ಬಸವರಾಜ ಕಟ್ಟೀಮನಿಯವರ ಸಾಹಿತ್ಯ ಜನರ ನೋವಿನ ದನಿ: ದಳವಾಯಿ 

ಯರಗಟ್ಟಿ 13: ನೇರ ನಿಷ್ಠುರ ಮಾತು-ಕೃತಿಯ ಅಪರೂಪದ ಬರಹಗಾರ ಬಸವರಾಜ ಕಟ್ಟೀಮನಿಯವರ ಸಾಹಿತ್ಯವು ನಾಲ್ಕು ಗೋಡೆಗಳ ಮಧ್ಯೆ ಕುಳಿತು ಬರೆದ ಕಾಲ್ಪನಿಕ ಸಾಹಿತ್ಯವಾಗಿರದೆ ಜನರ ನಡುವೆ ಇದ್ದು, ಅವರ ನೋವು-ನಲಿವುಗಳಿಗೆ ಸ್ಪಂದಿಸಿದ ಮಾನವೀಯ ಸಾಹಿತ್ಯವಾಗಿದೆ ಎಂದು ಬಸವರಾಜ ಕಟ್ಟೀಮನಿ ಪ್ರತಿಷ್ಠಾನದ ಸದಸ್ಯ ವಿಠಲ ದಳವಾಯಿಯವರು ಹೇಳಿದರು. 

ಬಸವರಾಜ ಕಟ್ಟೀಮನಿ ಪ್ರತಿಷ್ಠಾನ, ಬೆಳಗಾವಿ ಹಾಗೂ ಪಟ್ಟಣದ ಸಿ.ಎಂ. ಮಾಮನಿ ಸರಕಾರಿ ಪ್ರಥಮ ದರ್ಜೆ ಕಾಲೇಜಿನ ಕನ್ನಡ ವಿಭಾಗದ ಸಹಯೋಗದಲ್ಲಿ ಆಯೋಜಿಸಿದ 'ಕಟ್ಟೀಮನಿ ಕಥಿ ಹೇಳೂಣು' ಎಂಬ ಬಸವರಾಜ ಕಟ್ಟೀಮನಿ ಕಥೆಗಳನ್ನು ಹೇಳುವ ವಿನೂತನ ಸ್ಪರ್ಧೆ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಕಟ್ಟೀಮನಿಯವರು ತಾವು ಕಂಡುಂಡ ನೋವುಗಳನ್ನು ಯಥಾವತ್ತಾಗಿ ಕಥೆ-ಕಾದಂಬರಿ ರೂಪದಲ್ಲಿ ಅಭಿವ್ಯಕ್ತಿಸಿದರು. ಸೋವಿಯತ್ ಲ್ಯಾಂಡ್ ನೆಹರು ಪ್ರಶಸ್ತಿಗೆ ಭಾಜನರಾದ ಅವರ ಸಮಗ್ರ ಸಾಹಿತ್ಯ ಸಂಪುಟಗಳನ್ನು ಪ್ರತಿಷ್ಠಾನವು ರಿಯಾಯಿತಿ ದರದಲ್ಲಿ ಮಾರಾಟದ ವ್ಯವಸ್ಥೆ ಕಲ್ಪಿಸಿದ್ದು, ಓದುಗರ ಯೋಜನೆಯ ಸದುಪಯೋಗ ಪಡೆದುಕೊಳ್ಳಬೇಕು ಎಂದರು. 

ಕಾಲೇಜಿನ ಹತ್ತಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಬಸವರಾಜ ಕಟ್ಡೀಮನಿಯವರ ಆಯ್ದ ಕಥೆಗಳನ್ನು ತಮ್ಮದೇ ಶೈಲಿಯಲ್ಲಿ ಹೇಳಿದರು.  

ಮಂಜುಳಾ ಆಲದಕಟ್ಟಿ, ಅಂಬಿಕಾ ಕುಂಬಾರ ಹಾಗೂ ಜ್ಯೋತಿ ಪಟ್ಟಣಶೆಟ್ಟಿ ಕ್ರಮವಾಗಿ ಪ್ರಥಮ, ದ್ವಿತೀಯ ಹಾಗೂ ತೃತೀಯ ಸ್ಥಾನಗಳನ್ನು ಪಡೆದರು. ಮಹಾವಿದ್ಯಾಲಯದ ಪ್ರಾಂಶುಪಾಲ ಪ್ರೊ. ರಾಯನಗೌಡ ಮರಿಗೌಡರ ಅವರು ಅಧ್ಯಕ್ಷತೆ ವಹಿಸಿ ಮಾತನಾಡುತ್ತ, ವಿದ್ಯಾರ್ಥಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಬೇಕು. ಕಥೆ ಹೇಳುವುದರಿಂದ ನಮ್ಮ ವಾಕ್ಚಾತುರ್ಯ ವೃದ್ಧಿಸುತ್ತದೆ ಎಂದು ಹೇಳಿದರು. 

ಯರಗಟ್ಟಿ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ತಮ್ಮಣ್ಣ ಕಾಮಣ್ಣವರ,  ಬಸವರಾಜ ಪೂಜೇರ, ಉಮೇಶ್ವರ ಮರಗಾಲ, ಸಂಗಮೇಶ ಸೊಗಲದ ಮತ್ತು ಕಾಲೇಜಿನ ಪ್ರಾಧ್ಯಾಪಕ ಡಾ. ಸುನಂದಾ ಮಾದರ, ಶಂಕರ ಲಗಳಿ, ಶಿದ್ಲಿಂಗಪ್ಪ ಎಸ್‌.ಜಿ. ಹಾಗೂ ಡಾ. ರಾಜಶೇಖರ ಬಿರಾದಾರ ಉಪಸ್ಥಿತರಿದ್ದರು. ಉಪನ್ಯಾಸಕ ವೀರಭದ್ರ​‍್ಪ ದಂಡಿನ ನಿರೂಪಿಸಿದರು. ಸ್ವಾತಿ ಬೇವಿನಕಟ್ಟಿ ಸ್ವಾಗತಿಸಿದರು. ದೈಹಿಕ ಶಿಕ್ಷಣ ನಿರ್ದೇಶಕ ಯಲ್ಲಪ್ಪ ಭರಮನ್ನವರ ವಂದಿಸಿದರು.