ಲೋಕದರ್ಶನ ವರದಿ 

ಮಾಂಜರಿ 08: ಚಿಕ್ಕೋಡಿ ತಾಲ್ಲೂಕಿನ ನಣದಿವಾಡಿ ಗ್ರಾಮದ ಬಡ ರೈತ ದಂಪತಿ ಕೇದಾರಿ ನಾಯಿಕ ಹಾಗೂ ಅವರ ಪತ್ನಿ ಕವಿತಾ ಅವರ ಬದುಕು ಕೃಷಿಯನ್ನೇ ಅವಲಂಬಿಸಿದೆ. ದಂಪತಿಗೆ ಮೂರು ಎಕರೆ ಜಮೀನು ಇದ್ದು, ಮಳೆಗಾಲ ಆರಂಭವಾಗಿರುವುದರಿಂದ ಹೊಲ ಹದ ಮಾಡಲು ಹಾಗೂ ಬಿತ್ತನೆಗೆ ಸಿದ್ಧತೆ ನಡೆಸುವುದು ಅನಿವಾರ್ಯವಾಗಿದೆ.  ಆದರೆ ಟ್ರ್ಯಕ್ಟರ್ ಬಾಡಿಗೆಗೆ ಪಡೆಯಲು ಹಾಗೂ ಕನಿಷ್ಠ ಎತ್ತುಗಳನ್ನು ಬಾಡಿಗೆಗೆ ಪಡೆದು ಕೃಷಿ ಮಾಡಲು ಕೂಡ ಹಣವಿಲ್ಲದ ಪರಿಸ್ಥಿತಿ ಎದುರಾಗಿದೆ. ಸಮಯ ಕೈತಪ್ಪಬಾರದೆಂಬ ಕಾರಣಕ್ಕೆ ದಂಪತಿ ಸಾಹಸಕ್ಕೆ ಮುಂದಾಗಿ, ಪತ್ನಿ ಕವಿತಾ ಸ್ವತಃ ನೇಗಿಲಿನ ಸ್ಥಾನದಲ್ಲಿ ನಿಂತು ಎಳೆಯುತ್ತಿದ್ದರೆ, ಪತಿ ಕೇದಾರಿ ನಾಯಿಕ ನೇಗಿಲು ಹಿಡಿದು ಹೊಲ ಉಳುಮೆ ಮಾಡಿದ್ದಾರೆ.  

ಕಡುಬಡತನದ ನಡುವೆಯೂ ಕೃಷಿಯ ಮೇಲಿನ ಪ್ರೀತಿ ಮತ್ತು ಬದುಕು ಕಟ್ಟಿಕೊಳ್ಳುವ ಛಲದಿಂದ ಈ ದಂಪತಿ ಕೈಗೊಂಡ ಕಾರ್ಯ ಸ್ಥಳೀಯರ ಗಮನ ಸೆಳೆದಿದೆ. ದೃಶ್ಯ ಕಂಡ ಸ್ಥಳೀಯರು ಹಾಗೂ ಸಾರ್ವಜನಿಕರು ತೀವ್ರ ಆಘಾತ ವ್ಯಕ್ತಪಡಿಸಿದ್ದು, ರೈತರ ಸಂಕಷ್ಟಕ್ಕೆ ಸರ್ಕಾರದ ಯೋಜನೆಗಳು ತಲುಪುತ್ತಿವೆಯೇ ಎಂಬ ಪ್ರಶ್ನೆ ಎತ್ತಿದ್ದಾರೆ.  ಬಡ ರೈತ ಕುಟುಂಬದ ಸಂಕಷ್ಟವನ್ನು ಸರ್ಕಾರ ಹಾಗೂ ಕೃಷಿ ಇಲಾಖೆ ತಕ್ಷಣ ಗಮನಿಸಿ, ಅಗತ್ಯ ನೆರವು ಮತ್ತು ಸೌಲಭ್ಯ ಒದಗಿಸಬೇಕು ಎಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.