- ಪಾರೇಶ ಭೋಸಲೆ

ಬೆಳಗಾವಿ: 'ಜನ ಮರಳೋ ಜಾತ್ರೆ ಮರಳೋ' ಎನ್ನುವ ದೃಶ್ಯ ನಗರದ ಮಾರುಕಟ್ಟೆಯಲ್ಲಿ ಸೋಮವಾರ ಕಂಡು ಬಂದಿತು. ಇದಕ್ಕೆ ಕಾರಣ ಕೊರೊನಾ ಸೋಂಕಿತರು ಜಿಲ್ಲೆಯಲ್ಲಿ ದಿನ ದಿನಕ್ಕೆ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ನಗರದಲ್ಲಿ ಮತ್ತೆ ಮಂಗಳವಾರದಿಂದ ರಾಜ್ಯ ಸರಕಾರ ಮತ್ತು ಜಿಲ್ಲಾಡಳಿತವು ಲಾಕ್ಡೌನ್ ಹೇರುವ ವದ್ದಂತಿಯಿಂದ ಜನ ದಿನಸಿ ವಸ್ತುಗಳನ್ನು ಖರೀದಿಸಲು ಮುಗಿ ಬಿದ್ದಿದ್ದರು.

ರಾಜ್ಯ ಸೇರಿದಂತೆ ಜಿಲ್ಲೆಯಲ್ಲಿ ಮತ್ತೆ ಲಾಕ್ಡೌನ್ ಹೇರುವ ಗಾಳಿ ಸುದ್ದಿ ಕೇಳಿದ ನಗರದ ಜನ ಮಾರುಕಟ್ಟೆಯಲ್ಲಿ ದಿನಸಿ ವಸ್ತುಗಳ ಖರೀದಿಯಲ್ಲಿ ನಿರತವಾಗಿರುವದು ಸೋಮವಾರ ಕಂಡು ಬಂದಿತು. ಎತ್ತ ನೋಡಿದರತ್ತ ಜನವೋ ಜನ ಕಂಡು ಬಂದಿತು. ಕೊರೊನಾಕ್ಕೆ ಕಡಿವಾಣ ಹಾಕುವುದಕ್ಕಾಗಿ ರಾಜ್ಯದಾದ್ಯಂತ ನಾಳೆಯಿಂದಲೇ ಲಾಕ್ಡೌನ್ ಮಾಡಲಾಗುತ್ತದೆ ಎಂಬ ವದಂತಿ ಬೆನ್ನು ಬಿದ್ದ ಜನ ಮನೆಯಲ್ಲಿ ಅಗತ್ಯ ಸಾಮಾಗ್ರಿಗಳನ್ನು ಕೊಳ್ಳುವುದಕ್ಕಾಗಿ ಮಾರುಕಟ್ಟೆಗೆ ಮುಗಿಬಿದ್ದಿದ್ದಾರೆ. 

ಜಿಲ್ಲೆಯಲ್ಲಿ ನಾಳೆಯಿಂದ ಲಾಕ್ಡೌನ್ ಇಲ್ಲವಾದರೂ ಜನ ಮಾತ್ರ ವದಂತಿಗೆ ಕಿವಿಕೊಟ್ಟು ಖರೀದಿಗೆ ತೊಡಗಿದ್ದಾರೆ. ಮಂಗಳವಾರ ಹೇಗಿದ್ದರೂ ಬೆಳಗಾವಿ ಮಾರುಕಟ್ಟೆ ಬಂದ್ ಇರುವುದರಿಂದ ಇಂದೇ ತರಾತುರಿಯಲ್ಲಿ ಸಾಲ ಸೋಲ ಮಾಡಿಯಾದರೂ ಮನೆಗೆ ದಿನಸಿ ಸಾಮಾನು ತುಂಬಿಸಿಕೊಳ್ಳುವುದಕ್ಕೆ ಮಾರುಕಟ್ಟೆಗೆ ಬಂದವರ ಸಂಖ್ಯೆಯೇ ಜಾಸ್ತಿಯಾಗಿತ್ತು. ಹಾಗಾಗಿ ಬೆಳಗಾವಿ ನಗರದ ಪ್ರಮುಖ ಮಾರುಕಟ್ಟೆ ರವಿವಾರ ಪೇಟೆಯಲ್ಲಿ ಕಾಲಿಡಲೂ ಜಾಗವಿಲ್ಲದಷ್ಟು ಜನದಟ್ಟನೆ ಕಂಡು ಬಂತು.

ಇನ್ನು ಹೀಗೆ ಮಾರುಕಟ್ಟೆಯಲ್ಲಿ ಖರೀದಿಗೆ ಬಂದವರಲ್ಲಿ ಕೇವಲ ಮನೆಮಟ್ಟಕ್ಕೆ ಕೊಂಡೊಯ್ಯುವವರು ಮಾತ್ರವಲ್ಲ; ಗಲ್ಲಿಗಳಲ್ಲಿ ಅಂಗಡಿ ನಡೆಸುವ ಚಿಕ್ಕಪುಟ್ಟ ವ್ಯಾಪಾರಿಗಳು ಹೆಚ್ಚಾಗಿದ್ದರು. ಲಾಕ್ಡೌನ್ ಆದರೆ ನಂತರ ಖರೀದಿ ಕಷ್ಟ ಎಂಬ ಕಾರಣಕ್ಕೆ ಈಗಲೇ ಖರೀದಿಸಿಟ್ಟುಕೊಳ್ಳುವ ಮುಂಜಾಗ್ರತೆ ಅವರಲ್ಲಿತ್ತು. ಆದರೆ ಹೀಗೆ ಖರೀದಿಗೆ ಬಂದ ಹಲವರು ಕೂಡಾ ಸಾಮಾಜಿಕ ಅಂತರನ್ನು ಕಾಯ್ದುಕೊಂಡಿರಲೇ ಇಲ್ಲ; ಮುಖಕ್ಕೆ ಮಾಸ್ಕ್ ಕೂಡಾ ಧರಿಸಿರಲಿಲ್ಲ ಎಂಬುದು ದುರಂತದ ವಿಚಾರ. ಕೊರೊನಾ ಕಡಿಮೆ ಮಾಡುವುದಕ್ಕಾಗಿ ಲಾಕ್ಡೌನ್ ಯೋಜನೆ ನಡೆಸಲಾಗುತ್ತಿದೆ. ಆದರೆ ಈಗ ಲಾಕ್ಡೌನ್ ವದಂತಿಯಿಂದ ಕೊರೊನಾ ಇನ್ನಷ್ಟು ಹರಡುವಂತಾಯಿತು ಎಂದರೆ ಖಂಡಿತಾ ಸುಳ್ಳಲ್ಲ!