ಬರ್ಗಮೆನ್‌-102 ಸಹಿಷ್ಣುತೆ ಪರೀಕ್ಷೆಯಲ್ಲಿ ಪ್ರಥಮ 

ಕೊಲ್ಹಾರ 05: ಬೆಳಗಾವಿ ನಗರ ಮೀಸಲು ಪೊಲೀಸ್ ಪಿಎಸ್‌ಐ ಆಗಿರುವ ಕೊಲ್ಹಾರ ಪಟ್ಟಣದ ಸಂಗಮೇಶ ಆನಿ ಅವರು ಮೈಸೂರಿನಲ್ಲಿ ಇತ್ತಿಚೆಗೆ ಜರುಗಿದ ಪ್ರತಿಷ್ಠಿತ "ಬರ್ಗಮೆನ್‌-102" ಸಹಿಷ್ಣುತೆ ಪರೀಕ್ಷೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿ, 16-30 ವರ್ಷ ವಯೋಮಾನದ ವಿಭಾಗದಲ್ಲಿ ಪ್ರಥಮ ಸ್ಥಾನ ಪಡೆದು ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ. 

ಕೇವಲ 6 ಗಂಟೆ 30 ನಿಮಿಷಗಳಲ್ಲಿ 2 ಕಿ.ಮೀ ಈಜು, 80 ಕಿ.ಮೀ ಸೈಕ್ಲಿಂಗ್ ಹಾಗೂ 20 ಕಿ.ಮೀ ಓಟವನ್ನು ಪೂರ್ಣಗೊಳಿಸುವ ಮೂಲಕ ತಮ್ಮ ಅಸಾಧಾರಣ ದೈಹಿಕ ಸದೃಢತೆ ಮತ್ತು ಶಿಸ್ತನ್ನು ಸಾಬೀತುಪಡಿಸಿದ್ದಾರೆ. ಸಂಗಮೇಶ ಆನಿ ಅವರ ಶ್ಲಾಘನೀಯ ಸಾಧನೆಗೆ ಬೆಳಗಾವಿ ನಗರ ಪೊಲೀಸ್ ಇಲಾಖೆಯ ಹಿರಿಯ ಅಧಿಕಾರಿಗಳು ಹಾಗೂ ಸಹೋದ್ಯೋಗಿಗಳು ಹಾರ್ದಿಕವಾಗಿ ಅಭಿನಂದಿಸಿದ್ದಾರೆ. ಕೊಲ್ಹಾರದ ಗುರುಹಿರಿಯರು, ಗ್ರಾಮಸ್ಥರು ಹರ್ಷ ವ್ಯಕ್ತಪಡಿಸಿದ್ದಾರೆ.