ಮುಧೋಳ 13: ಬಿವಿವಿ ಸಂಘದ ನಗರದ ಎಸ್ ಆರ್ ಕಂಠಿ ಮಹಾವಿದ್ಯಾಲಯದ ಗ್ರಂಥಾಲಯ ಮತ್ತು ಮಾಹಿತಿ ಕೇಂದ್ರದ ವತಿಯಿಂದ ಆಂತರಿಕ ಗುಣಮಟ್ಟ ಭರವಸೆ ಕೋಶ (ಋಂಅ) ಮತ್ತು ಗ್ರಂಥಾಲಯ ಸಲಹಾ ಸಮಿತಿ ಆಶ್ರಯದಲ್ಲಿ ಮಂಗಳವಾರ ರಾಷ್ಟ್ರೀಯ ಗ್ರಂಥ ಪಾಲಕರ ದಿನವನ್ನು ಭಾರತದ ಗ್ರಂಥಾಲಯದ ಪಿತಾಮಹ ಪದ್ಮಶ್ರೀ ಡಾ.ಎಸ್‌.ಆರ್‌.ರಂಗನಾಥನ್ ಅವರ 133 ನೇ ಜನ್ಮದ ವಾರ್ಷಿಕೋತ್ಸವದಂಗವಾಗಿ ವಿಜೃಂಭಣೆಯಿಂದ ಆಚರಿಸಲಾಯಿತು.  

ಸಾಂಪ್ರದಾಯಿಕ ಪೂಜೆ ಹಾಗೂ ಮಹಿಳಾ ಸಿಬ್ಬಂದಿಯಿಂದ ಪ್ರಾರ್ಥನಾ ಗೀತೆಯಿಂದ ಆರಂಭವಾದ ಕಾರ್ಯಕ್ರಮವು ಪ್ರಾಚಾರ್ಯರು ಹಾಗೂ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿಯವರು ಡಾ. ಎಸ್‌.ಆರ್‌.ರಂಗನಾಥನ್ ಅವರ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಸಲ್ಲಿಸಿದರು. ಪ್ರಾಚಾರ್ಯ ಡಾ.ಎಮ್‌.ಆರ್‌.ಜರುಕುಂಟಿ ಅಧ್ಯಕ್ಷತೆ ವಹಿಸಿ ರಾಷ್ಟ್ರೀಯ ಗ್ರಂಥ ಪಾಲಕರ ದಿನದ ಮಹತ್ವವನ್ನು ವಿವರಿಸಿ, ಭಾರತದ ಗ್ರಂಥಾಲಯಗಳ ವಿಕಸನಕ್ಕೆ ಡಾ. ರಂಗನಾಥನ್ ಅವರು ನೀಡಿದ ಅಮೂಲ್ಯ ಕೊಡುಗೆಯನ್ನು ಸ್ಮರಿಸಿದರು. 

ಐಕ್ಯೂಎಸಿ ಸಂಯೋಜಕ ಅಜ್ಜಪ್ಪ ಕಡೂರು ಮಾತನಾಡಿ ಮಹಾವಿದ್ಯಾಲಯವು ಗ್ರಂಥಾಲಯದ ಕೇಂದ್ರವಾಗಿದ್ದು ವಿದ್ಯಾರ್ಥಿಗಳು ಮತ್ತು ಅಧ್ಯಾಪಕರು ಲಭ್ಯವಿರುವ ಬೌದ್ಧಿಕ ಸಂಪನ್ಮೂಲಗಳನ್ನು ಸಮರ​‍್ಕವಾಗಿ ಬಳಸಿಕೊಳ್ಳಬೇಕೆಂದು ಹೇಳಿದರು. 

