ವಿಜಯನಗರ ಶಾಲೆಯ ಆನಂದ ಮಾವಿನಂಡಿಗೆ ‘ಆದರ್ಶ ಶಿಕ್ಷಕ’ ಪ್ರಶಸ್ತಿ 

ಚಿಕ್ಕೋಡಿ 06: ಚಿಕ್ಕೋಡಿ ಶೈಕ್ಷಣಿಕ ಜಿಲ್ಲೆಯ ಮೂಡಲಗಿ ವಲಯದ ಸರ್ಕಾರಿ ಕನ್ನಡ ಕಿರಿಯ ಪ್ರಾಥಮಿಕ ಶಾಲೆ ವಿಜಯನಗರದ ಸಹಶಿಕ್ಷಕರಾದ ಆನಂದ ಮಾವಿನಂಡಿ ಅವರು ಶಿಕ್ಷಕರ ದಿನಾಚರಣೆಯ ಪ್ರಯುಕ್ತ ದಿ.ವಾಯ್‌.ಎಲ್‌. ಮೆಮೋರಿಯಲ್ ಟ್ರಸ್ಟ್‌, ಕೌಜಲಗಿ ಇವರಿಂದ ಆದರ್ಶ ಶಿಕ್ಷಕ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. 

ಮಕ್ಕಳ ಬಗೆಗಿನ ಕಾಳಜಿ, ಸಕ್ರಿಯ ಕ್ರಿಯಾಶೀಲತೆ, ಪರಿಸರ ಸ್ನೇಹಿ ಕಾರ್ಯಗಳು ಹಾಗೂ ಶಾಲಾ ದಾಖಲಾತಿ-ಹಾಜರಾತಿ ಹೆಚ್ಚಿಸುವಲ್ಲಿ ತೊಡಗಿಸಿಕೊಂಡ ಪರಿಶ್ರಮ ಇವರಿಗೆ ಈ ಗೌರವ ತಂದಿದೆ. 2008ರ ಜೂನ್ 25ರಂದು ರಾಯಚೂರು ಜಿಲ್ಲೆಯ ಖಾನಾಪುರ ಶಾಲೆಯಲ್ಲಿ ಸೇವೆ ಪ್ರಾರಂಭಿಸಿದ ಆನಂದ ಮಾವಿನಂಡಿ, ಅಲ್ಲಿ 36 ಮಕ್ಕಳ ದಾಖಲಾತಿಯನ್ನು 136ಕ್ಕೆ ಏರಿಸುವಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಅಲ್ಲದೆ, ನೂರಾರು ಗಿಡಮರಗಳನ್ನು ನೆಟ್ಟು ಪೋಷಣೆ ಮಾಡಿದ್ದರು. ಪ್ರತಿ ವರ್ಷ 3-4 ವಿದ್ಯಾರ್ಥಿಗಳು ವಿವಿಧ ವಸತಿ ಶಾಲೆಗಳಿಗೆ ಆಯ್ಕೆಯಾಗಲು ಕಾರಣಿಕರ್ತರಾಗಿದ್ದರು. 

2023ರ ಸೆಪ್ಟೆಂಬರ್ 16ರಂದು ಮೂಡಲಗಿ ನಗರದ ವಿಜಯನಗರ ಶಾಲೆಗೆ ವರ್ಗಾವಣೆಗೊಂಡ ಬಳಿಕವೂ ತಮ್ಮ ಕ್ರಿಯಾಶೀಲತೆಯಿಂದ ವಿದ್ಯಾರ್ಥಿಗಳಿಗೆ ಟ್ರ್ಯಾಕ್ ಸೂಟ್, ಗುರುತಿನ ಚೀಟಿ, ಟೈ-ಬೆಲ್ಟ್‌ ಹಾಗೂ ಶಾಲೆಗೆ ಅಗತ್ಯವಿರುವ ಮೂಲಭೂತ ಸೌಕರ್ಯಗಳನ್ನು ದೇಣಿಗೆಯ ಮೂಲಕ ಒದಗಿಸುವಲ್ಲಿ ಯಶಸ್ವಿಯಾಗಿದ್ದಾರೆ. 

ಶಾಲಾ ದಾಖಲಾತಿ ಹಾಗೂ ಹಾಜರಾತಿ ಹೆಚ್ಚಿಸಲು ಪ್ರತಿದಿನ ಬೆಳಿಗ್ಗೆ ವಿದ್ಯಾರ್ಥಿಗಳ ಮನೆಗಳಿಗೆ ಭೇಟಿ ನೀಡುವುದು ಇವರ ವಿಶಿಷ್ಟತೆಯಾಗಿದೆ. ಜೊತೆಗೆ ಬೆಳಿಗ್ಗೆ 8 ಗಂಟೆಯಿಂದ ರಾತ್ರಿ 8 ಗಂಟೆಯವರೆಗೆ ವಿದ್ಯಾರ್ಥಿಗಳಿಗೆ ವಿಶೇಷ ತರಗತಿಗಳನ್ನು ನಡೆಸಿ ವಸತಿ ಶಾಲೆಗಳ ಪ್ರವೇಶ ಪರೀಕ್ಷೆಗೆ ಸಿದ್ಧಗೊಳಿಸುತ್ತಿದ್ದಾರೆ. 

ಈ ಪರಿಶ್ರಮವನ್ನು ಗಮನಿಸಿ ಕ್ಷೇತ್ರ ಶಿಕ್ಷಣಾಧಿಕಾರಿ ಅಜೀತ ಮನ್ನಿಕೇರಿ ಅವರು ಸಹ ವಿಶೇಷ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ಶಾಲೆಯ ಸವಾಂರ್ಗೀಣ ಅಭಿವೃದ್ಧಿಗೆ ಶ್ರಮಿಸುತ್ತಿರುವ ಇವರಿಗೆ ‘ಆದರ್ಶ ಶಿಕ್ಷಕ ಪ್ರಶಸ್ತಿ’ ಸಂದಿರುವುದು ವಿದ್ಯಾರ್ಥಿಗಳು, ಪೋಷಕರು ಹಾಗೂ ಸಹೋದ್ಯೋಗಿಗಳ ಹೆಮ್ಮೆಗೂ ಕಾರಣವಾಗಿದೆ.