ತಾಳಿಕೋಟೆ, ಆ.30: ತಾಲೂಕಿನ ಮೈಲೇಶ್ವರ ಗ್ರಾಮದ ರೈತ ರಮೇಶ ನಿಂಗಣ್ಣ ಕುಕನೂರ ಅವರು ತಮ್ಮ ಎತ್ತುಗಳ ಸಹಾಯದಿಂದ ಕೇವಲ 10 ಗಂಟೆಗಳಲ್ಲಿ 22 ಎಕರೆ ತೊಗರಿ ಹೊಲವನ್ನು ಕೊಯ್ಲು ಮಾಡುವ ಮೂಲಕ ಗಮನಾರ್ಹ ಸಾಧನೆ ಮಾಡಿದ್ದಾರೆ.  

ಶುಕ್ರವಾರ ಬೆಳಿಗ್ಗೆ 5 ಗಂಟೆಗೆ ತೊಗರಿ ಹೊಲದ ಕೊಯ್ಲು ಆರಂಭಿಸಿದ ಅವರು ಮಧ್ಯಾಹ್ನ 3 ಗಂಟೆಯ ವೇಳೆಗೆ 22 ಎಕರೆ ಪ್ರದೇಶದ ಕೊಯ್ಲು ಪೂರ್ಣಗೊಳಿಸಿದ್ದಾರೆ. ಎತ್ತುಗಳ ಸಹಾಯದಿಂದ ಇಂತಹ ಸಾಧನೆ ಮಾಡಿದ ರಮೇಶ ಅವರನ್ನು ಗ್ರಾಮಸ್ಥರು ಎತ್ತುಗಳ ಸಮೇತ ಗ್ರಾಮದ ಪ್ರವೇಶದ್ವಾರದ ಬಳಿ ಅದ್ದೂರಿಯಾಗಿ ಸ್ವಾಗತಿಸಿದರು.  

ಈ ಸಂದರ್ಭದಲ್ಲಿ ನೂರಾರು ರೈತರು ಹಲಗೆ ಮೇಳದೊಂದಿಗೆ ಕುಣಿದು ಕುಪ್ಪಳಿಸಿ, ಪಟಾಕಿ ಸಿಡಿಸಿ, ಗುಲಾಲು ಎರಚಿ ಸಂಭ್ರಮಿಸಿದರು. ಗ್ರಾಮದ ಪ್ರವೇಶದ್ವಾರದಿಂದ ಶ್ರೀ ಬಸವೇಶ್ವರ ದೇವಸ್ಥಾನದವರೆಗೆ ಭವ್ಯ ಮೆರವಣಿಗೆ ನಡೆಸಿ, ಬಳಿಕ ಶ್ರೀಪಾದ ಬಸವೇಶ್ವರರಿಗೆ ವಿಶೇಷ ಪೂಜೆ ಸಲ್ಲಿಸಲಾಯಿತು.  

ಸಂಭ್ರಮದ ಸಂದರ್ಭದಲ್ಲಿ ಮಾತನಾಡಿದ ರೈತ ರಮೇಶ ಕುಕನೂರ, “ಈ ಸಾಧನೆ ಮಾಡಬೇಕು ಎಂಬುದು ಬಹುದಿನಗಳ ಆಸೆಯಾಗಿತ್ತು. ಇಂದು ನನ್ನ ಎತ್ತುಗಳು ಅದನ್ನು ಮಾಡಿ ತೋರಿಸಿವೆ. ಈ ಸಾಧನೆ ನನ್ನ ಎತ್ತುಗಳಿಂದಲೇ ಸಾಧ್ಯವಾಗಿದೆ. ಗ್ರಾಮಸ್ಥರು ತೋರಿದ ಪ್ರೀತಿ, ವಿಶ್ವಾಸಕ್ಕೆ ನಾನು ಋಣಿಯಾಗಿದ್ದೇನೆ” ಎಂದು ಹೇಳಿದರು.  

ಕಾರ್ಯಕ್ರಮದಲ್ಲಿ ನಿಂಗಣ್ಣ ಕುಕನೂರ, ರಮೇಶ ದೇಸಾಯಿ, ಪ್ರಕಾಶ ವಾಲಿಕಾರ, ಸಂಗಮೇಶ ಬಡಿಗೇರ, ಚಂದ್ರಶೇಖರ ಆಲಮೇಲ, ನಿಂಗಣ್ಣ ಕುಳಗೇರಿ, ಶಶಿಕುಮಾರ ಕುಕನೂರ, ಶ್ರೀಕಾಂತ ಪಾಟೀಲ, ಸದ್ಧಾಮ ಸಾಲವಾಡಗಿ, ಕಾಶೀನಾಥ ಕುಳಗೇರಿ ಸೇರಿದಂತೆ ಗ್ರಾಮಸ್ಥರು ಉಪಸ್ಥಿತರಿದ್ದರು.