ಶಿಗ್ಗಾವಿ 11: ನೃತ್ಯ ಶಾಲೆಗಳು ವ್ಯಕ್ತಿಯ ಸಮಗ್ರ ಬೆಳವಣಿಗೆಯಲ್ಲಿ ಮಹತ್ವದ ಪಾತ್ರವಹಿಸುವ ಜೊತೆಗೆ ನೃತ್ಯವು ಮಕ್ಕಳ ದೈಹಿಕ ಮತ್ತು ಮಾನಸಿಕ ಆರೋಗ್ಯವನ್ನು ಸುಧಾರಿಸುತ್ತದೆ ಎಂದು ಚಲನಚಿತ್ರ ನಟ ಹಾಗೂ ಸಮಾಜ ಸೇವಕ ವರುಣಗೌಡ್ರ ಪಾಟೀಲ ಹೇಳಿದರು.     

ಪಟ್ಟಣದ ವಿಂಗ್ಸ್‌ ಡಾನ್ಸ್‌ ಸ್ಟುಡಿಯೋದಲ್ಲಿ ವರುಣಗೌಡ್ರ ಪಾಟೀಲ ಅಭಿಮಾನಿ ಬಳಗದ ವತಿಯಿಂದ ನೃತ್ಯ ಶಾಲೆಯ 50 ಕ್ಕೂ ಹೆಚ್ಚು ಮಕ್ಕಳಿಗೆ ಟಿ-ಶರ್ಟ್‌ ಬಿಡುಗಡೆ ಮಾಡಿ ಮಾತನಾಡಿದ ಅವರು ಸೃಜನಶೀಲತೆ, ಸಾಂಸ್ಕೃತಿಕ ಅರಿವು ಮತ್ತು ಸಾಮಾಜಿಕ ಕೌಶಲ್ಯಗಳನ್ನು ಬೆಳೆಸುತ್ತವೆ, ನೃತ್ಯವು ವ್ಯಾಯಾಮದ ಒಂದು ರೂಪವಾಗಿದ್ದು, ಸಮನ್ವಯ, ಸಮತೋಲನ, ನಮ್ಯತೆ ಮತ್ತು ಶಕ್ತಿಯನ್ನು ಸುಧಾರಿಸುತ್ತದೆ, ನೃತ್ಯವು ವ್ಯಕ್ತಿಯ ಸೃಜನಶೀಲತೆಯನ್ನು ಉತ್ತೇಜಿಸುತ್ತದೆ, ಅಭಿವ್ಯಕ್ತಿಗೆ ಮಾರ್ಗವನ್ನು ಒದಗಿಸುತ್ತದೆ,ನಮ್ಮ ಸಾಂಸ್ಕೃತಿಕ ಪರಂಪರೆಯನ್ನು ಕಲಿಯಲು ಮತ್ತು ಆಚರಿಸಲು ಒಂದು ಮಾರ್ಗವಾಗಿದ್ದು ನೃತ್ಯವು  ಸಂವಹನ ನಡೆಸಲು ಕಲಿಯಲು ಸಹಾಯ ಮಾಡಿ, ಶಿಸ್ತು, ಏಕಾಗ್ರತೆ ಮತ್ತು ಆತ್ಮವಿಶ್ವಾಸವನ್ನು ಬೆಳೆಸುತ್ತದೆ ಒಟ್ಟಾರೆ ನೃತ್ಯ ಶಾಲೆಗಳು ವ್ಯಕ್ತಿಯ ಸಮಗ್ರ ಬೆಳವಣಿಗೆಗೆ ಒಂದು ಅತ್ಯುತ್ತಮ ಸಾಧನವಾಗಿದೆ ಎಂದರು.     

ರಾಜ್ಯ ಯುವ ಸಿರಿ ಪ್ರಶಸ್ತಿ ಪುರಸ್ಕೃತ ಕಲಾವಿಧ ಶರೀಫ ಮಾಕಾಪೂರ ಮಾತನಾಡಿ ನೃತ್ಯವು ಒತ್ತಡವನ್ನು ಕಡಿಮೆ ಮಾಡಲು ಮತ್ತು ಭಾವನಾತ್ಮಕ ಯೋಗಕ್ಷೇಮವನ್ನು ಸುಧಾರಿಸಲು ಸಹಾಯ ಮಾಡುತ್ತದೆ ಜೊತೆಗೆ ಈ ತಂತ್ರಜ್ಞಾನದ ಭರಾಟೆಯಲ್ಲಿ ನಮ್ಮ ಮೂಲ ಸಂಸ್ಕೃತಿಯಾದ ಜಾನಪದ ಕಲೆಯನ್ನೂ ಸಹಿತ ಮರೆಯಬಾರದು ಎಂದರು.      

ನೃತ್ಯ ಶಾಲೆಯ ವ್ಯವಸ್ಥಾಪಕ ಶಿವರಾಜ ಮಾಳಗಿ, ಯುವ ಮುಖಂಡರಾದ ನಾಗರಾಜ್ ಕ್ಯಾಬಳ್ಳಿ, ಬಸವರಾಜ ಹಡಪದ, ಮುತ್ತುರಾಜ್ ಕ್ಷೌರದ, ವಿಶ್ವನಾಥ ಬಂಡಿವಡ್ಡರ, ಮಂಜುನಾಥ ಹಡಪದ, ಶಿವರಾಜ್ ಕ್ಷೌರದ, ಶಂಬು ಕೇರಿ ಸೇರಿದಂತೆ ನೃತ್ಯ ಶಾಲೆಯ ಶಿಕ್ಷಕರು, ವಿದ್ಯಾರ್ಥಿಗಳು, ಪಾಲಕರು ಹಾಗೂ ವರುಣಗೌಡ್ರ ಅಭಿಮಾನಿ ಬಳಗದ ಸದಸ್ಯರು ಇದ್ದರು.