ಮೋದಿ ಅವರು ಮಧ್ಯಾಹ್ನದ ವೇಳೆಗೆ ವಡೋದರ ತಲುಪಿ, ರೈಲ್ವೆ ಮತ್ತು ಹೆದ್ದಾರಿ ಮೂಲಸೌಕರ್ಯ, ನಗರಾಭಿವೃದ್ಧಿ, ವಸತಿ, ಕುಡಿಯುವ ನೀರು ಮತ್ತು ನವೀಕರಿಸಬಹುದಾದ ಇಂಧನ ಕ್ಷೇತ್ರಗಳಿಗೆ ಸಂಬಂಧಿಸಿದ ಹಲವು ಯೋಜನೆಗಳಿಗೆ ಚಾಲನೆ ನೀಡಲಿದ್ದಾರೆ. ಈ ಸಂದರ್ಭದಲ್ಲಿ ಸಾರ್ವಜನಿಕ ಸಭೆಯನ್ನೂ ಉದ್ದೇಶಿಸಿ ಮಾತನಾಡಲಿದ್ದಾರೆ.

ವಡೋದರ ಕಾರ್ಯಕ್ರಮದ ಪ್ರಮುಖ ಆಕರ್ಷಣೆ ಪಶ್ಚಿಮ ಸಮರ್ಪಿತ ಸರಕು ಸಾಗಣೆ ಕಾರಿಡಾರ್‌ (WDFC)ನ ಮೂರು ಪ್ರಮುಖ ವಿಭಾಗಗಳ ಉದ್ಘಾಟನೆಯಾಗಿದೆ. ಒಟ್ಟು 326 ಮಾರ್ಗ ಕಿಲೋಮೀಟರ್ ಉದ್ದದ ಈ ವಿಭಾಗಗಳನ್ನು ₹20,700 ಕೋಟಿಗೂ ಅಧಿಕ ವೆಚ್ಚದಲ್ಲಿ ಅಭಿವೃದ್ಧಿಪಡಿಸಲಾಗಿದೆ.

ಮೋದಿ ಅವರು ಸನಂದ್ (ಉತ್ತರ)-ಮಕರಪುರ, ನ್ಯೂ ಉಂಬರ್‌ಗಾಂವ್-ನ್ಯೂ ಸಫಾಲೆ ಮತ್ತು ನ್ಯೂ ಸಫಾಲೆ-ಜವಾಹರಲಾಲ್ ನೆಹರು ಪೋರ್ಟ್ ಅಥಾರಿಟಿ (JNPA) ವಿಭಾಗಗಳನ್ನು ರಾಷ್ಟ್ರಕ್ಕೆ ಸಮರ್ಪಿಸಲಿದ್ದಾರೆ. ಈ ವಿಭಾಗಗಳ ಕಾರ್ಯಾರಂಭದೊಂದಿಗೆ ಸಂಪೂರ್ಣ WDFC ಜಾಲ ಪೂರ್ಣಗೊಂಡಂತಾಗಲಿದೆ. ಇದು ದೇಶದಲ್ಲಿ ಸಮರ್ಪಿತ ಹಾಗೂ ಹೆಚ್ಚಿನ ಸಾಮರ್ಥ್ಯದ ಸರಕು ಸಾಗಣೆ ವ್ಯವಸ್ಥೆಯನ್ನು ಬಲಪಡಿಸುವಲ್ಲಿ ಮಹತ್ವದ ಹೆಜ್ಜೆಯಾಗಲಿದೆ.

