ಲೋಕದರ್ಶನ ವರದಿ 

ಧಾರವಾಡ, ಜು.28: ವ್ಯಕ್ತಿಗಿಂತ ವ್ಯಕ್ತಿತ್ವಕ್ಕೆ ಹೆಚ್ಚು ಬೆಲೆ ಇದೆ. ವ್ಯಕ್ತಿ ಇಲ್ಲದಾದರೂ ಅವರ ವ್ಯಕ್ತಿತ್ವ ಸದಾ ಜೀವಂತವಾಗಿರುತ್ತದೆ ಎಂದು ನಿವೃತ್ತ ಶಿಕ್ಷಕ ವೀರಣ್ಣ ಒಡ್ಡೀನ್ ಹೇಳಿದರು.  ತಾಲೂಕಿನ ಸೋಮಾಪುರ ಪ್ರೌಢಶಾಲೆಯ 1996ನೇ ಸಾಲಿನ ಎಸ್‌ಎಸ್‌ಎಲ್ಸಿ ವಿದ್ಯಾರ್ಥಿಗಳು ಆಯೋಜಿಸಿದ್ದ ಗುರು ವಂದನೆ ಹಾಗೂ ಸ್ನೇಹ ಸಮ್ಮಿಲನ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.  

ಮನುಷ್ಯನ ಬದುಕಿನಲ್ಲಿ ಆಯಸ್ಸಿಗಿಂತ ಬದುಕಿನ ರೀತಿ ಮುಖ್ಯ. ಅನ್ಯಾಯದ ಬದುಕಿಗಿಂತ ಸಾರ್ಥಕ ಜೀವನವೇ ಶ್ರೇಷ್ಠ. ವಿದ್ಯಾರ್ಥಿಗಳು ಅನ್ಯಾಯದ ವಿರುದ್ಧ ಧ್ವನಿ ಎತ್ತುವ ಮನೋಭಾವ ಬೆಳೆಸಿಕೊಳ್ಳಬೇಕು. ತಪ್ಪು ಮಾಡಬಾರದು; ತಪ್ಪು ಮಾಡಿದರೆ ಅದಕ್ಕೆ ಗುರುಗಳಿಗೂ ಹೊಣೆ ಬರುತ್ತದೆ. ಸಮಾಜದಲ್ಲಿ ಉತ್ತಮ ಹೆಸರನ್ನು ಉಳಿಸಿಕೊಳ್ಳುವಂತಹ ಕಾರ್ಯಗಳನ್ನು ಮಾಡಬೇಕು. ದುಷ್ಟಚಟಗಳಿಂದ ದೂರವಿದ್ದು ಸದೃಢ ಆರೋಗ್ಯದತ್ತ ಗಮನ ಹರಿಸಬೇಕು ಎಂದು ಸಲಹೆ ನೀಡಿದರು.  

ರಾಜಶೇಖರ ಗಂಧದ ಮಾತನಾಡಿ, ವಿದ್ಯಾರ್ಥಿಗಳಲ್ಲಿ ಸಮಾಜವನ್ನು ಬದಲಿಸುವ ಅಪಾರ ಶಕ್ತಿ ಇದೆ. ತಮ್ಮ ಸಾಮರ್ಥ್ಯವನ್ನು ಸಮಾಜದ ಒಳಿತಿಗಾಗಿ ಬಳಸಿಕೊಂಡು, ಹಣದ ಹಿಂದೆ ಓಡುವುದಕ್ಕಿಂತ ಮಾನವೀಯ ಮೌಲ್ಯಗಳಿಗೆ ಆದ್ಯತೆ ನೀಡಬೇಕು ಎಂದು ಹೇಳಿದರು.  

ಕಾರ್ಯಕ್ರಮದಲ್ಲಿ ನಿವೃತ್ತ ಶಿಕ್ಷಕರಾದ ಜಿ.ಎಸ್‌. ರುಬ್ಬಿ, ಎಂ.ವಿ. ಪಾಟೀಲ, ಜಿ.ಎಂ. ನಿಡಗುಂದಿ, ವಿಜಯಾ ಜೋಶಿ ಹಾಗೂ ಶೋಭಾ ಕಾಳೆ ಅವರನ್ನು ಸನ್ಮಾನಿಸಲಾಯಿತು.  ಹಳೆಯ ವಿದ್ಯಾರ್ಥಿಗಳ ಪರವಾಗಿ ಸಿ.ಪಿ.ಐ. ಸುರೇಶ್ ಸಗರಿ, ದಾವಳ ತಹಶೀಲ್ದಾರ್, ದ್ಯಾಮಣ್ಣ ಬೊಳಶೆಟ್ಟಿ ಹಾಗೂ ಶಂಕರ ಅಣ್ಣಿಗೇರಿ ತಮ್ಮ ಅನುಭವಗಳನ್ನು ಹಂಚಿಕೊಂಡರು.  ಜಯಶ್ರೀ ಕುರಡಿಕೇರಿ ಸ್ವಾಗತಿಸಿದರು. ಪ್ರೊ. ಮಂಜುನಾಥ ಕುರಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮಂಜುನಾಥ ಜುಟ್ಟಣ್ಣ ನಿರೂಪಿಸಿ, ಕುಸುಮಾ ಶಿಂಪಿ ವಂದಿಸಿದರು.  ಕಾರ್ಯಕ್ರಮದ ಕೊನೆಯಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮಗಳು ಜರುಗಿದವು. ಹಳೆಯ ವಿದ್ಯಾರ್ಥಿಗಳು, ಅವರ ಕುಟುಂಬದ ಸದಸ್ಯರು ಹಾಗೂ ಶಿಕ್ಷಕರು ಉಪಸ್ಥಿತರಿದ್ದರು.