ಲೋಕದರ್ಶನ ವರದಿ 

   ಧಾರವಾಡ  11: ಕೃಷಿ ವಿಶ್ವವಿದ್ಯಾಲಯದ ಸಸ್ಯ ರೋಗಶಾಸ್ತ್ರ ವಿಭಾಗದ ವತಿಯಿಂದ ವಿಶ್ವಪ್ರಸಿದ್ಧ ಕೃಷಿ ವಿಜ್ಞಾನಿ ಹಾಗೂ ಧಾರವಾಡ ಕೃಷಿ ವಿಶ್ವವಿದ್ಯಾಲಯದ ಮಾಜಿ ದ್ವಿತೀಯ ಕುಲಪತಿಗಳಾದ ದಿವಂಗತ ಡಾ. ಆರ್‌.ಕೆ. ಹೆಗಡೆ ಅವರ ಸ್ಮರಣಾರ್ಥ 20ನೇ ಸ್ಮಾರಕ ಉಪನ್ಯಾಸ ಸರಣಿ ಕಾರ್ಯಕ್ರಮವನ್ನು 2026ರ ಜುಲೈ 9ರಂದು ಆಯೋಜಿಸಲಾಯಿತು. ಈ ಸಂದರ್ಭದಲ್ಲಿ ಮಹಾರಾಷ್ಟ್ರದ ಅಕೋಲಾದ ಡಾ. ಪಂಜಾಬರಾವ್ ದೇಶಮುಖ ಕೃಷಿ ವಿದ್ಯಾಪೀಠದ ಮಾಜಿ ವಿಸ್ತರಣಾ ಶಿಕ್ಷಣ ನಿರ್ದೇಶಕರಾದ ಡಾ. ರಾಜೇಂದ್ರ ಎಂ. ಗಾಡೆ ಅವರು “ತೋಟಗಾರಿಕಾ ಬೆಳೆಗಳಲ್ಲಿ ಫೈಟೋಫ್ಥೋರಾ ರೋಗಗಳು ಮತ್ತು ಅವುಗಳ ನಿರ್ವಹಣೆ ಹಿ ವಿಶೇಷವಾಗಿ ಸಿಟ್ರಸ್ ಬೆಳೆಗಳ ಪರಿಪ್ರೇಕ್ಷ್ಯದಲ್ಲಿ” ಎಂಬ ವಿಷಯದ ಕುರಿತು ಸ್ಮಾರಕ ಉಪನ್ಯಾಸ ನೀಡಿದರು.

ಅವರು ಸಿಟ್ರಸ್ ಬೆಳೆಗಳಲ್ಲಿ ಕಾಣಿಸಿಕೊಳ್ಳುವ ಫೈಟೋಫ್ಥೋರಾ ರೋಗಗಳ ಗುರುತಿಸುವಿಕೆ ವಿಧಾನಗಳು, ಉತ್ಪಾದನಾ ನಷ್ಟಗಳು, ಆಣ್ವಿಕ ತಂತ್ರಜ್ಞಾನಗಳು, ಕೃತಕ ಬುದ್ಧಿಮತ್ತೆ  ಆಧಾರಿತ ರೋಗನಿರ್ಣಯ ಸಾಧನಗಳು ಹಾಗೂ ಸಮಗ್ರ ನಿರ್ವಹಣಾ ಕ್ರಮಗಳ ಕುರಿತು ವಿವರಿಸಿದರು. ಮಹಾರಾಷ್ಟ್ರ ಮತ್ತು ಕರ್ನಾಟಕದ ಸಿಟ್ರಸ್ ಬೆಳೆ ಪ್ರದೇಶಗಳಲ್ಲಿ ಈ ರೋಗದ ಮಹತ್ವವನ್ನು ಅವರು ವಿಶೇಷವಾಗಿ ಉಲ್ಲೇಖಿಸಿದರು. ಸಂಶೋಧಕರು ಹಾಗೂ ವಿಸ್ತರಣಾ ಕಾರ್ಯಕರ್ತರು ರೈತರಿಗೆ ಪರಿಸರ ಸ್ನೇಹಿ ಮತ್ತು ಶಾಶ್ವತ ನಿರ್ವಹಣಾ ಕ್ರಮಗಳನ್ನು ತಲುಪಿಸುವಲ್ಲಿ ಈ ಉಪನ್ಯಾಸ ಸಹಕಾರಿಯಾಗಲಿದೆ ಎಂದು ತಿಳಿಸಿದರು. 

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಕುಲಪತಿ ಡಾ. ಎಂ. ವಿ. ಮಂಜುನಾಥ ಅವರು ತಮ್ಮ ಅಧ್ಯಕ್ಷೀಯ ಭಾಷಣದಲ್ಲಿ ದಿವಂಗತ ಡಾ. ಆರ್‌.ಕೆ. ಹೆಗಡೆ ಅವರೊಂದಿಗೆ ಹೊಂದಿದ್ದ ಅನುಭವಗಳನ್ನು ಹಂಚಿಕೊಂಡರು. ರೈತ ಸಮುದಾಯಕ್ಕೆ ಕೀಟ ಮತ್ತು ರೋಗಗಳ ತ್ವರಿತ ಹಾಗೂ ಪರಿಣಾಮಕಾರಿ ನಿರ್ವಹಣೆಯ ಕುರಿತು ಮಾರ್ಗದರ್ಶನ ನೀಡುವ ಮೂಲಕ ಆರ್ಥಿಕ ನಷ್ಟವನ್ನು ಕಡಿಮೆ ಮಾಡಲು ಸಸ್ಯ ಸಂರಕ್ಷಣಾ ತಜ್ಞರು ಮುಂದಾಗಬೇಕು ಎಂದು ಅವರು ಕರೆ ನೀಡಿದರು.