ಚೆನ್ನೈ, ಜುಲೈ 3 : ಭಾರತದ ಮೊದಲ ಖಾಸಗಿ ಸಂಸ್ಥೆ ಅಭಿವೃದ್ಧಿಪಡಿಸಿದ ಕಕ್ಷಾ-ಶ್ರೇಣಿಯ (ಆರ್ಬಿಟಲ್ ಕ್ಲಾಸ್) ರಾಕೆಟ್ ವಿಕ್ರಮ್-1, 'ಮಿಷನ್ ಆಗಮನ' ಹೆಸರಿನ ತನ್ನ ಪ್ರಥಮ ಪರೀಕ್ಷಾ ಹಾರಾಟಕ್ಕೆ ಸಜ್ಜಾಗಿದ್ದು, ಜುಲೈ 12ರಿಂದ ಆಗಸ್ಟ್ 4, 2026ರ ನಡುವಿನ ಉಡಾವಣಾ ಅವಧಿಯಲ್ಲಿ ಶ್ರೀಹರಿಕೋಟಾದ ಸತೀಶ ಧವನ್ ಬಾಹ್ಯಾಕಾಶ ಕೇಂದ್ರ (ಎಸ್‌ಡಿಎಸ್‌ಸಿ-ಶಾರ್) ನಿಂದ ಉಡಾವಣೆಗೊಳ್ಳಲಿದೆ.

ಹೈದರಾಬಾದ್ ಮೂಲದ ಸ್ಕೈರೂಟ್ ಏರೋಸ್ಪೇಸ್ ಅಭಿವೃದ್ಧಿಪಡಿಸಿರುವ ಈ ರಾಕೆಟ್, ಭಾರತದ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಖಾಸಗಿ ಸಂಸ್ಥೆಗಳ ಕಕ್ಷಾ ಉಡಾವಣೆ ಯುಗಕ್ಕೆ ನಾಂದಿ ಹಾಡುವ ಐತಿಹಾಸಿಕ ಸಾಧನೆಯಾಗಲಿದೆ.

ಸಾಮಾಜಿಕ ಜಾಲತಾಣದಲ್ಲಿ ಈ ಕುರಿತು ಪ್ರಕಟಣೆ ನೀಡಿರುವ ಸ್ಕೈರೂಟ್, "ವಿಕ್ರಮ್-1 ಟೆಸ್ಟ್ ಫ್ಲೈಟ್-1: ಮಿಷನ್ ಆಗಮನ—ಭಾರತದ ಮೊದಲ ಖಾಸಗಿ ಕಕ್ಷಾ ರಾಕೆಟ್ ಉಡಾವಣೆ. ಉಡಾವಣೆಯ ಅವಧಿ: ಜುಲೈ 12ರಿಂದ ಆಗಸ್ಟ್ 4, 2026" ಎಂದು ತಿಳಿಸಿದೆ.

ರಾಕೆಟ್ ಅನ್ನು ಶ್ರೀಹರಿಕೋಟಾದ ಐತಿಹಾಸಿಕ ಫಸ್ಟ್ ಲಾಂಚ್ ಪ್ಯಾಡ್ (ಎಫ್‌ಎಲ್‌ಪಿ) ನಲ್ಲಿ ಸಂಪೂರ್ಣವಾಗಿ ಜೋಡಿಸಲಾಗಿದ್ದು, 450 ಕಿ.ಮೀ. ಎತ್ತರದ ಕಡಿಮೆ ಭೂಕಕ್ಷೆ (ಲೋ ಎರ್ಥ್ ಆರ್ಬಿಟ್) ಗೆ 60 ಡಿಗ್ರಿ ಓರಿಕೆಯೊಂದಿಗೆ ಉಡಾವಣೆ ಮಾಡಲಾಗುತ್ತದೆ ಎಂದು ಕಂಪನಿ ತಿಳಿಸಿದೆ.

