ರಾಯಬಾಗ 12 :  ಮತಕ್ಷೇತ್ರದ ಮೇಖಳಿ ಮತ್ತು ಮಜಲಟ್ಟಿ ಶಾಲಾ ಕಾಲೇಜಿಗಳಲ್ಲಿ ವಿದ್ಯಾರ್ಥಿಗಳ ಸಂಖ್ಯೆ ಹೆಚ್ಚಾಗಿರುವುದರಿಂದ ಇಲ್ಲಿ ತಲಾ 2 ಮೆಟ್ರಿಕ ಪೂರ್ವ ಮತ್ತು ಮೆಟ್ರಿಕ ನಂತರದ ಬಾಲಕರ ಮತ್ತು ಬಾಲಕಿಯರ ವಸತಿ ನಿಲಯ ಮಂಜೂರು ಮಾಡುವಂತೆ ಹಿಂದುಳಿದ ವರ್ಗ ಕಲ್ಯಾಣ ಇಲಾಖೆ ಸಚಿವ ಶಿವರಾಜ ತಂಗಡಗಿ ಅವರನ್ನು ರಾಯಬಾಗ ಶಾಸಕ ದುರ್ಯೋಧನ ಐಹೊಳೆಯವರು ಸದನದಲ್ಲಿ ಒತ್ತಾಯಿಸಿದರು. ಶಾಸಕರ ಪ್ರಶ್ನೆಗೆ ಉತ್ತರಿಸಿದ ಸಚಿವರು, ರಾಜ್ಯದಲ್ಲಿ ಹೊಸ ವಸತಿ ನಿಲಯ ಪ್ರಾರಂಭಿಸಲು ಸಾಕಷ್ಟು ಬೇಡಿಕೆ ಬಂದಿದೆ. 1 ಲಕ್ಷ 41 ಸಾವಿರ ಮಕ್ಕಳಿಗೆ ವಸತಿ ನಿಲಯ ಅವಶ್ಯಕವಾಗಿದೆ.  

ಸರಕಾರದ ಅನುದಾನ ಲಭ್ಯತೆ ಅನುಗುಣವಾಗಿ ವಸತಿ ನಿಲಯ ಮಂಜೂರು ಮಾಡಲಾಗುವುದು ಎಂದು ಉತ್ತರಿಸಿದರು. ಪ್ರಸ್ತುತ ವರ್ಷ ಕೊನೆಯ ಪಕ್ಷ ಒಂದು ವಸತಿ ನಿಲಯ ಮಂಜೂರು ಮಾಡುವುದಾಗಿ ಸಚಿವರು ಭರವಸೆ ನೀಡಿದರು. ನಮ್ಮ ಹಳೆಯ ಸ್ನೇಹಿತರಾದ ಸಚಿವ ಶಿವರಾಜ ತಂಗಡಗಿ ಅವರು ಬಿಜೆಪಿ ಸರ್ಕಾರದಲ್ಲಿ ಸಚಿವರಾಗಿದ್ದಾಗ ನಮ್ಮ ಕೆಲಸ ಮಾಡುತ್ತಿದ್ದರು, ಈಗ ಕಾಂಗ್ರೆಸ ಸರ್ಕಾರದಲ್ಲಿ ಸಚಿವರಾಗಿದ್ದು, ನಮ್ಮ ಬಿಜೆಪಿ ಪಕ್ಷದ ಶಾಸಕರ ಕೆಲಸ ಮಾಡುತ್ತಿಲ್ಲ ಎಂದು ಶಾಸಕ ದುರ್ಯೋಧನ ಐಹೊಳೆಯವರು ಸದನದ ಗಮನ ಸೆಳೆದು ಹೇಳಿದಾಗ, ಒಂದು ಕ್ಷಣ ಸದನ ನಗೆಗಡಲಲ್ಲಿ ತೇಲಿತು.