ಗ್ರಂಥಪಾಲಕ ಚಿರಂಜೀವಿ ಎಲ್‌.ಎಂ. ಅವರು ಡಾ.ಎಸ್‌.ಆರ್‌. ರಂಗನಾಥನ್ ಅವರ ಜೀವನ ಪಯಣ ಮತ್ತು ಶೈಕ್ಷಣಿಕ ಸಾಧನೆಗಳು, ಮದ್ರಾಸ್ ವಿಶ್ವವಿದ್ಯಾಲಯದ ಪ್ರಥಮ ಗ್ರಂಥಪಾಲಕರಾಗಿ ಮಾಡಿದ ಸೇವೆ ಹಾಗೂ ಕೋಲನ್ ವರ್ಗೀಕರಣ ಪದ್ಧತಿ ರೂಪಿಸಿದ ಕೊಡುಗೆಯನ್ನು ವಿವರಿಸಿ, ಎಲ್ಲರಿಗೂ ಸಮಾನವಾದ ಸೇವೆ ನೀಡುವ ಪ್ರಜಾಸತ್ತಾತ್ಮಕ ಸಂಸ್ಥೆಗಳಾಗಿ ಗ್ರಂಥಾಲಯಗಳನ್ನು ನಿರ್ಮಿಸಲು ರಂಗನಾಥನ್ ಅವರ ದೃಷ್ಟಿಕೋನವನ್ನು ಹಂಚಿಕೊಂಡರು, ಗ್ರಂಥಾಲಯ ಶಾಸ್ತ್ರದ 5 ಕಾನೂನುಗಳು ಇಂದಿಗೂ ಪ್ರಸ್ತುತವಾಗಿದ್ದು ಡಿಜಿಟಲ್ ಯುಗದಲ್ಲಿಯೂ ಗ್ರಂಥಾಲಯ ವೃತ್ತಿಪರರಿಗೆ ಮಾರ್ಗದರ್ಶಿಯಾಗಿವೆ ಎಂದರು. 

ಗ್ರಂಥಾಲಯ ಸಲಹಾ ಸಮಿತಿ ಅಧ್ಯಕ್ಷೆ ಎಸ್‌.ಎಸ್‌.ಬಿರಾದರ ಕಾರ್ಯಕ್ರಮ ಯಶಸ್ವಿಯಾಗಿ ನಡೆಸಿ ಕೊಟ್ಟು, ಗ್ರಂಥಾಲಯ ಸಿಬ್ಬಂದಿಯ ಪ್ರಯತ್ನಗಳನ್ನು ಮೆಚ್ಚಿ, ವಿದ್ಯಾರ್ಥಿಗಳಲ್ಲಿ ಓದುವ ಅಭ್ಯಾಸ ಬೆಳೆಸುವ ಅಗತ್ಯವನ್ನು ಒತ್ತಿ ಹೇಳಿದರು. 

ಗ್ರಂಥಾಲಯ ಸಲಹಾ ಸಮಿತಿಯ ಸದಸ್ಯರಾದ ಮಂಜುನಾಥ ಬಾಳನಾಯಕ, ಡಾ.ಎಸ್‌.ಎಸ್‌. ಸಬರದ, ಎಲ್‌.ಎಂ.ಕಲ್ಯಾಣಶೆಟ್ಟಿ, ಆರ್‌.ಆರ್‌. ಮಾಲಿಪಾಟೀಲ, ಸಹಾಯಕ ಗ್ರಂಥಪಾಲಕಿ ಸುನಿತಾ ಕೊಣ್ಣೂರಮಠ, ಗ್ರಂಥಾಲಯ ಸಹಾಯಕ ಬಿ.ವಿ.ಪೂಜಾರಿ ಮತ್ತು ಗ್ರಂಥಾಲಯ ಸೇವಕ ಬಸವರಾಜ ಕರಗುಳಿ ಹಾಗೂ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿ ಉಪಸ್ಥಿತರಿದ್ದು, ಡಾ.ಎಸ್‌.ಆರ್‌. ರಂಗನಾಥನ್ ಅವರ ಶಾಶ್ವತ ಕೊಡುಗೆಗಳನ್ನು ಸ್ಮರಿಸುವುದರ ಜೊತೆಗೆ ಶೈಕ್ಷಣಿಕ ಸಮುದಾಯದಲ್ಲಿ ಜ್ಞಾನವನ್ನು ವಿಸ್ತರಿಸುವ ಜವಾಬ್ದಾರಿಯನ್ನು ಗ್ರಂಥಾಲಯ ವೃತ್ತಿಪರರು ನಿರಂತರವಾಗಿ ನೆರವೇರಿಸಬೇಕೆಂದು ಸಂದೇಶವನ್ನು ಹಂಚಿಕೊಂಡರು.