"ಭಾರತದ ಐತಿಹಾಸಿಕ ಮೊದಲ ಉಡಾವಣಾ ವೇದಿಕೆಯಲ್ಲಿ ವಾಹನ ಸಂಪೂರ್ಣವಾಗಿ ಸಜ್ಜಾಗಿದೆ. ಭಾರತೀಯ ಬಾಹ್ಯಾಕಾಶ ಯಾತ್ರೆಯ ಹೊಸ ಅಧ್ಯಾಯಕ್ಕೆ ಕ್ಷಣಗಣನೆ ಆರಂಭವಾಗಿದೆ" ಎಂದು ಸ್ಕೈರೂಟ್ ಹೇಳಿದೆ. ಈ ಸಾಧನೆಗೆ ಅವಕಾಶ ಕಲ್ಪಿಸಿದ ಇಸ್ರೋ ಮತ್ತು ಇನ್-ಸ್ಪೇಸ್ ಸಂಸ್ಥೆಗಳಿಗೆ ಕೃತಜ್ಞತೆ ಸಲ್ಲಿಸಿದೆ.

ಮಿಷನ್‌ನ ಅಧಿಕೃತ ಲಾಂಛನವನ್ನು ಅನಾವರಣಗೊಳಿಸಿದ ಸ್ಕೈರೂಟ್, "'ಆಗಮನ' ಎಂದರೆ 'ಬರುವಿಕೆ'. ಈ ಲಾಂಛನವು ಭಾರತದ ಬಾಹ್ಯಾಕಾಶ ಪಯಣಕ್ಕೂ, ಖಾಸಗಿ ಕಕ್ಷಾ ಉಡಾವಣೆಗಳ ಹೊಸ ಯುಗಕ್ಕೂ ಗೌರವ ಸಲ್ಲಿಸುತ್ತದೆ. ವಿಕ್ರಮ್-1 ಟೆಸ್ಟ್ ಫ್ಲೈಟ್-1... ಮುಂದಕ್ಕೆ ಮತ್ತು ಮೇಲಕ್ಕೆ" ಎಂದು ತಿಳಿಸಿದೆ.

2022ರ ನವೆಂಬರ್ 18ರಂದು ಭಾರತದ ಮೊದಲ ಖಾಸಗಿ ರಾಕೆಟ್ ವಿಕ್ರಮ್-ಎಸ್ ಅನ್ನು ಯಶಸ್ವಿಯಾಗಿ ಉಡಾವಣೆ ಮಾಡಿದ ಬಳಿಕ ಇದು ಸ್ಕೈರೂಟ್‌ನ ಎರಡನೇ ಮಹತ್ವದ ಉಡಾವಣಾ ಕಾರ್ಯಾಚರಣೆಯಾಗಿದೆ.

'ಪ್ರಾರಂಭ' ಎಂದು ಹೆಸರಿಸಲಾದ ವಿಕ್ರಮ್-ಎಸ್ ಉಪಕಕ್ಷಾ ಪರೀಕ್ಷಾ ಹಾರಾಟವು ಭಾರತದ ಮೊದಲ ಖಾಸಗಿ ರಾಕೆಟ್ ಉಡಾವಣೆಯಾಗಿ ಇತಿಹಾಸ ನಿರ್ಮಿಸಿತ್ತು. ಏಕ ಹಂತದ ಘನ ಇಂಧನ ರಾಕೆಟ್ ಸುಮಾರು 89.5 ಕಿ.ಮೀ. ಎತ್ತರವನ್ನು 155 ಸೆಕೆಂಡುಗಳಲ್ಲಿ ತಲುಪಿದ್ದು, ಬಜೂಮ್‌ಕ್ಯೂ ಸ್ಪೇಸ್ ರಿಸರ್ಚ್ ಲ್ಯಾಬ್ (ಅರ್ಮೇನಿಯಾ), ಸ್ಪೇಸ್ ಕಿಡ್ಜ್ ಇಂಡಿಯಾ ಮತ್ತು ಎನ್-ಸ್ಪೇಸ್ ಟೆಕ್ ಇಂಡಿಯಾ ಸಂಸ್ಥೆಗಳ ಮೂರು ಪೇಲೋಡ್‌ಗಳನ್ನು ಹೊತ್ತೊಯ್ದಿತ್ತು. ಯೋಜನೆಯಂತೆ ಕಾರ್ಯಾಚರಣೆ ಪೂರ್ಣಗೊಳಿಸಿದ ಬಳಿಕ ರಾಕೆಟ್ ಬಂಗಾಳ ಕೊಲ್ಲಿಯಲ್ಲಿ ಸುಮಾರು 125 ಕಿ.ಮೀ. ದೂರದಲ್ಲಿ ಸಮುದ್ರಕ್ಕೆ ಬಿದ್ದಿತ್ತು.

