ಹಾವೇರಿ 16 :  ನಗರದ ಹೊಸಮಠದಲ್ಲಿ ಭಾರತ ರತ್ನ, ಸಂವಿಧಾನ ಶಿಲ್ಪಿ ಡಾ.ಬಿ.ಆರ್ ಅಂಬೇಡ್ಕರ್ ಅವರ 135 ನೇ ಜಯಂತಿಯನ್ನು ಆಚರಿಸಲಾಯಿತು.  ಶ್ರೀಮಠದಲ್ಲಿ ಡಾ.ಬಿ.ಆರ್ ಅಂಬೇಡ್ಕರ್ ಅವರ ಭಾವಚಿತ್ರಕ್ಕೆ ಪುಷ್ಪ ನಮನ ಸಲ್ಲಿಸಿ ಮಾತನಾಡಿದ ಹೊಸಮಠದ ಬಸವಶಾಂತಲಿಂಗ ಸ್ವಾಮಿಗಳು ಡಾ.ಬಿ.ಆರ್ ಅಂಬೇಡ್ಕರ್ ಅವರು 12 ಶತಮಾನದಲ್ಲಿ ಬಸವಣ್ಣನವರಂತೆ 20ನೇ ಶತಮಾನದಲ್ಲಿ ವಿಶ್ವ ನಾಯಕರಾಗಿ ಬೆಳೆದವರು. ಅವರು ಅಪಾರ ಜ್ಞಾನ ಪಾಂಡಿತ್ಯವನ್ನು ಹೊಂದಿದ್ದರು. ಭಾರತೀಯರು ಎಲ್ಲರೂ ಒಪ್ಪುವಂತಹ ಶ್ರೇಷ್ಠ ಸಂವಿಧಾನವನ್ನು ನೀಡಿ ಭಾರತದ ಉಜ್ವಲ ಭವಿಷ್ಯಕ್ಕೆ ಭದ್ರ ಬುನಾದಿ ಹಾಕಿದಂತಾಗಿದೆ. ಕಷ್ಟಕರ ಬದುಕಿನ ನಡುವೆಯೂ ಸಾಧನೆ ಮಾಡಿದ ಮಹಾನ್ ನೇತಾರಾಗಿ ನಮ್ಮೆಲ್ಲರಿಗೂ ಹೆಮ್ಮೆಯ ವ್ಯಕ್ತಿತ್ವ ಹೊಂದಿದ ಡಾ.ಬಿ.ಆರ್ ಅಂಬೇಡ್ಕರ್ ಸದಾ ಸ್ಮರಣೀಯರಾಗಿದ್ದಾರೆ ಎಂದು ಶ್ರೀಗಳು ಅಂಬೇಡ್ಕರ್ ಅವರ ಬದುಕಿನ ಬಗ್ಗೆ ಮಾತನಾಡಿದರು. 

       ನಿವೃತ್ತ ಮುಖ್ಯೋಪಾಧ್ಯಾಯರಾದ ಹನಮಂತಗೌಡ ಗೊಲ್ಲರ ಮಾತನಾಡಿ ಡಾ. ಬಿ ಆರ್ ಅಂಬೇಡ್ಕರ್ ಅವರು ಮಹಾನ್ ಮೇಧಾವಿಗಳಾಗಿ ಆದರ್ಶದ ಬದುಕಿನೊಂದಿಗೆ ಭಾರತಕ್ಕೆ ಹೆಮ್ಮೆಯ ಸಂವಿಧಾನವನ್ನು ರಚನೆ ಮಾಡುವಲ್ಲಿ ಯಶಸ್ವಿಯಾದರು. ಸಂವಿಧಾನವನ್ನು ಪಾಲಿಸುವ ಮೂಲಕ ಜವಾಬ್ದಾರಿಯುತ ಪ್ರಜೆಗಳಾಗಬೇಕಿದೆ. ಅಂಬೇಡ್ಕರ್ ಅವರ ಬದುಕಿನ ಮೌಲ್ಯಗಳನ್ನು ನಾವೆಲ್ಲರೂ ಪಾಲಿಸೋಣ ಎಂದರು. ಈ ಸಂದರ್ಭದಲ್ಲಿ ಮುಖಂಡರಾದ ಉಡಚಪ್ಪ ಮಾಳಗಿ, ಪರಶುರಾಮ ಹರ್ಲಾಪುರ,ನಿಂಗಪ್ಪ ಆರೇರ,ಶಾಹೀದ ದೇವಿಹೂಸೂರ, ನವೀದ ಅಮ್ಮಿನಬಾವಿ,ಕಿಶೋರ ಖಂಡೇವಾಲೆ ಹಾಗೂ ಇತರರು ಇದ್ದರು.