ಕಳೆದ ಶುಕ್ರವಾರ (ಅ.31) ಬಹು ನೀರೀಕ್ಷೆಯಿಂದ ತೆರೆಗೆ ಬಂದ ‘ಬಘೀರ’ ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ಸಿಗುತ್ತಿದೆ. ಸಿನಿಮಾ ನೋಡಿದ ಪ್ರೇಕ್ಷಕರು ಚಿತ್ರದ ಮೆಕ್ಕಿಂಗ್, ಕಥೆ ಹಾಗೂ ಶ್ರೀಮುರಳಿ ಅಭಿನಯದ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡುತ್ತಿದ್ದು, ಜಾಲತಾಣಗಳಲ್ಲಿ ತಮ್ಮ ಅಭಿಪ್ರಾಯ ಹಂಚಿಕೊಳ್ಳುತ್ತಿದ್ದಾರೆ. ಹೌದು ‘ಖಂಡಿತ ‘ಬಘೀರ’ ವರ್ಷದ ದೊಡ್ಡ ಬ್ಲಾಕ್ ಬಸ್ಟರ್ ಸಿನಿಮಾವಾಗುತ್ತದೆ’ ಎಂದು ಒಬ್ಬರು ಬರೆದುಕೊಂಡಿದ್ದಾರೆ. ಮತ್ತೋಬ್ಬರು ‘ನನಗೆ ಸಿನಿಮಾದ ಮೊದಲ ಹಾಫ್ ಇಷ್ಟ ಆಯಿತು. 2ನೇ ಹಾಫ್ ಜಾಸ್ತಿಯೇ ಇಷ್ಟ ಆಗುತ್ತದೆ. ಕೊನೆಯ 20 ನಿಮಿಷ ಥ್ರಿಲ್ ಕೊಡುತ್ತದೆ. ಕೆಜಿಎಫ್ ನೋಡುವಾಗಿನ ಫೀಲ್ ‘ಬಘೀರ’ ನೋಡುವಾಗ ಬರುತ್ತದೆ’ ಎಂದು ಪ್ರತಿಕ್ರಿಯೆ ನೀಡಿದ್ದಾರೆ. ‘ಶ್ರೀಮುರುಳಿ ವೇದಾಂತ್ ಆಗಿ ಕಾಣಿಸಿಕೊಂಡಿದ್ದಾರೆ. ಇದು ಅವರ ಕೆರಿಯರ್‌ನ ಬೆಸ್ಟ್‌ ಮೂವಿ. ಅಜನೀಶ್ ಅವರ ಬಿಜಿಎಂ ಬೇರೆ ಲೆವೆಲ್‌ಗಿದೆ. ಸೂರಿ ಅವರ ಡೈರೆಕ್ಷನ್ ಟಾಪ್ ಆಗಿದೆ. ಸಿನಿಮಾ ಎಂಗೇಜಿಂಗ್ ಆಗಿದೆ’ ಎಂದು ಪ್ರೇಕ್ಷಕರೊಬ್ಬರು ಬರೆದುಕೊಂಡಿದ್ದಾರೆ. ‘ಈತ ಇಂಡಿಯನ್ ಬ್ಯಾಟ್ ಮ್ಯಾನ್‌. ಫೈಟ್ ಸೀನ್ಸ್‌ಗಳು ಚಿಂದಿಯಾಗಿದೆ. ಜೈ ‘ಬಘೀರ’ ಎಂದು ಒಬ್ಬರು ಬರೆದುಕೊಂಡಿದ್ದಾರೆ. 

ಇನ್ನು ‘ಫಸ್ಟ್‌ ಹಾಫ್ ನೋಡಿ ಸಖತ್ ಎಂಜಾಯ್ ಮಾಡಿದೆ. ಪ್ರಶಾಂತ್ ನೀಲ್ ಅವರ ಕಥೆ ಸೂಪರ್ ಆಗಿದೆ. ಮೈಯೆಲ್ಲ ರೋಮಾಂಚನವಾಗುತ್ತದೆ. ಡೈಲಾಗ್ಸ್‌, ಬಿಜಿಎಂ ನಿಜವಾಗಲೂ ಇದೊಂದು ಮಾಸ್ ಮನರಂಜನೆ ನೀಡುವ ಸಿನಿಮಾ. ಕೆಜಿಎಫ್, ಕಾಂತಾರ ಆದ್ಮೇಲೆ ಮೈನವಿರೇಳಿಸುವ ಕಥೆ ಇದರಲ್ಲಿದೆ’ ಎಂದು ಪ್ರೇಕ್ಷಕರೊಬ್ಬರು ಅಭಿಪ್ರಾಯಪಟ್ಟಿದ್ದಾರೆ. ಅಲ್ಲದೆ ದಕ್ಷಿಣ ಭಾರತದ ಖ್ಯಾತ ನಟ ಪ್ರಭಾಸ್ ಅವರು ‘ಬಘೀರ’ ಚಿತ್ರವನ್ನು ವೀಕ್ಷಿಸಿ, ‘ಶ್ರೀಮುರಳಿ ಅವರ ಅಭಿನಯ, ಪ್ರಶಾಂತ್ ನೀಲ್ ಅವರ ಕಥೆ, ಡಾಽಽಸೂರಿ ನಿರ್ದೇಶನ, ಹೊಂಬಾಳೆ ಫಿಲಂಸ್‌ನ ಅದ್ದೂರಿ ನಿರ್ಮಾಣ ಹಾಗೂ ಇಡೀ ಚಿತ್ರತಂಡದ ಕಾರ್ಯವೈಖರಿ ಉತ್ತಮವಾಗಿದೆ’ ಎಂದು ನಟ ಪ್ರಭಾಸ್ ‘ಬಘೀರ’ ಚಿತ್ರದ ಬಗ್ಗೆ ಮೆಚ್ಚುಗೆ ಮಾತುಗಳನ್ನಾಡಿದ್ದಾರೆ. 

ಹೆಸರಾಂತ ಹೊಂಬಾಳೆ ಫಿಲಂಸ್ ಲಾಂಛನದಲ್ಲಿ ವಿಜಯ್ ಕಿರಗಂದೂರು ನಿರ್ಮಿಸಿರುವ, ಡಾಽಽಸೂರಿ ನಿರ್ದೇಶನದಲ್ಲಿ ಶ್ರೀಮುರಳಿ ನಾಯಕರಾಗಿ ನಟಿಸಿರುವ ಹಾಗೂ ಕೆ.ಜಿ.ಎಫ್ ಖ್ಯಾತಿಯ ಪ್ರಶಾಂತ್ ನೀಲ್ ಕಥೆ ಬರೆದಿರುವ ‘ಬಘೀರ’ ಚಿತ್ರ ರಾಜ್ಯಾದ್ಯಂತ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ದೀಪಾವಳಿ ಹಾಗೂ ರಾಜ್ಯೋತ್ಸವದ ಈ ಶುಭ ಸಂದರ್ಭದಲ್ಲಿ ರಾಜ್ಯಾದ್ಯಂತ 180ಕ್ಕೂ ಅಧಿಕ ಚಿತ್ರಮಂದಿರಗಳಲ್ಲಿ ಚಿತ್ರ ಹೌಸ್ ಫುಲ್ ಪ್ರದರ್ಶನ ಕಂಡಿದೆ. ಜನರು ತೋರುತ್ತಿರುವ ಪ್ರೀತಿಗೆ ಚಿತ್ರತಂಡ ಧನ್ಯವಾದ ತಿಳಿಸಿದೆ.