WDFC ಮೂಲಕ ಸರಕು ರೈಲುಗಳಿಗೆ ಪ್ರತ್ಯೇಕ ಮೂಲಸೌಕರ್ಯ ಲಭ್ಯವಾಗಲಿದ್ದು, ಕೈಗಾರಿಕಾ ಕೇಂದ್ರಗಳು, ಲಾಜಿಸ್ಟಿಕ್ಸ್ ಹಬ್‌ಗಳು ಮತ್ತು ಬಂದರುಗಳ ನಡುವಿನ ಸಂಪರ್ಕ ಮತ್ತಷ್ಟು ಸುಧಾರಿಸಲಿದೆ. JNPAಗೆ ನೇರ ರೈಲು ಸಂಪರ್ಕದಿಂದ ಆಮದು-ರಫ್ತು ಸರಕು ಸಾಗಣೆ ವೇಗಗೊಳ್ಳುವ ಜೊತೆಗೆ ಲಾಜಿಸ್ಟಿಕ್ಸ್ ವೆಚ್ಚ ಕಡಿಮೆಯಾಗುವ ನಿರೀಕ್ಷೆಯಿದೆ.

ಮುಂಬೈನ ಈಗಾಗಲೇ ಹೆಚ್ಚಿನ ಒತ್ತಡದಲ್ಲಿರುವ ರೈಲು ಜಾಲದ ಮೇಲಿನ ಸರಕು ಸಾಗಣೆ ಭಾರವನ್ನು WDFCಗೆ ವರ್ಗಾಯಿಸುವ ಮೂಲಕ ಕಡಿಮೆ ಮಾಡಲು ಸಾಧ್ಯವಾಗಲಿದೆ. ಸರಕು ಸಾಗಣೆಯ ವೇಗ ಹೆಚ್ಚಳ ಮತ್ತು ಸಾಗಣೆ ಸಮಯ ಕಡಿಮೆಯಾಗುವುದರಿಂದ ಪೂರೈಕೆ ಸರಪಳಿ ಹಾಗೂ ಒಟ್ಟಾರೆ ಲಾಜಿಸ್ಟಿಕ್ಸ್ ವ್ಯವಸ್ಥೆಯ ದಕ್ಷತೆ ಸುಧಾರಿಸುವ ನಿರೀಕ್ಷೆಯಿದೆ.

ವಡೋದರ ಕಾರ್ಯಕ್ರಮದಲ್ಲಿ ಮೋದಿ ಅವರು ನ್ಯೂ ಸನಂದ್ (ಉತ್ತರ), ನ್ಯೂ ಮಕರಪುರ, ನ್ಯೂ ಉಂಬರ್‌ಗಾಂವ್ ಮತ್ತು ಮುಂಬೈನ ನ್ಯೂ JNPTನಿಂದ ಸರಕು ರೈಲು ಸೇವೆಗಳಿಗೆ ಚಾಲನೆ ನೀಡಲಿದ್ದಾರೆ. ವಡೋದರ ಮತ್ತು ಟಾಂಡಾ ರೋಡ್ ನಡುವೆ ಹೊಸ ಪ್ರಯಾಣಿಕ ರೈಲು ಸೇವೆಯನ್ನೂ ಉದ್ಘಾಟಿಸಲಿದ್ದಾರೆ.

ಚೋಟಾ ಉದೇಪುರ-ಧಾರ್ ರೈಲ್ವೆ ಯೋಜನೆಯ ಭಾಗವಾಗಿ ನಿರ್ಮಿಸಲಾದ ಜೋಬಟ್-ಟಾಂಡಾ ರೋಡ್ ಹೊಸ ರೈಲು ಮಾರ್ಗವನ್ನೂ ಮೋದಿ ಅವರು ರಾಷ್ಟ್ರಕ್ಕೆ ಸಮರ್ಪಿಸಲಿದ್ದಾರೆ. ಈ ಮಾರ್ಗವು ಅಲಿರಾಜ್‌ಪುರದ ದೂರದ ಹಾಗೂ ಬುಡಕಟ್ಟು ಪ್ರದೇಶಗಳನ್ನು ರಾಷ್ಟ್ರೀಯ ರೈಲ್ವೆ ಜಾಲಕ್ಕೆ ಸಂಪರ್ಕಿಸಲಿದ್ದು, ಮಾರುಕಟ್ಟೆ, ಉದ್ಯೋಗ ಮತ್ತು ಆರ್ಥಿಕ ಅವಕಾಶಗಳಿಗೆ ಉತ್ತಮ ಪ್ರವೇಶ ಕಲ್ಪಿಸುವ ನಿರೀಕ್ಷೆಯಿದೆ.

