್ಥೆಯ ಆಡಳಿತ ಮಂಡಳಿ ನಿರ್ದೇಶಕರಾದ ಶ್ರೀ ಎಂ .ಜಿ. ತಾಂವಶಿರವರು ಮುಖ್ಯ ಅತಿಥಿಗಳಾಗಿ ಭಾಗವಹಿಸಿ ಪರಿಶ್ರಮ ಉಜ್ವಲ ಬದುಕಿಗೆ ದಾರೀದೀಪವಾಗಿದೆ ಎಂದು ತಮ್ಮ ಅಭಿಮತ ವ್ಯಕ್ತಪಡಿಸಿದರು. 

ಪ್ರಾಂಶುಪಾಲರಾದ ಡಾ. ಬಿ. ಎಂ. ತುರಡಗಿರವರು ಮಾತನಾಡಿ, ನಿರಂತರ ಪರಿಶ್ರಮದ ಮೂಲಕ ಸಾಧನೆ ಮಾಡಿ ಮಹಾವಿದ್ಯಾಲಯದ ಕೀರ್ತಿ ಹೆಚ್ಚಿಸಿದ ವಿದ್ಯಾರ್ಥಿಗಳನ್ನು ಶ್ಲಾಘಿಸಿದರು. ಸಂಸ್ಥೆಯ ಕಾರ್ಯದರ್ಶಿಗಳಾದ ಆರ್‌.ಎಂ.ವಾಲಿರವರು ವಿದ್ಯಾರ್ಥಿಗಳನ್ನು ಮತ್ತು ಪೋಷಕರನ್ನು ಉದ್ದೇಶಿಸಿ ಮಾತನಾಡಿದರು. 

ಈ ಸಂದರ್ಭದಲ್ಲಿ  ಪದವಿ ಪರೀಕ್ಷೆಗಳಲ್ಲಿ ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯಕ್ಕೆ ದ್ವಿತೀಯ ರಾ​‍್ಯಂಕ ಪಡೆದ ವಿದ್ಯಾರ್ಥಿಗಳಾದ ಕು.ರೂಪಾ.ಬಿ.ತಳಕಟನಾಳ ಮತ್ತು ಸ್ವರ್ಣಪದಕ ಪಡೆದ ತಿಲಕ ಸಿಂಗ ರಜಪೂತ, ಅಂ ಪರೀಕ್ಷೆಗಳಲ್ಲಿ ತೇರ್ಗಡೆಯಾದ ಸ್ವಾತಿ ಜಿ. ನಿಡೋಣಿ ಮತ್ತು ಸುರೇಖಾ ಜಿ. ಚೌಧರಿ,  K-SET 2025 ಪರೀಕ್ಷೆಗಳಲ್ಲಿ ತೇರ್ಗಡೆಯಾದ  ಪದ್ಮಶ್ರೀ ಬೆಳವಿ, ಸಾಗರ ಕಳ್ಳಿಗುದ್ದಿ, ಕು.ಆಫಶಾ ಪಾಚ್ಛಾಪುರ,  ಉದ್ದವ್ವಾ ಬಂಡಿ, ರಂಜನಾ ಸಂಗೋಳ್ಳಿ, ಸುನೀಲ ಧರ್ಮಟ್ಟಿ  ಹಾಗೂ ಕ್ರೀಡಾ ವಿಭಾಗಗಳಲ್ಲಿ  ಯುನಿವರ್ಸಿಟಿ ಬ್ಲೂ ಆಗಿ ವಿಜೇತರಾದ ಗಂಗಾಧರ ಲಕ್ಕನ್ನವರ, ಭಾವನಾ ಕೌಜಲಗಿ ಮತ್ತು ಗುರುನಾಥ ಮದಲಬಾವಿ ಅವರನ್ನು ಸಂಸ್ಥೆಯ ವತಿಯಿಂದ ಸನ್ಮಾನಿಸಿ ಗೌರವಿಸಲಾಯಿತು. 

ಸಮಾರಂಭದಲ್ಲಿ ಮುರುಗೇಶ ತಾಂವಶಿ, ಉಪಪ್ರಾಂಶುಪಾಲರಾದ ಡಾ.ಆರ್‌.ಎಸ್‌.ಬಳಿಗಾರ,  ಗುರುರಾಜ ನಿಡೋನಿ ಉಪಸ್ಥಿತರಿದ್ದರು. ಪ್ರತಿಭಾವಂತ ವಿದ್ಯಾರ್ಥಿಗಳ ಪೋಷಕರು, ಬೋಧಕ ಬೋಧಕೇತರ ಸಿಬ್ಬಂದಿ ವರ್ಗ ಹಾಗೂ ವಿದ್ಯಾರ್ಥಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದ್ದರು. ಕಾರ್ಯಕ್ರಮದ ನಿರೂಪಣೆಯನ್ನು ಡಾ. ಕೃಷ್ಣಮೂರ್ತಿ ಎಂ.ಎಸ್‌. ನಿರ್ವಹಿಸಿದರೆ, ಎಂ. ವಿ. ಗೊರಗುದ್ದಿ ವಂದಿಸಿದರು.