ದೇವರಹಿಪ್ಪರಗಿ 13: ಬರಪೀಡಿತ ತಾಲ್ಲೂಕು ಘೋಷಣೆ ಹಾಗೂ ರೈತರಿಗೆ ವಿಶೇಷ ಪ್ಯಾಕೇಜ್ ಸೇರಿದಂತೆ ವಿವಿಧ ಬೇಡಿಕೆಗಳನ್ನು ಈಡೇರಿಸುವಂತೆ ಆಗ್ರಹಿಸಿ ಕರವೇ ತಾಲೂಕು ಸಂಘಟನೆ ಪದಾಧಿಕಾರಿಗಳು ಸೋಮವಾರ ಪ್ರತಿಭಟನೆ ನಡೆಸಿ ತಹಶೀಲ್ದಾರ್ ಅವರ ಪರವಾಗಿ ಕಂದಾಯ ಶಿರಸ್ತೇದಾರ ಸುರೇಶ ಮ್ಯಾಗೇರಿ ಅವರಿಗೆ ಮನವಿ ಪತ್ರ ಸಲ್ಲಿಸಿದರು.  ಕರವೇ ತಾಲೂಕು ಘಟಕದ ಅಧ್ಯಕ್ಷರಾದ ವಿಜಯಕುಮಾರ ಯಂಬತ್ನಾಳ ಹಾಗೂ ಯುವ ಮುಖಂಡ ಶಿವರಾಜ ತಳವಾರ  ಮಾತನಾಡಿ, ‘ಬಹುತೇಕ ಒಣಭೂಮಿ ಪ್ರದೇಶ ಹೊಂದಿರುವ ತಾಲ್ಲೂಕು ಇದಾಗಿದ್ದು, ರೈತರು ಮಳೆ ಆಶ್ರಿತ ಬೆಳೆಗಳನ್ನು ಹೆಚ್ಚಾಗಿ ಬೆಳೆಯುತ್ತಿದ್ದಾರೆ. ಈ ವರ್ಷ ಮುಂಗಾರು ಮಳೆ ಸಂಪೂರ್ಣ ಕೈಕೊಟ್ಟಿದ್ದು ರೈತರು ಕಂಗಾಲಾಗಿದ್ದಾರೆ’ ಎಂದರು.  

‘ಬಿತ್ತನೆ ಮಾಡಿದ ತೊಗರಿ, ಹತ್ತಿ, ಉಳ್ಳಾಗಡ್ಡಿ, ಕಬ್ಬು, ಮೆಕ್ಕೆಜೋಳ ಸೇರಿದಂತೆ ಇತರೆ ಬೆಳೆಗಳು ಒಣಗಿ ಹೋಗಿವೆ. ತೋಟಗಾರಿಕೆ ಬೆಳೆಗಳು ಬೆಳವಣಿಗೆ ಕಾಣದೆ ಕುಂಠಿತಗೊಂಡಿವೆ. ರಾಜ್ಯ ಸರ್ಕಾರ ತಕ್ಷಣ ಬರಪೀಡಿತ ತಾಲೂಕು ಘೋಷಣೆ ಹಾಗೂ ರೈತರಿಗೆ ಪ್ಯಾಕೇಜ್ ಘೋಷಣೆ ಮಾಡಿ ನೆರವಿಗೆ ಬರಬೇಕು, ಕುಡಿಯುವ ನೀರಿಗಾಗಿ ಕಾಲುವೆಗಳಿಗೆ ನೀರು ಹರಿಸಬೇಕು, ಜಾನುವಾರಗಳಿಗೆ ಗೋಶಾಲೆ ಹಾಗೂ ಮೇವು ಬ್ಯಾಂಕ್ ಸ್ಥಾಪನೆ ಮಾಡಬೇಕು ಎಂದು ಒತ್ತಾಯಿಸಿದರು.  ಮುಖಂಡರುಗಳಾದ ರಾಜು ಬಾವಿಮನಿ, ಚಂದ್ರಶೇಖರ ದಾನಗೊಂಡ, ಪ್ರಕಾಶ ಡೋಣೂರಮಠ, ಚೆನ್ನಪ್ಪ ಮಾವಿನಗಿಡದ, ರಘು ಗಂಜಾಳ,ವಿಜು ಪಾಟೀಲ,ಅನೀಲ ಬಿರಾದಾರ, ಬಸು ಅವಟಿ,ಬಸು ಮಸಿಬಿನಾಳ, ಸಿದ್ದು ಪೂಜಾರಿ, ರಾಕೇಶ ದಾನಗೊಂಡ, ಸಿದ್ದು ಅಂಗಡಿ,ಅಂಬ್ರೀಶ ಮಾಶಾನವರ, ಈಶ್ವರ ಬಾಗೇವಾಡಿ,ಅನೀಲ ಜಲಕತ್ತಿ ಸೇರಿದಂತೆ ರೈತರು ಮತ್ತು ಕರವೇ ಕಾರ್ಯಕರ್ತರು ಉಪಸ್ಥಿತರಿದ್ದರು.