ತಾಳಿಕೋಟೆ, ಜು. 3: ವೈದ್ಯರು ರೋಗಿಗಳ ಜೀವ ರಕ್ಷಣೆಗಾಗಿ ಶ್ರಮಿಸುತ್ತಿದ್ದು, ಅವರ ಮೇಲೆ ವಿನಾಕಾರಣ ದೂಷಣೆ ಮಾಡುವುದು ಸರಿಯಲ್ಲ ಎಂದು ತಾಳಿಕೋಟೆ ವೈದ್ಯರ ಸಂಘದ ಅಧ್ಯಕ್ಷ ಡಾ. ಎ.ಎ. ನಾಲಬಂದ ಹೇಳಿದರು.  ಪಟ್ಟಣದ ನೂತನ ಸಾಯಿ ಆಸ್ಪತ್ರೆಯ ಸಭಾಭವನದಲ್ಲಿ ವೈದ್ಯರ ದಿನಾಚರಣೆ ಅಂಗವಾಗಿ ವೈದ್ಯ ದಂಪತಿ ಡಾ. ಆನಂದ ಭಟ್ ಹಾಗೂ ಡಾ. ಪ್ರಿಯಾ ಆನಂದ ಭಟ್ ಅವರನ್ನು ಸನ್ಮಾನಿಸಿ ಅವರು ಮಾತನಾಡಿದರು.  

ಡಾ. ಆನಂದ ಭಟ್ ಅವರು ವೈದ್ಯಕೀಯ ಕ್ಷೇತ್ರದಲ್ಲಿ ಸಮಯಪ್ರಜ್ಞೆ, ಮಾನವೀಯತೆ ಹಾಗೂ ಉತ್ತಮ ಸೇವಾಭಾವದಿಂದ ಗುರುತಿಸಿಕೊಂಡಿದ್ದಾರೆ. ವೈದ್ಯಕೀಯ ತ್ಯಾಜ್ಯಗಳ ನಿರ್ವಹಣೆಗಾಗಿ ಪ್ರತ್ಯೇಕ ಸ್ಥಳಾವಕಾಶ ಕಲ್ಪಿಸುವಂತೆ ಪುರಸಭೆಗೆ ಮನವಿ ಸಲ್ಲಿಸಲಾಗಿದೆ ಎಂದು ತಿಳಿಸಿದರು.  ಗೌರವಾಧ್ಯಕ್ಷ ಡಾ. ವಿ.ಎಸ್‌. ಕಾರ್ಜಿ ಮಾತನಾಡಿ, ಆಧುನಿಕ ಸೌಲಭ್ಯಗಳಿಲ್ಲದ ಕಾಲದಲ್ಲಿ ವೈದ್ಯಕೀಯ ಸೇವೆ ಸಲ್ಲಿಸಿದ ಅನುಭವಗಳನ್ನು ಹಂಚಿಕೊಂಡರು.  

ಸನ್ಮಾನ ಸ್ವೀಕರಿಸಿದ ಡಾ. ಆನಂದ ಭಟ್, ವೈದ್ಯರು ಜೀವ ಉಳಿಸುವ ಸಂಕಲ್ಪದೊಂದಿಗೆ ಸೇವೆ ಸಲ್ಲಿಸುತ್ತಿದ್ದಾರೆ. ಆದರೂ ವೈದ್ಯರ ಮೇಲೆ ವಿನಾಕಾರಣ ಆರೋಪಗಳು ಮತ್ತು ದೂಷಣೆಗಳು ಎದುರಾಗುತ್ತಿವೆ. ಇಂತಹ ಸಂದರ್ಭಗಳ ನಡುವೆಯೂ ಪ್ರಾಮಾಣಿಕ ಸೇವೆಯನ್ನು ಮುಂದುವರಿಸಬೇಕಾಗಿದೆ ಎಂದು ಹೇಳಿದರು.  ಡಾ. ರವಿ ಅಗರವಾಲ್ ಹಾಗೂ ಡಾ. ಶ್ರೀಶೈಲ ಹುಕ್ಕೆರಿ ಮಾತನಾಡಿದರು.  

ಕಾರ್ಯಕ್ರಮದಲ್ಲಿ ಭಾರತೀಯ ವೈದ್ಯಕೀಯ ಅಸೋಸಿಯೇಷನ್ ತಾಲ್ಲೂಕು ಘಟಕದ ಅಧ್ಯಕ್ಷೆ ಡಾ. ಗಂಗಾಂಬಿಕಾ ಪಾಟೀಲ, ವೈದ್ಯರ ಸಂಘದ ಖಜಾಂಚಿ ಡಾ. ಸುವರ್ಣ ಸೊಲ್ಲದಗಿ, ಉಪ ಖಜಾಂಚಿ ಡಾ. ಶಾಂತಾ ಇಬ್ರಾಹಿಂಪುರ ಹಾಗೂ ಕಾರ್ಯದರ್ಶಿ ಡಾ. ವಿಜಯಕುಮಾರ ಅಮಲ್ಯಾಳ ಉಪಸ್ಥಿತರಿದ್ದರು.  ಒಟ್ಟು 58 ಮಂದಿ ವೈದ್ಯರು ಹಾಗೂ ಅವರ ಕುಟುಂಬ ಸದಸ್ಯರು ವೈದ್ಯರ ದಿನಾಚರಣೆಯಲ್ಲಿ ಭಾಗವಹಿಸಿದ್ದರು. ಕಾರ್ಯಕ್ರಮವನ್ನು ಡಾ. ವೀಣಾ ಪಾಟೀಲ ನಿರೂಪಿಸಿದರು.