ಇಂಡಿ 06: ತಾಲೂಕಿನ ಹೃದಯ ಭಾಗದಲ್ಲಿರುವ ಬಸವೇಶ್ವರ ವೃತ್ತದ ಬಳಿ ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ರೈತ ಹಸಿರು ಸೇನೆ ವತಿಯಿಂದ ಕಬ್ಬಿಗೆ ಬೆಂಬಲ ಬೆಲೆ ಘೋಷಣೆ ಆಗುವರಿಗೆ ಅನಿರ್ದಿಷ್ಟಾವಧಿ ಧರಣಿ ಸತ್ಯಾಗ್ರಹ 4ನೇ ದಿನಕ್ಕೆ ಕಾಲಿಟ್ಟಿದೆ. ಈ ಹೋರಾಟಕ್ಕೆ ಅಖಿಲ ಭಾರತ ವಿದ್ಯಾರ್ಥಿ ಪರಿಷತ್ ಇಂಡಿ ಶಾಖೆ ವತಿಯಿಂದ ನೂರಾರು ಕಾರ್ಯಕರ್ತರು ಬಸವೇಶ್ವರ ವೃತ್ತದ ಬಳಿ ಮಾನವ ಸರಪಳಿ ಮಾಡಿ ಎರಡು ಗಂಟೆಗಳ ಕಾಲ ರಸ್ತೆ ತಡೆದು ರಾಜಕೀಯ ಮಹನಿಯರ ಭಾವಚಿತ್ರಕ್ಕೆ ಬೆಂಕಿ ಹಚ್ಚಿ ಬೃಹತ್ ಪ್ರತಿಭಟನೆ ಮಾಡಿದರು. 

 ಸಚೀನ ಧಾನಗೊಂಡ ಅವರು ಮಾತನಾಡಿ ಭಾರತ ಕೃಷಿ ಪ್ರಧಾನವಾದ ರಾಷ್ಟ್ರ ಇಲ್ಲಿ ಶೇಕಡಾ ಎಪ್ಪತ್ತೈದು ರಷ್ಟು ಜನರು ಕೃಷಿಯನ್ನೇ ಅವಲಂಬಿಸಿದ್ದಾರೆ. ರೈತರ ಮಕ್ಕಳಾದ ನಾವುಗಳು ಕೂಡಾ ಕೃಷಿಕರೆ ನಾವು ಕೂಡಾ ಕಲಿಯಬೇಕು ಎಂದರೆ ನಮ್ಮ ತಂದೆ ತಾಯಿಗಳು  ಹೊಲದಲ್ಲಿ ದುಡಿದು ನಮಗೆ ಬೆವರು ಸುರಿಸಿ ಶಾಲೆ ಕಲಿಸುತ್ತಾರೆ. ಆದ್ದರಿಂದ ರೈತರ ಮಕ್ಕಳಾದ ನಾವುಗಳು ರೈತ ಹೋರಾಟಕ್ಕೆ  ಬೆಂಬಲಿಸುವುದು ನಮ್ಮ ಜನ್ಮಸಿದ್ಧ ಹಕ್ಕು ಎಂದು ಹೇಳಿದರು. 

ಅಖಿಲ ಭಾರತ ವಿದ್ಯಾರ್ಥಿ ಪರಿಷತ್ ನಗರ ಘಟಕ ಅಧ್ಯಕ್ಷ ಬಿ ಎಚ್ ಬಗಲಿ ಅವರು ಮಾತನಾಡಿ ರೈತರು ಕೊಡುವ ಕಬ್ಬಿನಿಂದ ಸಕ್ಕರೆ ಕಾರ್ಖಾನೆಗಳು ಸಕ್ಕರೆ ಹಾಗೂ ಇತರೆ ಕಚ್ಚಾ ಉತ್ಪಾದನೆಗಳನ್ನು ತಯಾರಿಸಿ ಮಾರಾಟ ಮಾಡಿ ತುಂಬಾ ಲಾಭದಲ್ಲಿ ಇವೆ. ಆದರೆ ರೈತರಿಂದ ಪಡೆಯುತ್ತಿರುವ ಸಕ್ಕರೆ ಕಾರ್ಖಾನೆಗಳ ಮಾಲೀಕರು ರೈತರಿಗೆ ಯೋಗ್ಯ ಬೆಲೆ ಕೊಡಲು ಹಿಂದೇಟು ಹಾಕುತ್ತಿರುವುದು ತುಂಬಾ ನೋವಿನ ಸಂಗತಿ ಎಂದು ಹೇಳಿದರು. 

ನಗರ ಕಾರ್ಯದರ್ಶಿ ಗಣೇಶ್ ಹಂಜಗಿ, ರಾಹುಲ್ ಜಾಧವ, ಹುಸೇನಿ ಮುಲ್ಲಾ, ಸೋಮನಾಥ ಕಟಗೇರಿ, ಪ್ರಕಾಶ ಬಂಡಿ, ಐಶ್ವರ್ಯ ಅರಳಿಚಂಡಿ, ಆರತಿ ಸಾಲೋಟಗಿ, ಭಾಗ್ಯಶ್ರೀ ವಾಲಿಕಾರ, ರಂಜಿತಾ ರಾಠೋಡ, ಸಂದೀಪ ಚೌದರಿ ಸೇರಿದಂತೆ ನೂರಾರು ವಿದ್ಯಾರ್ಥಿ ಹಾಗೂ ವಿದ್ಯಾರ್ಥಿನಿಯರು ಉಪಸ್ಥಿತರಿದ್ದರು.