ರಾಯಬಾಗ 09: ರೈತರ ವಿವಿಧ ಬೇಡಿಕೆ ಈಡೇರಿಸಲು ಆಗ್ರಹಿಸಿ ಡಿ.11 ರಂದು ಬೆಳ್ಳಿಗ್ಗೆ 11 ಗಂಟೆಗೆ ಬೆಳಗಾವಿ ಸುವರ್ಣ ವಿಧಾನಸೌಧ ಮುಂಭಾಗದಲ್ಲಿ ಪ್ರತಿಭಟನೆ ಹಮ್ಮಿಕೊಂಡಿದ್ದು ಹೆಚ್ಚಿನ ಸಂಖ್ಯೆಯಲ್ಲಿ ರೈತರು ಭಾಗವಹಿಸಿ ಹೋರಾಟ ಯಶಸ್ಸುಗೊಳಿಸಬೇಕೆಂದು ರೈತ ಸಂಘದ ಚಿಕ್ಕೋಡಿ ಜಿಲ್ಲಾಧ್ಯಕ್ಷ ಮಲ್ಲಪ್ಪ ಅಂಗಡಿ ಕರೆ ನೀಡಿದರು. 

ಮಂಗಳವಾರ ಪಟ್ಟಣದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಹೈನುಗಾರಿಕೆ ಮಾಡುವ ರೈತರು ಆರ್ಥಿಕ ನಷ್ಟದಲಿದ್ದು, ಎಮ್ಮೆ ಹಾಲಿಗೆ ರೂ. 100 ಮತ್ತು ಆಕಳು ಹಾಲಿಗೆ 70 ಹೆಚ್ಚಿಸಬೇಕು, ರೈತರ ಸಾಲ ಮನ್ನಾ ಮಾಡಿ, ರೈತರನ್ನು ಸಾಲ ಋಣ ಮುಕ್ತರನ್ನಾಗಿ ಮಾಡಬೇಕು. ಟಿ.ಸಿ.(ವಿದ್ಯುತ ಪರಿವರ್ತಕ) ಗಳನ್ನು ಅಕ್ರಮ ಸಕ್ರಮ ಮಾಡಿ ರೈತರಿಗೆ ಅನುಕೂಲ ಮಾಡಿಕೊಡುವಂತೆ ಸರ್ಕಾರವನ್ನು ಒತ್ತಾಯಿಸಲು ಪ್ರತಿಭಟನೆ ಹಮ್ಮಿಕೊಂಡಿರುವುದಾಗಿ ತಿಳಿಸಿದರು.  

ತಾಲೂಕಾಧ್ಯಕ್ಷ ರಮೇಶ ಕಲ್ಹಾರ, ಜಿ.ಪಂ.ಮಾಜಿ ಸದಸ್ಯ ನಿಂಗಪ್ಪ ಪಕಾಂಡಿ, ಜಿಲ್ಲಾ ಕಾರ್ಯದರ್ಶಿ ಶ್ರೀಶೈಲ ಅಂಗಡಿ, ಕಲ್ಲನಗೌಡ ಪಾಟೀಲ, ಮಹಾದೇವ ಹೊಳ್ಕರ, ವಿಜಯ ನಾಯಿಕ, ಹನುಮಂತ ನಾಯಿಕ, ಮಾರುತಿ ಅರಭಾವಿ, ರಮೇಶ ಪಾಟೀಲ, ಲಕ್ಕಪ್ಪ ಜೋಡಟ್ಟಿ, ರಮೇಶ ಚೌಗಲಾ, ಅಜೀತ ಜಾಧವ, ಸಿದ್ರಾಮ ನಾಯಿಕ ಸೇರಿ ಅನೇಕ ರೈತರು ಇದ್ದರು.