ಬೆಂಗಳೂರು ನಗರದಲ್ಲಿ ಭದ್ರತಾ ಆತಂಕ ಉಂಟಾಗುವಂತಹ ಘಟನೆ ನಿನ್ನೆ ಸಂಭವಿಸಿದೆ. ನಗರ ಪೊಲೀಸ್ ಆಯುಕ್ತರ ಅಧಿಕೃತ ಇ-ಮೇಲ್‌ಗೆ ‘ಜೈಶ್-ಎ-ಮೊಹಮ್ಮದ್’ ಸಂಘಟನೆಯ ಹೆಸರಿನಲ್ಲಿ ಬಂದಿದ್ದ ಬೆದರಿಕೆ ಪತ್ರದಲ್ಲಿ, ವಿಮಾನ ನಿಲ್ದಾಣ ಮತ್ತು ಹಲವಾರು ಪ್ರಮುಖ ಮಾಲ್‌ಗಳಲ್ಲಿ ಸಂಜೆ 7 ಗಂಟೆಯ ನಂತರ ಸ್ಫೋಟಗಳು ಸಂಭವಿಸಬಹುದು ಎಂದು ಹೇಳಲಾಗಿದೆ.

ಈ ಬೆದರಿಕೆಯ ಮೇಲೆ ತಕ್ಷಣವೇ ಪೊಲೀಸರು ಎಚ್ಚರಗೊಂಡು, ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ಸೇರಿದಂತೆ ನಗರದಲ್ಲಿರುವ ಲುಲು ಮಾಲ್, ಓರಿಯನ್ ಮಾಲ್, ಫೋರಂ ಮಾಲ್, ಮಂತ್ರಿ ಮಾಲ್ ಮುಂತಾದ ಸ್ಥಳಗಳಲ್ಲಿ ಭದ್ರತಾ ಸಿಬ್ಬಂದಿ ಮತ್ತು ಸ್ಫೋಟಕ ಪತ್ತೆ ದಳಗಳನ್ನು ಹೆಚ್ಚುವರಿ ಸಂಖ್ಯೆಯಲ್ಲಿ ನಿಯೋಜಿಸಿದರು.

ಪೋಲೀಸರು ದಾಖಲಿಸಿದ ಮೊದಲ ಮಾಹಿತಿಯ ಪ್ರಕಾರ, ಈ ಇ-ಮೇಲ್ “ಮೊಹಿತ್ ಕುಮಾರ್” ಎಂಬ ಹೆಸರಿನಿಂದ ಕಳುಹಿಸಲಾಗಿದೆ. ಕಳುಹಿಸಿದವರ ಗುರುತು, ಸ್ಥಳ ಮತ್ತು ಬಳಕೆಯ ಸಾಧನವನ್ನು ಪತ್ತೆ ಹಚ್ಚಲು ಸೈಬರ್ ತಜ್ಞರು ಮತ್ತು ತನಿಖಾಧಿಕಾರಿಗಳು ಕಾರ್ಯಾರಂಭಿಸಿದ್ದಾರೆ.

ಪರಿಶೀಲನೆ ವೇಳೆ ಯಾವುದೇ ಅಪಾಯಕಾರಿ ವಸ್ತು ಪತ್ತೆಯಾಗದಿದ್ದರೂ, ಸಾರ್ವಜನಿಕರ ಸುರಕ್ಷತೆಗಾಗಿ ಎಲ್ಲಾ ಮಾಲ್‌ಗಳು ಮತ್ತು ವಿಮಾನ ನಿಲ್ದಾಣದಲ್ಲಿ ಕಟ್ಟುನಿಟ್ಟಿನ ಭದ್ರತಾ ಪರಿಶೀಲನೆ ಮುಂದುವರಿಯುತ್ತಿದೆ. ಅಧಿಕಾರಿಗಳು ಜನರು ಗಾಬರಿಯಾಗದೆ, ಏನಾದರೂ ಅನುಮಾನಾಸ್ಪದ ವಸ್ತು ಅಥವಾ ವ್ಯಕ್ತಿಯನ್ನು ಕಂಡರೆ ತಕ್ಷಣ ಪೊಲೀಸರಿಗೆ ತಿಳಿಸಲು ಕರೆ ನೀಡಿದ್ದಾರೆ.

ದೇಶದ ಇತ್ತೀಚಿನ ಭದ್ರತಾ ಪರಿಸ್ಥಿತಿ ಹಿನ್ನೆಲೆಯಲ್ಲಿ ಬಂದಿರುವ ಈ ಬೆದರಿಕೆಯನ್ನು ಪೊಲೀಸ್ ಅಧಿಕಾರಿಗಳು ಅತ್ಯಂತ ಗಂಭೀರವಾಗಿ ಪರಿಗಣಿಸಿದ್ದು, ಇ-ಮೇಲ್ ಮೂಲ ಮತ್ತು ನಿಜಾಸ್ತಿತ್ವವನ್ನು ಪತ್ತೆಹಚ್ಚುವ ಕಾರ್ಯ ತೀವ್ರಗೊಳಿಸಲಾಗಿದೆ.