ಸಂಭ್ರಮದಿಂದ ಸೀಗೆ ಹುಣ್ಣಿಮೆ ಹಬ್ಬ ಆಚರಿಸಿದ ರೈತರು  

ರಾಣೆಬೆನ್ನೂರು 07: ಹೊರವಲಯದ ಜಮೀನುಗಳು ಸೇರಿದಂತೆ, ತಾಲೂಕಿನಾದ್ಯಂತ ರೈತರು ಸೀಗೆ ಹುಣ್ಣಿಮೆ ಹಬ್ಬವನ್ನು ಅತ್ಯಂತ ಸಡಗರ ಮತ್ತು ಸಂಭ್ರಮದೊಂದಿಗೆ ಬಂಧು-ಬಳಗದೆಲ್ಲ ಸೇರಿ, ಸಂಭ್ರಮದೊಂದಿಗೆ ಆಚರಿಸಿದರು.  

ರೈತರು ಜಮೀನಿನಲ್ಲಿ ಬನ್ನಿ ಮಹಾಂಕಾಳಿಗೆ ಹಾಗೂ ಕೌರವರು, ಪಾಂಡವರ ಹೆಸರಿನಲ್ಲಿ ಕಲ್ಲಿನ ಮೂರ್ತಿಗಳಿಗೆ ಮತ್ತು ಭೂತಾಯಿಗೆ ಪೂಜೆ ಸಲ್ಲಿಸಿದರು. ಪ್ರತೀವರ್ಷವೂ ಚೆನ್ನಾಗಿ ಮಳೆ ಸುರಿದು ಬೆಳೆಗಳು ಸಮೃದ್ದಿಯಾಗಿ ಬರಲಿ ಮತ್ತು ಸಕಲ ಜೀವ ರಾಶಿಗಳು ನೆಮ್ಮದಿಯಾಗಿ ಬದುಕಲೆಂದು ಹಾರೈಸಿ ರೈತರು ಭೂತಾಯಿಗೆ ರೊಟ್ಟಿ, ಚಟ್ನಿ, ಪಲ್ಯ, ಹಪ್ಪಳ, ಸಂಡಿಗೆ, ಉಂಡಿಗಡಬು, ಕರಿಗಡಬು, ಶೇಂಗಾ ಹೋಳಿಗೆ, ಎಳ್ಳು ಹೋಳಿಗೆ ಚೆರಗ ಚೆಲ್ಲಿದರು.  

ರೈತ ಬಾಂಧವರು ಐದು ಸುತ್ತು ಭೂತಾಯಿಗೆ ಪ್ರದಕ್ಷಿಣಿ ಹಾಕುವ ಮೂಲಕ ಹೂಲಿಗೊ..ಹೂ ಲಿಗೂ.. ವಿವಿಧ ಭಕ್ಷ ಬೋಜನೆಗಳಿಂದ ತಯಾರಿಸಿದ  ಎಡೆಯನ್ನು ಚರಗದ ರೂಪದಲ್ಲಿ ಭಕ್ತಿ ಮತ್ತು ಭಾವದೊಂದಿಗೆ ಭೂತಾಯಿಗೆ ಸಮರ​‍್ಿಸಿ ಧನ್ಯತೆ ಪಡೆದರು. ತದನಂತರ ರೈತ ಬಾಂಧವರು ಹಾಗೂ ಕುಟುಂಬ ಸದಸ್ಯರು ಎಲ್ಲರೂ ಒಂದು ಕಡೆಗೆ ಕುಳಿತು ಊಟವನ್ನು ಸವಿಯುವ ದೃಶ್ಯವು ಎಲ್ಲೆಡೆಯೂ  ಕಂಡು ಬಂದಿತು.