ಹೂವಿನ ಹಡಗಲಿ:  ಆ.31- ತಾಲೂಕಿನ ಪುರ ಗ್ರಾಮದ ಸೋಗಿ ಪುರವರ್ಗ ಕಟ್ಟಿಮನಿ ಮಠದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ರೈತ ಮಹಿಳೆಯರ ಪಾತ್ರ ಹಾಗೂ ಕೃಷಿ ಪ್ರಗತಿ ಕುರಿತು ಉಪನ್ಯಾಸ ನಡೆಯಿತು.  

ಉಪನ್ಯಾಸ ನೀಡಿದ ಗುತ್ತಿಗೆದಾರ ಮಹೇಶ್ ಹಲಗೇರಿ, ರೈತ ಮಹಿಳೆಯರು ಅಡುಗೆ ಮನೆಗೆ ಮಾತ್ರ ಸೀಮಿತರಾಗದೆ ಎಲ್ಲ ಕ್ಷೇತ್ರಗಳಲ್ಲೂ ಸಾಧನೆ ಮಾಡುತ್ತಿದ್ದಾರೆ. ಕೃಷಿ ಕಾರ್ಯದಲ್ಲಿ ನೇರವಾಗಿ ತೊಡಗಿಸಿಕೊಂಡು, ಹೈನುಗಾರಿಕೆ ಹಾಗೂ ಗೃಹ ಕೈಗಾರಿಕೆಗಳ ಮೂಲಕ ಕುಟುಂಬದ ಆರ್ಥಿಕ ಪ್ರಗತಿಗೆ ಮಹತ್ವದ ಕೊಡುಗೆ ನೀಡುತ್ತಿದ್ದಾರೆ ಎಂದು ಹೇಳಿದರು.  

ಕುಟುಂಬ ಸಂಬಂಧಗಳು ಹಾಗೂ ಕೃಷಿ ಪ್ರಗತಿಯಲ್ಲಿ ರೈತ ಮಹಿಳೆಯರ ಪಾತ್ರ ಕುರಿತು ಶಿಕ್ಷಕ ಆರಿ​‍್ಜ. ನಾಗರಾಜ ಧರ್ಮೋಪನ್ಯಾಸ ನೀಡಿದರು.  

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಕಸಾಪ ತಾಲೂಕು ಘಟಕದ ಅಧ್ಯಕ್ಷ ಟಿ. ವೀರೇಂದ್ರ ಪಾಟೀಲ ವಹಿಸಿದ್ದರು. ಶ್ರೀಮಠದ ಅಭಿನವ ಸಿದ್ಧವೀರ ಶಿವಾಚಾರ್ಯ ಮಹಾಸ್ವಾಮಿಗಳು ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದರು.  

ಕಾರ್ಯಕ್ರಮದಲ್ಲಿ ವಿವಿಧ ದತ್ತಿ ಕಾರ್ಯಕ್ರಮಗಳು, ದಾಸೋಹ ಸೇವೆ ಹಾಗೂ ಭಜನಾ ಕಾರ್ಯಕ್ರಮಗಳು ನಡೆದವು. ಸೋವೆನಹಳ್ಳಿ ಶ್ರೀ ಶಿವನಕಟೇಶ್ವರ ಭಜನಾ ಸಂಘದವರು ಭಜನಾ ಪದಗಳನ್ನು ಪ್ರಸ್ತುತಪಡಿಸಿದರು. ಕಾಗನೂರು ವೀರಣ್ಣ ಹಾಗೂ ಹಂಪಾಪಟ್ಟಣದ ಗುರುಶಾಂತಪ್ಪ ಭಕ್ತಿಗೀತೆಗಳನ್ನು ಹಾಡಿದರು.  

ದತ್ತಿದಾನಿಗಳು, ದಾಸೋಹ ಸೇವಾರ್ಥಿಗಳು ಹಾಗೂ ಭಕ್ತರು ಉಪಸ್ಥಿತರಿದ್ದರು. ಆರಂಭದಲ್ಲಿ ಶಂಕರಯ್ಯ ಗವಾಯಿ ಪ್ರಾರ್ಥಿಸಿದರು. ದತ್ತಿದಾನಿ ಗೌರೀಶ ಅಂಗಡಿ ಸ್ವಾಗತಿಸಿದರು. ಎಂ.ಪಿ.ಎಂ. ಕೋಟ್ರಯ್ಯ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಎ.ಎಂ. ಚೆನ್ನವೀರಸ್ವಾಮಿ ವಂದಿಸಿದರು.