ಬೆಳಗಾವಿ 31: ಭಾರತೀಯ ಪ್ರೋಸ್ತೋಡಾಂಟಿಕ್ ಸೊಸೈಟಿಯ ಮಾರ್ಗದರ್ಶನದಲ್ಲಿ ಜನವರಿ ತಿಂಗಳಲ್ಲಿ ದೇಶದಾದ್ಯಂತ ಪ್ರೋಸ್ತೋಡಾಂಟಿಸ್ಟ್‌ ಜಾಗೃತಿ ವಾರವನ್ನು ಆಚರಿಸಲಾಯಿತು. ಈ ಅಂಗವಾಗಿ ಬೆಳಗಾವಿಯ ಕೆಎಲ್‌ಇ ವಿಶ್ವನಾಥ ಕತ್ತಿ ದಂತ ಮಹಾವಿದ್ಯಾಲಯವು ದಂತ ಆರೋಗ್ಯ ಜಾಗೃತಿ ಕಾರ್ಯಕ್ರಮವನ್ನು ಆಯೋಜಿಸಿತು. 

ಕಾರ್ಯಕ್ರಮದ ಉದ್ದೇಶ ಕಳೆದುಹೋದ ದಂತಗಳ ಬದಲಾವಣೆ ಹಾಗೂ ಬಾಯಿ ಮುಖ ರಚನೆಗಳ ಪುನಃಸ್ಥಾಪನೆಯ ಅಗತ್ಯತೆ ಬಗ್ಗೆ ಸಾರ್ವಜನಿಕರಲ್ಲಿ ಅರಿವು ಮೂಡಿಸುವುದಾಗಿತ್ತು. ಜಾಗೃತಿ ವಾರದ ಅವಧಿಯಲ್ಲಿ ಉಚಿತ ದಂತ ತಪಾಸಣಾ ಶಿಬಿರಗಳು, ಡೆಂಚರ್ ಸೇವೆಗಳು, ಬೀದಿ ನಾಟಕಗಳು ಹಾಗೂ ಸಾರ್ವಜನಿಕ ಜಾಗೃತಿ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಯಿತು.  

ಕಾರ್ಯಕ್ರಮದಲ್ಲಿ ಡಾ. ಆನಂದ್ ಕುಮಾರ್ ಜಿ. ಪಾಟೀಲ್ ಅವರು ಮಾತನಾಡಿ ಪ್ರೋಸ್ತೋಡಾಂಟಿಸ್ಟ್‌ ಜಾಗೃತಿ ವಾರವು ವೃತ್ತಿಪರ ಆಚರಣೆಯಷ್ಟೇ ಅಲ್ಲದೆ ಸಾರ್ವಜನಿಕರ ದಂತ ಆರೋಗ್ಯ ಮತ್ತು ಜೀವನಮಟ್ಟವನ್ನು ಉತ್ತಮಗೊಳಿಸುವ ಉದ್ದೇಶದ ಸಾರ್ವಜನಿಕ ಆರೋಗ್ಯ ಚಳುವಳಿಯಾಗಿದೆ ಎಂದರು.  

ವಿಭಾಗದ ಮುಖ್ಯಸ್ಥರಾದ ಡಾ. ರಮೇಶ್ ನಾಯ್ಕರ್ ಅವರ ಮಾರ್ಗದರ್ಶನದಲ್ಲಿ ನಗರ ಬಸ್ ನಿಲ್ದಾಣದಲ್ಲಿ ದಂತ ಮತ್ತು ಬಾಯಿ ಆರೋಗ್ಯ ಕುರಿತು ಬೀದಿ ನಾಟಕ ಪ್ರದರ್ಶಿಸಲಾಯಿತು. ಈ ವೇಳೆ ದಂತ ವೈದ್ಯರು ಹಾಗೂ ವಿದ್ಯಾರ್ಥಿಗಳು ಪ್ರಯಾಣಿಕರೊಂದಿಗೆ ನೇರ ಸಂವಾದ ನಡೆಸಿ ಸರಿಯಾದ ದಂತ ಆರೈಕೆ ಹಾಗೂ ಸಮಯೋಚಿತ ದಂತ ಪುನರ್ವಸತಿ ಮಹತ್ವದ ಬಗ್ಗೆ ಮಾಹಿತಿ ನೀಡಿದರು.