ಇದೇ ವೇಳೆ ₹9,700 ಕೋಟಿಗೂ ಅಧಿಕ ವೆಚ್ಚದ 329 ಕಿಲೋಮೀಟರ್ ಉದ್ದದ ಮೂರು ರೈಲ್ವೆ ಯೋಜನೆಗಳಿಗೆ ಮೋದಿ ಅವರು ಶಂಕುಸ್ಥಾಪನೆ ನೆರವೇರಿಸಲಿದ್ದಾರೆ. ವಡೋದರ-ರತ್ಲಾಂ ನಡುವೆ ಮೂರನೇ ಮತ್ತು ನಾಲ್ಕನೇ ರೈಲು ಮಾರ್ಗ ನಿರ್ಮಾಣ, ಮಿಯಾಗಂ ಕರ್ಜನ್-ಚೋರಂದಾ-ಮಲ್ಸರ್ ವಿಭಾಗದ ಗೇಜ್ ಪರಿವರ್ತನೆ ಮತ್ತು ವಿಶ್ವಾಮಿತ್ರಿ-ದಭೋಯಿ ರೈಲು ಮಾರ್ಗದ ದ್ವಿಗುಣಗೊಳಿಸುವಿಕೆ ಈ ಯೋಜನೆಗಳಲ್ಲಿ ಸೇರಿವೆ.

ಈ ಯೋಜನೆಗಳು ಪ್ರಯಾಣಿಕ ಮತ್ತು ಸರಕು ರೈಲುಗಳ ಸಾಮರ್ಥ್ಯ ಹೆಚ್ಚಿಸುವುದು, ಹಾಲಿ ಮಾರ್ಗಗಳ ಮೇಲಿನ ದಟ್ಟಣೆ ಕಡಿಮೆ ಮಾಡುವುದು ಹಾಗೂ ಗುಜರಾತ್ ಮತ್ತು ಮಧ್ಯಪ್ರದೇಶ ನಡುವಿನ ರೈಲು ಸಂಪರ್ಕವನ್ನು ಸುಧಾರಿಸುವ ಗುರಿ ಹೊಂದಿವೆ. ಕೈಗಾರಿಕಾ ಮತ್ತು ಕೃಷಿ ಉತ್ಪನ್ನಗಳ ಸಾಗಣೆಯೂ ಇದರಿಂದ ಮತ್ತಷ್ಟು ಸುಗಮವಾಗಲಿದೆ.

ಸುಮಾರು ₹1,780 ಕೋಟಿ ವೆಚ್ಚದ ಮೂರು ರಾಷ್ಟ್ರೀಯ ಹೆದ್ದಾರಿ ಯೋಜನೆಗಳಿಗೂ ಮೋದಿ ಅವರು ಶಂಕುಸ್ಥಾಪನೆ ನೆರವೇರಿಸಲಿದ್ದಾರೆ. NH-48ರ ಕಾಮ್ರೆಜ್-ಚಾಲ್ತಾನ್ ವಿಭಾಗವನ್ನು ಆರು ಪಥಗಳಾಗಿ ಅಭಿವೃದ್ಧಿಪಡಿಸುವುದು, ವಡೋದರ-ಸೂರತ್ NH-48 ಮಾರ್ಗದಲ್ಲಿ ತಾಪ್ತಿ ಮತ್ತು ನರ್ಮದಾ ನದಿಗಳ ಮೇಲೆ ಪ್ರಮುಖ ಸೇತುವೆಗಳು ಸೇರಿದಂತೆ ಹೆಚ್ಚುವರಿ ರಚನೆಗಳ ನಿರ್ಮಾಣ ಮತ್ತು NH-53ರಲ್ಲಿ ಅಭವಾ, ಮಿಂಧೋಲಾ ಹಾಗೂ ಖಜೋಡ್ ಜಂಕ್ಷನ್‌ಗಳಲ್ಲಿ ಗ್ರೇಡ್-ಸೆಪರೇಟೆಡ್ ರಚನೆಗಳ ನಿರ್ಮಾಣ ಇದರಲ್ಲಿ ಸೇರಿವೆ.

