ಚೆನ್ನೈ, ಜುಲೈ 12 : ಮಾಮಲ್ಲಪುರಂ ಸಮೀಪದ ಖಾಸಗಿ ರೆಸಾರ್ಟ್‌ನಲ್ಲಿ ಬೋರ್‌ವೆಲ್ ಕೊರೆತ ಕಾರ್ಯದ ವೇಳೆ ಎತ್ತರದ ಕಬ್ಬಿಣದ ಪೈಪ್ ಮೇಲಿನಿಂದ ಹಾದುಹೋಗುತ್ತಿದ್ದ ಹೈಟೆನ್ಷನ್ ವಿದ್ಯುತ್ ತಂತಿಗೆ ತಗುಲಿದ ಪರಿಣಾಮ ನಾಲ್ವರು ಕಾರ್ಮಿಕರು ವಿದ್ಯುತ್ ಸ್ಪರ್ಶಕ್ಕೊಳಗಾಗಿ ಮೃತಪಟ್ಟಿದ್ದು, ಮತ್ತೋರ್ವ ಕಾರ್ಮಿಕ ಗಾಯಗೊಂಡಿರುವ ದುರ್ಘಟನೆ ಶನಿವಾರ ಸಂಜೆ ನಡೆದಿದೆ.

ಮೃತರನ್ನು ಪ್ರಭು (33), ಬಾಲಾಜಿ (20), ಬಾಷಾ ಬಾಯಿ (45) ಹಾಗೂ ರಾಜೇಂದ್ರನ್ (55) ಎಂದು ಗುರುತಿಸಲಾಗಿದೆ. ಗಾಯಗೊಂಡ ಭಗವಾನ್ (45) ಅವರಿಗೆ ವಿದ್ಯುತ್ ಶಾಕ್ ಉಂಟಾಗಿದ್ದು, ಅವರನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.

ಪೊಲೀಸರ ಪ್ರಕಾರ, ಬೇಸಿಗೆಯಲ್ಲಿ ಭೂಗರ್ಭ ಜಲಮಟ್ಟ ತೀವ್ರವಾಗಿ ಕುಸಿದ ಪರಿಣಾಮ ರೆಸಾರ್ಟ್‌ನಲ್ಲಿ ನೀರಿನ ಅಭಾವ ಉಂಟಾಗಿತ್ತು. ಹೀಗಾಗಿ, ಈಗಿರುವ ಬೋರ್‌ವೆಲ್‌ಗೆ ಬದಲಾಗಿ ಮತ್ತಷ್ಟು ಆಳದ ಹೊಸ ಬೋರ್‌ವೆಲ್ ಕೊರೆಸಲು ರೆಸಾರ್ಟ್ ಆಡಳಿತ ಖಾಸಗಿ ಬೋರ್‌ವೆಲ್ ಕೊರೆತ ಸಂಸ್ಥೆಯನ್ನು ನೇಮಿಸಿತ್ತು.

ಕಾರ್ಮಿಕರು ಉದ್ದವಾದ ಕಬ್ಬಿಣದ ಪೈಪ್ ಅನ್ನು ಲಂಬವಾಗಿ ಎತ್ತಿ ಬೋರ್‌ವೆಲ್‌ಗೆ ಇಳಿಸಲು ಯತ್ನಿಸುತ್ತಿದ್ದ ವೇಳೆ ಅದು ಮೇಲಿನ ಜೀವಂತ ಹೈಟೆನ್ಷನ್ ವಿದ್ಯುತ್ ತಂತಿಗೆ ತಗುಲಿದ್ದು, ಪರಿಣಾಮ ನಾಲ್ವರು ಸ್ಥಳದಲ್ಲೇ ಸಾವನ್ನಪ್ಪಿದರು.

ಘಟನೆಯ ಮಾಹಿತಿ ತಿಳಿಯುತ್ತಿದ್ದಂತೆ ಪೊಲೀಸರು ಹಾಗೂ ಅಗ್ನಿಶಾಮಕ ಮತ್ತು ರಕ್ಷಣಾ ಸಿಬ್ಬಂದಿ ಸ್ಥಳಕ್ಕೆ ಧಾವಿಸಿದರು. ಬಳಿಕ ತಮಿಳುನಾಡು ವಿದ್ಯುತ್ ಮಂಡಳಿ (ಟಿಎನ್‌ಇಬಿ) ಅಧಿಕಾರಿಗಳಿಗೆ ಮಾಹಿತಿ ನೀಡಿ ವಿದ್ಯುತ್ ಸಂಪರ್ಕ ಕಡಿತಗೊಳಿಸಿದ ನಂತರ ರಕ್ಷಣಾ ಕಾರ್ಯಾಚರಣೆ ನಡೆಸಲಾಯಿತು.

ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗಾಗಿ ಚೆಂಗಲ್ಪಟ್ಟು ಸರ್ಕಾರಿ ಮುಖ್ಯ ಆಸ್ಪತ್ರೆಯ ಶವಾಗಾರಕ್ಕೆ ರವಾನಿಸಲಾಗಿದೆ.

ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಘಟನೆಯ ಕುರಿತು ತನಿಖೆ ನಡೆಸುತ್ತಿದ್ದಾರೆ.