ನವದೆಹಲಿ, ನ 15 :       ಅಕ್ರಮ ಹಣ ವರ್ಗಾವಣೆ   ನಿಗ್ರಹ  ಕಾಯ್ದೆ  ಸಂಬಂಧಿಸಿದ ಪ್ರಕರಣದಲ್ಲಿ   ಹಿರಿಯ ಕಾಂಗ್ರೆಸ್ ನಾಯಕ ಡಿ.ಕೆ. ಶಿವಕುಮಾರ್ ಅವರಿಗೆ ದೆಹಲಿ ಹೈಕೋರ್ಟ್  ಜಾಮೀನು ಮಂಜೂರು ಮಾಡಿರುವ ಆದೇಶ ಪ್ರಶ್ನಿಸಿ, ಜಾರಿ ನಿರ್ದೇಶನಾಲಯ  ಸಲ್ಲಿಸಿರುವ ಆರ್ಜಿಯನ್ನು  ಸುಪ್ರೀಂ ಕೋರ್ಟ್ ವಜಾ ಗೊಳಿಸಿದೆ.  

ನ್ಯಾಯಮೂರ್ತಿಗಳಾದ  ಆರ್.ಎಫ್ ನಾರೀಮನ್ ಹಾಗೂ  ಎಸ್. ರವೀಂದ್ರ ಭಟ್ ಅವರನ್ನೊಳಗೊಂಡ ನ್ಯಾಯಪೀಠ,  ಜಾರಿ ನಿರ್ದೇಶನಾಲಯದ ಪರವಾಗಿ  ಹಾಜರಾಗಿ   ಸಾಲಿಸಿಟರ್ ಜನರಲ್  ತುಷಾರ್ ಮೆಹ್ತಾ  ಸಲ್ಲಿಸಿದ್ದ ಮನವಿಯನ್ನು  ವಜಾಗೊಳಿಸಿದೆ. 

ಕಾಂಗ್ರೆಸ್  ನಾಯಕ ಪಿ. ಚಿದಂಬರಂ ವಿರುದ್ದ ಮನವಿಯಲ್ಲಿ  ಸಲ್ಲಿಸಲಾದ  ವಾದವನ್ನೇ  ಈ ಪ್ರಕರಣದಲ್ಲೂ ಕಾಪಿ ಪೇಸ್ಟ್ ಮಾಡುತ್ತಿದ್ದೀರಾ ಎಂದು  ಜಾರಿ ನಿರ್ದೇಶನಾಲಯನವನ್ನು  ಸುಪ್ರೀಂ ಕೋರ್ಟ್ ತೀವ್ರ  ತರಾಟೆಗೆ ತೆಗೆದುಕೊಂಡಿತು. 

ಆದಾಯ ತೆರಿಗೆ  ಇಲಾಖೆ ದಾಳಿ ಆಧಾರದ ಮೇಲೆ  ಜಾರಿ ನಿರ್ದೇಶನಾಲಯ  ತಮ್ಮ ವಿರುದ್ದ  ಸಲ್ಲಿಸಿರುವ  ದೋಷಾರೋಪಪಟ್ಟಿಯನ್ನು  ರದ್ದುಪಡಿಸಬೇಕೆಂದು  ಕೋರಿ  ಡಿ.ಕೆ. ಶಿವಕುಮಾರ್ ಸಲ್ಲಿಸಿದ್ದ  ಆರ್ಜಿ ಸಂಬಂಧ  ಸರ್ವೋಚ್ಛ ನ್ಯಾಯಾಲಯ   ಜಾರಿ ನಿರ್ದೇಶನಾಲಯಕ್ಕೆ   ನೋಟೀಸ್ ಜಾರಿ ಮಾಡಿದೆ.

ಡಿ.ಕೆ. ಶಿವಕುಮಾರ್ ಅವರಿಗೆ  ಕಳೆದ ಅಕ್ಟೋಬರ್  23ರಂದು  ದೆಹಲಿ ಹೈಕೋರ್ಟ್  ಮಂಜೂರು ಮಾಡಿರುವ ಜಾಮೀನು ಆದೇಶವನ್ನು  ಜಾರಿ ನಿರ್ದೇಶನಾಲಯ ಸುಪ್ರೀಂ ಕೋರ್ಟ್ ನಲ್ಲಿ ಪ್ರಶ್ನಿಸಿ,  ಕಾಂಗ್ರೆಸ್ ನಾಯಕ  ಪ್ರಕರಣದ ಸಾಕ್ಷ್ಯ ಪುರಾವೆಗಳನ್ನು  ನಾಶಗೊಳಿಸಬಹುದು ಎಂದು  ಕಳವಳ ವ್ಯಕ್ತಪಡಿಸಿತ್ತು.

ಅಕ್ರಮ ಹಣ ವರ್ಗಾವಣೆ ನಿಗ್ರಹ  ಕಾಯ್ದೆಯಡಿಯಡಿ   ನವದೆಹಲಿಯ  ಕರ್ನಾಟಕ  ಭವನದ ಉದ್ಯೋಗಿ  ಹನುಮಂತಯ್ಯ ಮತ್ತಿತರೊಂದಿಗೆ   ಡಿ.ಕೆ. ಶಿವಕುಮಾರ್  ವಿರುದ್ದ    ಜಾರಿ ನಿರ್ದೇಶನಾಲಯ ಪ್ರಕರಣ ದಾಖಲಿಸಿತ್ತು.