ಕಂದಾರಿ ಚೋಕ್ಡಿ ಮತ್ತು ಲುವಾರಾ ಪಾಟಿಯಾ ಪ್ರದೇಶಗಳಲ್ಲಿ ನಿರ್ಮಿಸಲಾದ ಆರು ಪಥದ ಮೇಲ್ಸೇತುವೆಗಳನ್ನೂ ಮೋದಿ ಉದ್ಘಾಟಿಸಲಿದ್ದಾರೆ. ಈ ಯೋಜನೆಗಳು ರಸ್ತೆ ಸುರಕ್ಷತೆ ಹೆಚ್ಚಿಸುವುದು, ಸಂಚಾರ ದಟ್ಟಣೆ ಕಡಿಮೆ ಮಾಡುವುದು ಮತ್ತು ವಡೋದರ-ಸೂರತ್ NH-48 ಮಾರ್ಗದಲ್ಲಿನ ಅಪಘಾತಪೀಡಿತ ಸ್ಥಳಗಳನ್ನು ಸುಧಾರಿಸುವ ಗುರಿ ಹೊಂದಿವೆ.

ವಡೋದರ ಕಾರ್ಯಕ್ರಮದಲ್ಲಿ ಸುಮಾರು ₹2,600 ಕೋಟಿ ಮೌಲ್ಯದ ಗುಜರಾತ್ ಸರ್ಕಾರದ ಯೋಜನೆಗಳಿಗೂ ಚಾಲನೆ ದೊರೆಯಲಿದೆ. ವಡೋದರ ನಗರಾಭಿವೃದ್ಧಿ ಪ್ರಾಧಿಕಾರದ ರಿಂಗ್ ರೋಡ್‌ನ ಎರಡನೇ ಹಂತ, ಕಡಾಣಾ ಅಣೆಕಟ್ಟಿನಲ್ಲಿ 110 ಮೆಗಾವ್ಯಾಟ್ ತೇಲುವ ಸೌರ ವಿದ್ಯುತ್ ಯೋಜನೆ ಹಾಗೂ ವಡೋದರ ಮಹಾನಗರ ಪಾಲಿಕೆಯ ಹೊಸ ಕಚೇರಿ ಕಟ್ಟಡಕ್ಕೆ ಶಂಕುಸ್ಥಾಪನೆ ನೆರವೇರಿಸಲಾಗುತ್ತದೆ.

ಪ್ರಧಾನಮಂತ್ರಿ ಆವಾಸ್ ಯೋಜನೆಯಡಿ ನಿರ್ಮಿಸಲಾದ ವಸತಿ ಯೋಜನೆಗಳು ಹಾಗೂ ಪೂರ್ವ ವಡೋದರದ 11 ಗ್ರಾಮಗಳಿಗೆ ನೀರು ಪೂರೈಕೆ ಮಾಡುವ ಯೋಜನೆಯನ್ನೂ ಮೋದಿ ಉದ್ಘಾಟಿಸಲಿದ್ದಾರೆ.

ಗುಜರಾತ್ ಕಾರ್ಯಕ್ರಮಗಳ ಬಳಿಕ ಮೋದಿ ಅವರು ಮುಂಬೈಗೆ ತೆರಳಲಿದ್ದು, ಸಂಜೆ ಸುಮಾರು 5.45ಕ್ಕೆ ಗ್ಲೋಬಲ್ ಫಿನ್‌ಟೆಕ್ ಫೆಸ್ಟ್ (GFF) 2026 ಅನ್ನು ಉದ್ಘಾಟಿಸಿ ಸಭೆಯನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ.