ಈ ಮಿಷನ್ ಮೂಲಕ ಘನ ಪ್ರೊಪಲ್ಷನ್ ವ್ಯವಸ್ಥೆ, ಕಾರ್ಬನ್ ಕಾಂಪೋಸಿಟ್ ರಚನೆಗಳು, ಏವಿಯಾನಿಕ್ಸ್ ಮತ್ತು ಟೆಲಿಮೆಟ್ರಿ ಸೇರಿದಂತೆ ಪ್ರಮುಖ ತಂತ್ರಜ್ಞಾನಗಳು ಯಶಸ್ವಿಯಾಗಿ ಪರೀಕ್ಷಿಸಲ್ಪಟ್ಟಿದ್ದು, ವಿಕ್ರಮ್ ಸರಣಿಯ ಕಕ್ಷಾ ರಾಕೆಟ್‌ಗಳ ಅಭಿವೃದ್ಧಿಗೆ ಭದ್ರ ಅಡಿಪಾಯ ಹಾಕಿದೆ.

ಸ್ಕೈರೂಟ್ ಪ್ರಕಾರ, ಮಿಷನ್ ಆಗಮನದ ಮುಖ್ಯ ಉದ್ದೇಶ ವಿಕ್ರಮ್-1 ರಾಕೆಟ್‌ನ ಪ್ರೊಪಲ್ಷನ್, ಹಂತಗಳ ಪ್ರತ್ಯೇಕೀಕರಣ, ಮಾರ್ಗದರ್ಶನ, ನ್ಯಾವಿಗೇಶನ್, ನಿಯಂತ್ರಣ ವ್ಯವಸ್ಥೆ ಹಾಗೂ ಒಟ್ಟಾರೆ ಕಾರ್ಯಕ್ಷಮತೆಯ ಕುರಿತು ಮಹತ್ವದ ಹಾರಾಟದ ಮಾಹಿತಿಯನ್ನು ಸಂಗ್ರಹಿಸುವುದಾಗಿದೆ.

ಈ ಪರೀಕ್ಷಾ ಹಾರಾಟದಿಂದ ದೊರೆಯುವ ಮಾಹಿತಿಯನ್ನು ರಾಕೆಟ್‌ನ ವಿನ್ಯಾಸವನ್ನು ದೃಢೀಕರಿಸಲು ಹಾಗೂ ವಿಶ್ವಾಸಾರ್ಹ, ಹೆಚ್ಚಿನ ಆವರ್ತನೆಯ ವಾಣಿಜ್ಯ ಉಡಾವಣಾ ಕಾರ್ಯಕ್ರಮವನ್ನು ಅಭಿವೃದ್ಧಿಪಡಿಸಲು ಬಳಸಲಾಗುವುದು. ಇದರಿಂದ ಭಾರತದ ಬೆಳೆಯುತ್ತಿರುವ ಖಾಸಗಿ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಸ್ಕೈರೂಟ್ ಪ್ರಮುಖ ಸ್ಥಾನ ಪಡೆಯುವ ನಿರೀಕ್ಷೆಯಿದೆ.