ಹೂವಿನಹಡಗಲಿ, ಜು. 4: ಮಳೆಯಾಗಲೆಂದು ಪ್ರಾರ್ಥಿಸಿ ತಾಲ್ಲೂಕಿನ ಸೋಗಿ ಗ್ರಾಮದ ಪುರಾತನ ಕಲ್ಲೇಶ್ವರ ದೇವಾಲಯದಲ್ಲಿ ಭಕ್ತರು ಐದು ದಿನಗಳ ಕಾಲ ನಿರಂತರ ಜಲಾಭಿಷೇಕ ಹಾಗೂ ವಿಶೇಷ ಪೂಜಾ ಕಾರ್ಯಕ್ರಮಗಳನ್ನು ಆರಂಭಿಸಿದ್ದಾರೆ. ಗುರುವಾರ ಬೆಳಿಗ್ಗೆ ಬೆಟ್ಟದ ಮಲ್ಲೇಶ್ವರ ಸ್ವಾಮಿಗೆ ಅಭಿಷೇಕ ನೆರವೇರಿಸಿ, ಐದು ಬಿಂದಿಗೆಗಳಲ್ಲಿ ಪಾತಾಳ ಗಂಗೆಯ ನೀರನ್ನು ತರಲಾಯಿತು. ಬಳಿಕ ಗ್ರಾಮದ ಬಸವೇಶ್ವರ, ವೀರಭದ್ರೇಶ್ವರ, ತೇರುಗಡ್ಡೆ ದುರ್ಗಮ್ಮ ಹಾಗೂ ಕರಿಗಲ್ಲು ದೇವತೆಗಳಿಗೆ ಅಭಿಷೇಕ ನಡೆಸಲಾಯಿತು.  

ಕಲ್ಲೇಶ್ವರ ದೇವಾಲಯದಲ್ಲಿ ಶಿವಲಿಂಗದ ಮೇಲೆ ಧಾರಾಪಾತ್ರೆ ಕಟ್ಟಿ ನಿರಂತರ ಜಲಾಭಿಷೇಕ ಆರಂಭಿಸಲಾಗಿದ್ದು, ಪ್ರತಿದಿನ ವಿಶೇಷ ಪೂಜೆ ಹಾಗೂ ಭಜನೆಗಳು ನಡೆಯುತ್ತಿವೆ.  ಜುಲೈ 6ರಂದು ಗ್ರಾಮದ ಹೊರವಲಯದಲ್ಲಿರುವ ಮಳೆ ಮಲ್ಲಪ್ಪ ದೇವಾಲಯದಲ್ಲಿ ವಿಶೇಷ ಪೂಜೆ, ಅನ್ನಸಂತರೆ​‍್ಣ (ಪರವು) ಹಾಗೂ ಸಂಜೆ ಕಲ್ಲೇಶ್ವರ ದೇವಾಲಯದಲ್ಲಿ ಮಹಾ ಮಂಗಳಾರತಿಯೊಂದಿಗೆ ಮಳೆ ಪೂಜೆ ನೆರವೇರಲಿದೆ.  ಈ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಗ್ರಾಮದ ಹಿರಿಯರು, ದೇವಸ್ತರು ಹಾಗೂ ಭಕ್ತರು ಭಾಗವಹಿಸಿ ನೇತೃತ್ವ ವಹಿಸಿದ್ದಾರೆ.