GFF 2026ರ ಏಳನೇ ಆವೃತ್ತಿ ಸೆಪ್ಟೆಂಬರ್ 8ರಿಂದ 11ರವರೆಗೆ ಮುಂಬೈನಲ್ಲಿ ನಡೆಯಲಿದೆ. ನೀತಿಯ ರೂಪಕರು, ನಿಯಂತ್ರಣ ಸಂಸ್ಥೆಗಳು, ಕೇಂದ್ರ ಬ್ಯಾಂಕ್‌ಗಳು, ಹಣಕಾಸು ಸಂಸ್ಥೆಗಳು, ಫಿನ್‌ಟೆಕ್ ಕಂಪನಿಗಳು, ತಂತ್ರಜ್ಞಾನ ಸಂಸ್ಥೆಗಳು, ಹೂಡಿಕೆದಾರರು ಮತ್ತು ಶಿಕ್ಷಣ ತಜ್ಞರು ಸೇರಿದಂತೆ ವಿವಿಧ ಕ್ಷೇತ್ರಗಳ ಪ್ರಮುಖರು ಈ ಅಂತಾರಾಷ್ಟ್ರೀಯ ಸಮಾವೇಶದಲ್ಲಿ ಭಾಗವಹಿಸಲಿದ್ದಾರೆ.

ಈ ಬಾರಿಯ ಸಮಾವೇಶದ ಮುಖ್ಯ ವಿಷಯ "Potential to Impact: Agentic AI, Tokenisation, Quantum - Trusted, Connected, Global Systems for Inclusive Finance" ಆಗಿದೆ.

ಏಜೆಂಟಿಕ್ ಕೃತಕ ಬುದ್ಧಿಮತ್ತೆ, ಟೋಕನೈಸೇಶನ್, ಪ್ರೋಗ್ರಾಮೆಬಲ್ ಫೈನಾನ್ಸ್ ಮತ್ತು ಕ್ವಾಂಟಮ್ ತಂತ್ರಜ್ಞಾನಗಳ ಜೊತೆಗೆ ನಿಯಂತ್ರಣ, ನೀತಿ, ಹೂಡಿಕೆ ಹಾಗೂ ವಿಶ್ವಾಸಾರ್ಹ ಡಿಜಿಟಲ್ ಹಣಕಾಸು ವ್ಯವಸ್ಥೆಗಳ ಅಭಿವೃದ್ಧಿ ಕುರಿತು ಸಮಾವೇಶದಲ್ಲಿ ಚರ್ಚೆಗಳು ನಡೆಯಲಿವೆ.

ಮೋದಿ ಅವರ ಈ ಭೇಟಿ ಸರ್ಕಾರದ ಅಭಿವೃದ್ಧಿ ಕಾರ್ಯಸೂಚಿಯ ಎರಡು ಪ್ರಮುಖ ಅಂಶಗಳನ್ನು ಒಟ್ಟುಗೂಡಿಸುತ್ತದೆ. ಒಂದೆಡೆ ದೊಡ್ಡ ಪ್ರಮಾಣದ ಭೌತಿಕ ಮೂಲಸೌಕರ್ಯ ಅಭಿವೃದ್ಧಿ, ಮತ್ತೊಂದೆಡೆ ತಂತ್ರಜ್ಞಾನ ಆಧಾರಿತ ಹಣಕಾಸು ವ್ಯವಸ್ಥೆಯ ವಿಸ್ತರಣೆ.

ಗುಜರಾತ್‌ನಲ್ಲಿ ರೈಲ್ವೆ, ಹೆದ್ದಾರಿ, ಸರಕು ಸಾಗಣೆ, ಲಾಜಿಸ್ಟಿಕ್ಸ್ ಮತ್ತು ನಗರಾಭಿವೃದ್ಧಿಗೆ ಹೆಚ್ಚಿನ ಒತ್ತು ನೀಡಲಾಗಿದ್ದರೆ, ಮುಂಬೈ ಕಾರ್ಯಕ್ರಮವು ಫಿನ್‌ಟೆಕ್ ಮತ್ತು ಜಾಗತಿಕ ಹಣಕಾಸು ಕ್ಷೇತ್ರದ ಭವಿಷ್ಯವನ್ನು ರೂಪಿಸುವ ಹೊಸ ತಂತ್ರಜ್ಞಾನಗಳ ಮೇಲೆ ಕೇಂದ್ರೀಕರಿಸಲಿದೆ.