ಕಂಪ್ಲಿ  13:  ಕಂಪ್ಲಿ-ಕೋಟೆಯ ಪ್ರದೇಶದ ತುಂಗಭದ್ರ ನದಿಯ ಶಿಥಿಲಗೊಂಡ ಸೇತುವೆ ಸ್ಥಳಕ್ಕೆ ಕಲಬುರ್ಗಿ ಲೋಕೋಪಯೋಗಿ ಇಲಾಖೆಯ ಮುಖ್ಯ ಅಭಿಯಂತರ ಶರಣಪ್ಪ ಸುರಗುಂಟಿ ನೇತೃತ್ವದ ಅಧಿಕಾರಿಗಳ ತಂಡ ಗುರುವಾರ ಭೇಟಿ ನೀಡಿ ಪರೀಶೀಲಿಸಿದರು. ನಂತರ ಶರಣಪ್ಪ ಸುರಗುಂಟಿ ಅವರು ಪತ್ರಕರ್ತರೊಂದಿಗೆ ಮಾತನಾಡಿ, ಸೇತುವೆ ಕಂಪ್ಲಿ-ಗಂಗಾವತಿ ಸಂಪರ್ಕದ ಕೊಂಡಿಯಾಗಿದೆ. ಕಂಪ್ಲಿ ಸೇತುವೆ ಹಳೆದಾಗಿರುವ ಜೊತೆಗೆ ಶಿಥಿಲದ ವ್ಯವಸ್ಥೆಯಲ್ಲಿರುವುದರಿಂದ ಹೊಸ ಸೇತುವೆಗೆ ಹೆಚ್ಚಿನ ಬೇಡಿಕೆ ವ್ಯಕ್ತವಾದ ಹಿನ್ನಲೆ ಮಾನ್ಯ ಲೋಕೋಪಯೋಗಿ ಸಚಿವ ಸತೀಶ್ ಜಾರಕಿಹೋಳಿ, ಸ್ಥಳೀಯ ಶಾಸಕ ಜೆ.ಎನ್‌.ಗಣೇಶ ಅವರು ಈಗಾಗಲೇ ಪರೀಶೀಲನೆ ಮಾಡಿದ್ದು, ಸರ್ಕಾರದ ಮಟ್ಟದಲ್ಲಿ ಪ್ರಾಸ್ತಾಪಿಸಿ, ಹೊಸ ಸೇತುವೆಯ ಸಂಬಂಧ ಸರ್ಕಾರದ ನಿರ್ದೇಶನಂತೆ ಕಂಪ್ಲಿ ಸೇತುವೆಗೆ ಖುದ್ದಾಗಿ ಭೇಟಿ ನೀಡಿ ಪರೀಶೀಲಿಸಲಾಗಿದೆ. ಇಲ್ಲಿನ ಸೇತುವೆಯೂ ನದಿ ಪ್ರವಾಹದಿಂದ ಶಿಥಿಲಗೊಂಡು, ಸಂಚಾರಕ್ಕೆ ಬಹಳಷ್ಟು ಅಡೆತಡೆಯನ್ನುಂಟು ಮಾಡುತ್ತಿದೆ. ಇದರಿಂದ ಹೊಸ ಸೇತುವೆಯ ಅಗತ್ಯತೆ ಇರುವದರಿಂದ ಹೊಸ ಸೇತುವೆ ನಿರ್ಮಾಣಕ್ಕಾಗಿ ಸೂಕ್ತ ಸ್ಥಳವನ್ನು ಸೂಚಿಸಬೇಕಾಗಿದೆ. ಆದ್ದರಿಂದ ಸ್ಥಳ ಪರೀಶೀಲಿಸಿದ್ದು, ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸಲಾಗುವುದು. ಈ ಬಾರಿ ಕಂಪ್ಲಿ ಹೊಸ ಸೇತುವೆ ನಿರ್ಮಾಣವಾಗುವ ಭರವಸೆ ಮೂಡುವಂತಾಗಿದೆ ಎಂದರು.  ಈ ಸಂದರ್ಭದಲ್ಲಿ ಬಳ್ಳಾರಿ ಲೋಕೋಪಯೋಗಿ ಇಲಾಖೆಯ ಅಧಿಕ್ಷಕ ಅಭಿಯಂತರ ತಿಮ್ಮರಾಯಪ್ಪ, ಇಇಗಳಾದ ಹೇಮ್‌ರಾಜ್, ಹೇಮಂತರಾಜ್, ಎಇ ಬಸವರೆಡ್ಡಿ, ವಿಶ್ವನಾಥ, ಜೆಇ ಆನಂದ ಸೇರಿದಂತೆ ಇತರರು ಇದ್ದರು.