ಲೋಕದರ್ಶನ ವರದಿ

ಗದಗ 12 :  ಅವಳಿ ನಗರವಾದ ಗದಗ ಬೆಟಗೇರಿ ನಗರಸಭೆಯ 20, 23,ಹಾಗೂ 25 ನೇ ಕೂಡು ವಾರ್ಡಗಳ ಮಧ್ಯವರ್ತಿ ಸ್ಥಳವಾದ ಹನಮನ ಗರಡಿ 3 ನೇ ನಂಬರ್ ಶಾಲೆಯ ಹತ್ತಿರದಲ್ಲಿನ ಸಾರ್ವಜನಿಕ ಮೂತ್ರಾಲಯದ ಪಕ್ಕದಲ್ಲಿಯ ಕುಡಿಯುವ ನೀರಿನ ಸರಬರಾಜು ಮಾಡುವ ವಾಲ್ವ್‌ ಮೇಲೆಯೇ ಕಸ ಹಾಕುತ್ತಿರುವರು.ಆದರೆ ಕಸ ವಿಲೇವಾರಿಗಾಗಿಯೇ ಎಂದು ಗೌರವಾನ್ವಿತ ಗದಗ ಬೆಟಗೇರಿ ನಗರಸಭೆಯ ವತಿಯಿಂದ ಪೌರ ಕಾರ್ಮಿಕರ ಸಹಕಾರದೊಂದಿಗೆ ಕಸ ವಿಲೇವಾರಿ ವಾಹನದಲ್ಲಿ ಬಡಾವಣೆಯ ಪ್ರತಿಯೊಂದು ಮನೆ ಮನೆಯಿಂದಲೂ ಕಸವನ್ನು ಸಂಗ್ರಹಿಸಿಕೊಂಡು ವಿಲೇವಾರಿ ಮಾಡುವ ಕಾರ್ಯ ನಿರಂತರವಾಗಿ ಜರುಗುತ್ತಿದ್ದರೂ ಪ್ರಜ್ಞಾಹೀನ ನಾಗರಿಕರು ಮಾತ್ರ ಕಸವನ್ನು ಕುಡಿಯುವ ನೀರು ಸರಬರಾಜು ಮಾಡುವ ವಾಲ್ವ್‌ ಮೇಲೆಯೇ ಕಸವನ್ನು ನಿರಾತಂಕವಾಗಿ  ಸುರಿಯುತ್ತಿರುವದನ್ನು ಮನಗಂಡ ಬಡಾವಣೆಯ ಪ್ರಮುಖರಾದ ರಾಘವೇಂದ್ರ ಪಾಲನಕರ ರವರ ನಿರಂತರ ಪರಿಶ್ರಮದ ಮೂಲಕ ಅವೈಜ್ಞಾನಿಕ ಕಸ ವಿಲೇವಾರಿಯನ್ನು ತಡೆಯಲು ಪ್ರಯತ್ನ ಮಾಡಿದರೂ ಕೂಡಾ ಫಲಪ್ರದವಾಗದಿರುವುದನ್ನು ಮನಗಂಡು ಗದಗ ಬೆಟಗೇರಿ ನಗರಸಭೆಯ ಸಹಕಾರದೊಂದಿಗೆ ಬ್ಲಾಕ್ ಸ್ಪಾಟ್ ಗಳಲ್ಲಿ ಮೂರನೇ ಕಣ್ಣು ಎಂದೇ ಖ್ಯಾತವಾಗಿರುವ ಸಿ ಸಿ ಕ್ಯಾಮರಾ ಅಳವಡಿಸುವ ಮೂಲಕ ಬಡಾವಣೆಯಲ್ಲಿ ಅವೈಜ್ಞಾನಿಕವಾಗಿ ಕಸ ವಿಲೇವಾರಿ ಮಾಡುವವರನ್ನು ಗುರುತಿಸಲು ಮುಂದಾಗಿರುವರು.