ಎಸ್‌.ಜಿ.ಬಿ.ಐ.ಟಿಯಲ್ಲಿ ಸ್ಮಾರ್ಟ ಇಂಡಿಯಾ ಹ್ಯಾಕಥಾನ್ ಉದ್ಘಾಟನೆ 

ನಾವಿನ್ಯತೆ, ಪ್ರಾಯೋಗಿಕ ಸಮಸ್ಯಾ ಪರಿಹಾರಕ್ಕೆ ವೇಗವರ್ಧಕವಾಗಿ ಹ್ಯಾಕಥಾನ್ ಕಾರ್ಯನಿರ್ವಹಣೆ: ಡಾ. ಪಟಗುಂದಿ  

ಬೆಳಗಾವಿ 24: ಸ್ಮಾರ್ಟ ಇಂಡಿಯಾ ಹ್ಯಾಕಥಾನ್ ಎಂಬುವುದು ದೈನಂದಿನ ಜೀವನದಲ್ಲಿ ಎದುರಿಸುವ ಕೆಲವು ಪ್ರಮುಖ ಸವಾಲುಗಳನ್ನು ಪರಿಹರಿಸುವಲ್ಲಿ ವಿದ್ಯಾರ್ಥಿಗಳನ್ನು ತೊಡಗಿಸಿಕೊಳ್ಳಲು ವಿನ್ಯಾಸಗೊಳಿಸಲಾದ ಪ್ರಮುಖ ರಾಷ್ಟ್ರವ್ಯಾಪಿ ಉಪಕ್ರಮವಾಗಿದೆ. ತಂತ್ರಜ್ಞಾನದ ವೇಗದ ಜಗತ್ತಿನಲ್ಲಿ ನಾವಿನ್ಯತೆ ಮತ್ತು ಪ್ರಾಯೋಗಿಕ ಸಮಸ್ಯಾ ಪರಿಹಾರಕ್ಕೆ ವೇಗವರ್ಧಕವಾಗಿ  ಹ್ಯಾಕಥಾನ್ ಒಂದು ವೇದಿಕೆಯನ್ನು ಒದಗಿಸುತ್ತದೆ ಇದನ್ನು ಸರಿಯಾಗಿ ಸದುಪಯೋಗ ಪಡಿಸಿಕೊಳ್ಳಬೇಕೆಂದು ಇಂದು ಎಸ್‌.ಜಿ.ಬಿ.ಐ.ಟಿ ಯಲ್ಲಿ ನಡೆದ ಸ್ಮಾರ್ಟ ಇಂಡಿಯಾ ಹ್ಯಾಕಥಾನ್ -2025 ಉದ್ಘಾಟನಾ ಕಾರ್ಯಕ್ರಮದಲ್ಲಿ ಪ್ರಾಚಾರ್ಯ ಡಾ. ಬಿ.ಆರ್‌.ಪಟಗುಂದಿ ಅವರು ವಿದ್ಯಾರ್ಥಿಗಳಿಗೆ ಪ್ರೋತ್ಸಾಹದ ನುಡಿಗಳನ್ನಾಡಿದರು.   

ಆಡಳಿತ ಮಂಡಳಿಯ ಅಧ್ಯಕ್ಷ ಡಾ. ಎಫ್‌.ವ್ಹಿ.ಮಾನ್ವಿ ಅವರು ಸ್ಪರ್ಧೆಯಲ್ಲಿ  ಭಾಗಿಯಾದ ವಿದ್ಯಾರ್ಥಿಗಳಿಗೆ ಅಭಿನಂದಿಸುತ್ತಾ ತಂತ್ರಜ್ಞಾನ ಶಕ್ತಿಯನ್ನು ಬಳಸಿಕೊಂಡು ನವೀನ ಆಲೋಚನೆಗಳೊಂದಿಗೆ ಮುಂಬರುವ ರಾಷ್ಟ್ರೀಯ ಹ್ಯಾಕಥಾನ್ ಸ್ಪರ್ಧೆಯಲ್ಲಿ ಗೆಲ್ಲಲು ವಿದ್ಯಾರ್ಥಿಗಳು ಉತ್ತಮವಾಗಿ ತಯಾರಿ ನಡೆಸುವಂತೆ ಪ್ರೇರೇಪಿಸಿದರು.  

ನಾವಿನ್ಯತೆ ತಂತ್ರಜ್ಞಾನ ಆಧಾರಿತ ಮೂಲ ಮಾದರಿಗಳನ್ನು ಅಭಿವೃದ್ಧಿ ಪಡಿಸಲು ಬೆಂಬಲ ಮತ್ತು ಸರ್ಕಾರದಿಂದ ಹಣಕಾಸಿನ  ನೆರವು ನೀಡುಲಾಗುವುದೆಂದು  ನೈನ್ 2.0 ದ ಸಂಯೋಜಕ ಡಾ. ಸುರೇಶ್ ಅಕ್ಕೋಳೆ ಅವರು ವಿದ್ಯಾರ್ಥಿಗಳಿಗೆ ಮಾಹಿತಿ ನೀಡಿದರು.  

ಸ್ಪೋಕ್ ಸಂಯೋಜಕ ಪ್ರೋ.ರಾಜೇಶ್ವರಿ ಕಿಸಾನ್ ಯೋಜನಾ ಸಂಯೋಜಕ ಪ್ರೋ. ಸುವರ್ಣಾ ಕರ್ಕಿ ಹಾಗೂ ಡೀನ್ ಅಕಾಡೆಮಿಕ್ ಮುಖ್ಯಸ್ಥ ಡಾ. ಅಶೋಕ ಹುಲಗಬಳಿ ಅವರು ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ ನೆರವೇರಿಸಿದರು. ಮಹಾವಿದ್ಯಾಲಯದ ಎಲ್ಲ ವಿಭಾಗದ ವಿದ್ಯಾರ್ಥಿಗಳು ಮತ್ತು ಅಧ್ಯಾಪಕರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.