ಮುಂಡಗೋಡ 10 : ಟಿಬೆಟಿಯನ್ನರ ಪರಮೋಚ್ಚ ಧರ್ಮಗುರು ಹಾಗೂ ನೊಬೆಲ್ ಶಾಂತಿ ಪುರಸ್ಕೃತರಾದ ಪರಮಪೂಜ್ಯ ದಲೈಲಾಮಾ ಅವರು 58 ದಿನಗಳ ಸುದೀರ್ಘ ಮುಂಡಗೋಡ ಭೇಟಿಯನ್ನು ಸೋಮವಾರ ಮುಗಿಸಿ, ಬೆಳಿಗ್ಗೆ 6.50ಕ್ಕೆ ಮುಂಡಗೋಡ ಟಿಬೆಟಿಯನ್ ಕಾಲೋನಿಯಿಂದ ಹುಬ್ಬಳ್ಳಿ ಮಾರ್ಗವಾಗಿ ಧರ್ಮಶಾಲಾಗೆ ಪ್ರಯಾಣ ಬೆಳೆಸಿದರು. ಪ್ರಯಾಣದ ವೇಳೆ ಮಾರ್ಗದ ಎರಡು ಬದಿಗಳಲ್ಲಿ ನೆರೆದಿದ್ದ ಸಾವಿರಾರು ಭೌದ್ಧ ಅನುಯಾಯಿಗಳಿಗೆ ದಲೈಲಾಮಾ ಅವರು ಕೈಬೀಸಿ ಆಶೀರ್ವಾದ ನೀಡಿದರು. ಭಕ್ತರು ಭಾವುಕವಾಗಿ ತಮ್ಮ ಧರ್ಮಗುರುಗೆ ಬೀಳ್ಕೊಟ್ಟರು.

   ಇದೇ ದಿನ ಬೆಳಿಗ್ಗೆ 8.30ಕ್ಕೆ ಹುಬ್ಬಳ್ಳಿಯಿಂದ ವಿಶೇಷ ವಿಮಾನದಲ್ಲಿ ದೆಹಲಿ ತಲುಪಿದ ದಲೈಲಾಮಾ ಅವರು ಅಲ್ಲಿಂದ ಧರ್ಮಶಾಲಾಗೆ ತೆರಳಿದರು. ದಲೈಲಾಮಾ ಅವರ ಪ್ರಯಾಣದ ಹಿನ್ನೆಲೆ ಉತ್ತರ ಕನ್ನಡ ಜಿಲ್ಲಾ ಪೊಲೀಸ್ ಅಧೀಕ್ಷಕ ದೀಪನ್ ಎಂ.ಎನ್‌. ಅವರ ನೇತೃತ್ವದಲ್ಲಿ ಕಟ್ಟುನಿಟ್ಟಿನ ಭದ್ರತಾ ವ್ಯವಸ್ಥೆ ಜಾರಿಗೊಳಿಸಲಾಗಿತ್ತು. ಈ ಸಂದರ್ಭದಲ್ಲಿ ಹೆಚ್ಚುವರಿ ಎಸ್ಪಿ ಜಿ. ಕೃಷ್ಣಮೂರ್ತಿ, ಡಿವೈಎಸ್ಪಿ ಗೀತಾ ಪಾಟೀಲ್, ತಹಶೀಲ್ದಾರ್ ಶಂಕರ್ ಗೌಡಿ, ಸಿಪಿಐ ರಂಗನಾಥ್ ನೀಲಮ ನವರ ಸೇರಿದಂತೆ ಪೊಲೀಸ್ ಹಾಗೂ ಆಡಳಿತದ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.